ព្រះរាជអាជ្ញាអមសាលាដំបូងរាជធានីភ្នំពេញ មិនទាន់សម្រេចចោទប្រកាន់លោក ញឹក ប៊ុនឆៃ អតីតមេទ័ពគណបក្សហ៊្វុនស៊ិនប៉ិច និងសព្វថ្ងៃជាប្រធានគណបក្សខ្មែររួបរួមជាតិ នៅឡើយទេ។ ក្រោយការសាកសួរអស់រយៈពេលប្រមាណ ៥ម៉ោងនៅថ្ងៃទី៥ ខែសីហា ព្រះរាជអាជ្ញាបញ្ជាឲ្យសមត្ថកិច្ចបញ្ជូនលោក ញឹក ប៊ុនឆៃ ទៅឃុំខ្លួននៅអង្គភាពមន្ត្រីនគរបាលយុត្តិធម៌វិញ រង់ចាំការសាកសួរបន្ត។
ពីរថ្ងៃក្រោយសមត្ថកិច្ចចាប់ខ្លួនពាក់ព័ន្ធសំណុំរឿងផលិតគ្រឿងញៀនកាលពីជាង ១០ឆ្នាំមុន លោក ញឹក ប៊ុនឆៃ ត្រូវបញ្ជូនមកសាកសួរនៅតុលាការក្រុងភ្នំពេញ។
អ្នកនាំពាក្យក្រសួងមហាផ្ទៃ អះអាងថា បានរកឃើញថាលោក ញឹក ប៊ុនឆៃ ជាប់ពាក់ព័ន្ធលុយកាក់ និងមានការឃុបឃិតក្នុងករណីផលិតគ្រឿងញៀននៅខេត្តកំពង់ស្ពឺ ប៉ុន្តែព្រះរាជអាជ្ញាអមសាលាដំបូងរាជធានីភ្នំពេញ មិនទាន់សម្រេចចោទប្រកាន់លោក ញឹក ប៊ុនឆៃ នៅឡើយទេ។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា ឲ្យដឹងនៅថ្ងៃទី៥ ខែសីហា តាមបណ្ដាញទំនាក់ទំនងសង្គមតេឡេក្រាម (Telegram) ថា អយ្យការសាលាដំបូងរាជធានីភ្នំពេញ នឹងបន្តការសាកសួរលោក ញឹក ប៊ុនឆៃ នៅថ្ងៃទី៦ ខែសីហា បន្តទៀត។ លោកថា លោក ញឹក ប៊ុនឆៃ ត្រូវបានបញ្ជូនទៅឃុំខ្លួននៅអង្គភាពមន្ត្រីនគរបាលយុត្តិធម៌នៃស្នងការដ្ឋាននគរបាលរាជធានីភ្នំពេញវិញ។ បើតាមការបញ្ជាក់របស់លោក លី សុផាណា ក្រៅពីការសាកសួរ ក៏នឹងមានការពិនិត្យឯកសារពាក់ព័ន្ធនានានៅថ្ងៃទី៦ ខែសីហា ដើម្បីសម្រេចអំពីរឿងនេះ ឬមានន័យថា ព្រះរាជអាជ្ញានឹងសម្រេចចោទ ឬមិនសម្រេចចោទលើលោក ញឹក ប៊ុនឆៃ។
ក្នុងពេលបញ្ជូនមកសាកសួរនៅតុលាការ លោក ញឹក ប៊ុនឆៃ ស្ថិតក្នុងសម្លៀកបំពាក់ធម្មតា និងបានបង្ហាញទឹកមុខញញឹមធម្មតា ហើយដៃទាំងពីររបស់លោកក៏មិនជាប់ខ្នោះដែរ។
ក្នុងចំណោមគណបក្សបីដែលឈ្នះកៅអីឃុំ-សង្កាត់ក្រៅពីគណបក្សប្រជាជនកម្ពុជា និងគណបក្សសង្គ្រោះជាតិ នោះ គណបក្សខ្មែររួបរួមជាតិ របស់លោក ញឹក ប៊ុនឆៃ ក៏ឈ្នះបានឃុំមួយយកមកគ្រប់គ្រងនៅក្នុងខេត្តបន្ទាយមានជ័យ ក្នុងការបោះឆ្នោតកាលពីខែមិថុនា។
