តុលាការសម្រេចឃុំខ្លួនមន្ត្រីគណបក្សសង្គ្រោះជាតិ ចំនួន ២នាក់ក្នុងថ្ងៃតែមួយ គឺម្នាក់ជាជំទប់ទី១ នៅរាជធានីភ្នំពេញ ក្រោមបទចោទក្លែងលិខិតសាធារណៈ និងម្នាក់ទៀតជាជំទប់ទី២ នៅខេត្តបន្ទាយមានជ័យ ដោយចោទប្រកាន់ពីបទញុះញង់ឲ្យប្រើអំពើហិង្សាមានស្ថានទម្ងន់ទោស។
សមត្ថកិច្ចបានបញ្ជូនខ្លួនជំទប់ទី២ សង្កាត់ប៉ោយប៉ែត មកពីគណបក្ស សម រង្ស៊ី លោក ចៅ វាសនា ទៅតាមរថយន្តចេញទ្វារមុខសាលាដំបូងខេត្តបន្ទាយមានជ័យ ភ្លាមៗ បន្ទាប់ពីមន្ត្រីគណបក្សប្រឆាំងរូបនេះចូលបំភ្លឺតុលាការអស់ជាង ៤ម៉ោង។
មេធាវីការពារក្ដីឲ្យជនត្រូវចោទ លោក ជូង ជូងី ផ្ដល់សម្ភាសឲ្យអាស៊ីសេរី នៅសាលាដំបូងខេត្តបន្ទាយមានជ័យ នៅថ្ងៃទី១៦ កុម្ភៈ ថា ចៅក្រមស៊ើបសួរបានចោទប្រកាន់លោក ចៅ វាសនា ពីបទញុះញង់ឲ្យប្រើអំពើហិង្សា។ លោកអះអាងថា កូនក្ដីរបស់លោកបានបដិសេធចំពោះការចោទប្រកាន់នេះ ដោយថារូបគាត់មិនបានចូលរួមធ្វើបាតុកម្មជាមួយក្រុមកម្មករដែលបង្កឲ្យមានហិង្សាដាក់គ្នានោះទេ៖ «ខ្ញុំពិនិត្យមើលលើផ្លូវច្បាប់ គឺមិនត្រូវឃុំខ្លួនគាត់ទេ។ ការឃុំខ្លួន លុះត្រាតែ ខ្លាចគាត់រត់គេចខ្លួន ប៉ុន្តែនេះគាត់អត់រត់គេចខ្លួនទេ។ ម្យ៉ាងទៀតការឃុំខ្លួន លុះត្រាតែមានបទល្មើស ប៉ុន្តែលោក ចៅ វាសនា អត់មានប្រព្រឹត្តបទល្មើសអ្វីទេ។ ខ្ញុំនឹងទាមទារឲ្យតុលាការដោះលែងគាត់នៅក្រៅឃុំវិញ »។
សមាជិកព្រឹទ្ធសភាគណបក្ស សម រង្ស៊ី លោក សោ ចាន់ដេត ផ្ដល់សម្ភាសឲ្យអាស៊ីសេរីនៅខាងមុខសាលាដំបូងខេត្តបន្ទាយមានជ័យ ថា រឿងនេះគឺជាករណីនយោបាយ ដោយសារគណបក្សកាន់អំណាចឃើញលោក ចៅ វាសនា មានប្រជាប្រិយភាពខ្លាំង ដែលអាចយកឈ្នះលើការបោះឆ្នោតជ្រើសរើសក្រុមប្រឹក្សាសង្កាត់ប៉ោយប៉ែត បាននៅពេលខាងមុខ៖ «ប៉ុន្តែខ្ញុំសូមប្រកាសថា ទោះបី យ៉ាង ម៉េច ក៏ដោយ គណបក្សសង្គ្រោះជាតិ នៅថាដាក់លោក ចៅ វាសនា ជាបេក្ខជនលេខរៀងទី១ គណបក្សសង្គ្រោះជាតិ នៅសង្កាត់ប៉ោយប៉ែត ដដែល»។
ចំណែកនៅភ្នំពេញឯណោះវិញ ក៏មិនខុសគ្នាដែរ គឺជំទប់ទី១ សង្កាត់បឹងកក់ទី១ ខណ្ឌទួលគោក មកពីគណបក្ស សម រង្ស៊ី លោក លី សុគន្ធ ក៏ត្រូវបានសមត្ថកិច្ចបញ្ជូនទៅឃុំខ្លួននៅពន្ធនាគារ នៅព្រឹកថ្ងៃទី១៦ កុម្ភៈ ដូចគ្នា។
មេធាវីការពារក្ដីឲ្យជនត្រូវចោទ អ្នកស្រី ម៉េង សុភារី មានប្រសាសន៍ថា ចៅក្រមស៊ើបសួរបានសម្រេចចោទប្រកាន់លោក លី សុគន្ធ ពីបទក្លែងលិខិតសាធារណៈ ដែលបានចេញប័ណ្ណនៅលើគណបក្សនយោបាយ។ អ្នកស្រីបន្ថែមថា កូនក្ដីរបស់អ្នកស្រីបានបដិសេធចំពោះការចោទប្រកាន់នេះ៖ «ដោយសារតែប័ណ្ណដែលចេញឲ្យភ្នាក់ងារគណបក្សនោះ គឺមិន មែនគាត់ជាអ្នកចុះហត្ថលេខាទេ គឺចុះហត្ថលេខា និងបោះត្រាដោយ ចៅសង្កាត់ គឺជាប័ណ្ណដែលចេញដោយក្រុមប្រឹក្សាសង្កាត់បឹងកក់ទី១ ។ ចំណែកគាត់វិញជាអ្នកសរសេរបំពេញឈ្មោះនៅលើប័ណ្ណ ហើយ និង បិទរូបថត។ ការបិទរូបថត ដោយសារតែគាត់អត់ស្គាល់ថាម្ចាស់រូបថត និងឈ្មោះដែលគាត់សរសេរនោះជាមនុស្ស ២នាក់ផ្សេងគ្នា គឺមនុស្សផ្សេងគ្នា ហើយគាត់បានបិទរូបថតនៅលើប័ណ្ណនោះ ដែលមានឈ្មោះ អ្នកផ្សេង ទៀត»។
អាស៊ីសេរី ពុំអាចទាក់ទងអ្នកនាំពាក្យសាលាដំបូងខេត្តបន្ទាយមានជ័យ និងរាជធានីភ្នំពេញ ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី១៦ កុម្ភៈ។
ប៉ុន្តែលោក សោ ចាន់ដេត បញ្ជាក់ថា គណបក្សសង្គ្រោះជាតិ នឹងតស៊ូតាមផ្លូវតុលាការ ដើម្បីជួយដល់លោក ចៅ វាសនា ឲ្យមានសេរីភាពឡើងវិញ។
ទាក់ទងនឹងរឿងក្ដីនេះ កាលពីថ្ងៃទី២៥ ខែឧសភា ឆ្នាំ២០១៥ ក្រុមកម្មករអូសរទេះប្រមាណ ១៥០នាក់ ធ្វើបាតុកម្មទាមទារឲ្យមន្ត្រីគយប្រចាំច្រកទ្វារព្រំដែនអន្តរជាតិប៉ោយប៉ែត បញ្ឈប់យកពន្ធលើការដឹកទំនិញចេញចូលតាមរទេះខ្ពស់ហួសហេតុបន្តទៀត។ ការតវ៉ានេះ បង្កឲ្យមានការប៉ះទង្គិចគ្នាដោយហិង្សារវាងក្រុមកម្មករអូសរទេះ និងកម្លាំងសមត្ថកិច្ច បណ្ដាលឲ្យខូចរថយន្តរបស់គយ និងរដ្ឋាករក្រុងប៉ោយប៉ែត ចំនួន ៧គ្រឿង ព្រមទាំងកញ្ចក់ របង ទ្វារ បង្អួចនៃទីស្នាក់ការគយ ខូចខាតមួយចំនួនទៀត។ ការតវ៉ាបង្កហិង្សាដាក់គ្នានេះ ដោយសារពួកគេឃើញសមត្ថកិច្ចចាប់តំណាងក្រុមអ្នកតវ៉ាម្នាក់វាយធ្វើទារុណកម្ម ធ្វើឲ្យពួកគាត់ខឹង ក៏ផ្ទុះហិង្សាដាក់គ្នាតែម្ដង។
រហូតមកទល់ពេលនេះ សមត្ថកិច្ចពុំទាន់ដោះស្រាយបញ្ហានេះបានចប់សព្វគ្រប់នៅឡើយ។ អ្នកជាប់បណ្ដឹងក្នុងសំណុំរឿងនេះកន្លងទៅរួមមាន ក្រុមកម្មករអូសរទេះចំនួន ១៥នាក់ លោក ចៅ វាសនា ជំទប់ទី២ សង្កាត់ប៉ោយប៉ែត មកពីគណបក្ស សម រង្ស៊ី និងលោក ឌិន ពុទ្ធី ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា។ ចំណែកសមត្ថកិច្ចពាក់ព័ន្ធនៅក្រុងប៉ោយប៉ែត ពុំមាននៅក្នុងបណ្ដឹងនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។