ភ្លាមៗនោះ ក៏លេចឮព័ត៌មានថា លោក ញឹក ប៊ុនឆៃ មានបំណងទៅរួបរួមនយោបាយជាមួយគណបក្សសង្គ្រោះជាតិ។ ទោះមានការបដិសេធពីលោក ញឹក ប៊ុនឆៃ ក្តី ក៏អ្នកនាំពាក្យគណបក្សកាន់អំណាច លោក សុខ ឥសាន ប្រកាសថា គណបក្សប្រជាជនកម្ពុជា ផ្តាច់ទំនាក់ទំនងពីលោក ញឹក ប៊ុនឆៃ។ ចំណែកសមាជិកគណបក្សខ្មែររួបរួមជាតិ របស់លោក ញឹក ប៊ុនឆៃ ប្រមាណ ១០០នាក់បាននាំគ្នារត់ទៅចុះចូលជាមួយគណបក្សហ៊្វុនស៊ិនប៉ិច ដែលជាសម្ព័ន្ធមិត្តចាស់របស់លោក ហ៊ុន សែន។
លោក ញឹក ប៊ុនឆៃ ដែលជាអតីតឧបនាយករដ្ឋមន្ត្រី និងធ្លាប់ជាទីប្រឹក្សារបស់រដ្ឋាភិបាលផងដែរនោះ ត្រូវបានសមត្ថកិច្ចចាប់ខ្លួនកាលពីថ្ងៃទី៣ ខែសីហា និងបញ្ជូនទៅសាកសួរនៅស្នងការដ្ឋាននគរបាលរាជធានីភ្នំពេញ ពាក់ព័ន្ធនឹងសំណុំរឿងផលិតគ្រឿងញៀនខុសច្បាប់កាលពីឆ្នាំ២០០៧ នៅស្រុកភ្នំស្រួច ខេត្តកំពង់ស្ពឺ។
ប្រធានការិយាល័យមេធាវីក្រុមអ្នកច្បាប់អមរិន្ទ្រ លោកមេធាវី សុក សំអឿន មើលឃើញទិដ្ឋភាពផ្លូវច្បាប់ថា បើទោះមានការរកឃើញថា លោក ញឹក ប៊ុនឆៃ មានជាប់ទាក់ទងករណីគ្រឿងញៀននេះមែន ក៏មិនជាប់ពាក់ព័ន្ធនឹងការរំលាយគណបក្សដែរ ព្រោះសំណុំរឿងនេះបានកើតឡើងមុនពេលលោក ញឹក ប៊ុនឆៃ បង្កើតគណបក្ស។ មួយវិញទៀត គណបក្សជ្រើសរើសអ្នកថ្មីមកដឹកនាំបក្សនៅពេលលោក ញឹក ប៊ុនឆៃ មានទោស៖ « ការរំលាយបក្សនោះលុះត្រាតែធ្វើក្នុងនាមជាស្ថាប័នបក្សទាំងមូលតែម្តងនេះ បើផ្អែកលើក្រមព្រហ្មទណ្ឌ ហើយដែលពេលច្បាប់គណបក្សថ្មី លុះតែ គាត់ ( លោក ញឹក ប៊ុនឆៃ ) ជាទណ្ឌិត ប៉ុន្តែឥឡូវគាត់ មិនទាន់ មានទោស ណា ? »។
ទាក់ទងរឿងនេះ អាស៊ីសេរី មិនទាន់អាចសុំការបំភ្លឺពីអ្នកនាំពាក្យ ឬមន្ត្រីគណបក្សខ្មែររួបរួមជាតិ បាននៅឡើយទេ នៅថ្ងៃទី៥ ខែសីហា។
អ្នកឃ្លាំមើលស្ថានការណ៍នយោបាយ លោកបណ្ឌិត មាស នី យល់ថា លោក ញឹក ប៊ុនឆៃ ប្រឈមនឹងជាប់ពន្ធនាគារច្រើនជាងការរួចផុតការចោទប្រកាន់ នេះបើផ្អែកលើស្ថានការណ៍នយោបាយសព្វថ្ងៃ ខណៈគណបក្សប្រជាជនកម្ពុជា ប្រកាសកាត់ផ្តាច់សម្ពន្ធភាពជាមួយលោក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។