ព្រះរាជអាជ្ញារងអមសាលាដំបូងខេត្តព្រះវិហារ បានបញ្ជាទៅមន្ត្រីឧទ្យានុរក្សនៃក្រសួងបរិស្ថាន និងកម្លាំងប៉ូលិសស្រុករវៀង មួយចំនួន ឱ្យចុះទៅរុះរើទីស្នាក់ការរបស់សហគមន៍ការពារព្រៃឈើនៅបឹងទន្លេម្រេច ក្នុងឃុំរមណី។ ក្នុងគ្រាប្រតិបត្តិការរុះរើទីស្នាក់ការរបស់សហគមន៍ព្រៃឈើកាលពីចុងសប្ដាហ៍កន្លងទៅ បានធ្វើឱ្យមានការប៉ះទង្គិចគ្នារវាងក្រុមប្រជាពលរដ្ឋ និងមន្ត្រីបរិស្ថាន ហើយក្រុមសមត្ថកិច្ចបានចាប់ដកហូតយកទូរស័ព្ទដៃពីអ្នកភូមិខ្លះ និងបណ្ដាលឲ្យមនុស្សម្នាក់របួស។
មន្ត្រីសមាគមការពារសិទ្ធិមនុស្សអាដហុក (Adhoc) ខេត្តព្រះវិហារ កំពុងរង់ចាំជួយប្រជាសហគមន៍ការពារព្រៃឈើបឹងទន្លេម្រេច នៃភូមិអូរពោធិ ឃុំរមណី ស្រុករវៀង ក្នុងការធ្វើពាក្យបណ្ដឹងដាក់ទៅក្រសួងយុត្តិធម៌ និងស្ថាប័នអគ្គព្រះរាជអាជ្ញា ដើម្បីប្រឆាំងនឹងព្រះរាជអាជ្ញារងអមសាលាដំបូងនៃខេត្តនេះម្នាក់។
ការគ្រោងធ្វើពាក្យប្ដឹងព្រះរាជអាជ្ញារងអមសាលាដំបូងខេត្តព្រះវិហារ ម្នាក់នោះ បន្ទាប់ពីគេដឹងថា គាត់បានបញ្ជាឱ្យកម្លាំងឧទ្យានុរក្សនៃក្រសួងបរិស្ថាន និងប៉ូលិសមួយចំនួនចុះទៅរុះរើទីស្នាក់ការរបស់សហគមន៍ការពារព្រៃឈើ ចោលដោយមិនត្រឹមត្រូវតាមផ្លូវច្បាប់។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តព្រះវិហារ គឺលោក ឡោ ចាន់។ លោកអះអាងថា កាលពីថ្ងៃទី៧ ខែមីនា កន្លងទៅ ព្រះរាជអាជ្ញារងអមសាលាដំបូងខេត្តព្រះវិហារ លោក ឡុង ស៊ីថា បានបញ្ជាឱ្យកម្លាំងបរិស្ថាន និងប៉ូលិសខ្លះ ទៅរុះរើទីស្នាក់ការរបស់សហគមន៍ការពារព្រៃឈើបឹងទន្លេម្រេចចោល ដោយប្រើអំណាចបំពាន។
លោក ឡោ ចាន់ បញ្ជាក់ទៀតថា ក្នុងពេលដែលកម្លាំងសមត្ថកិច្ចចុះរុះរើទីស្នាក់ការសហគមន៍ការពារព្រៃឈើនោះ គឺមានការប្រទូសរ៉ាយគ្នារវាងសមត្ថកិច្ច និងសហគមន៍ បណ្ដាលឱ្យមានការវាយតប់លើរាងកាយ ព្រមទាំងចាប់យកទូរស័ព្ទដៃខ្លះពីប្រជាសហគមន៍ផង។ ក្រៅពីនោះ មានអ្នកភូមិខ្លះបានរត់គេចចេញពីផ្ទះជាច្រើនម៉ោង ដោយសារតែភ័យខ្លាចអាជ្ញាធរតាមចាប់ខ្លួន។
លោក ឡោ ចាន់ រិះគន់ថា កន្លងទៅនៅពេលដែលក្រុមហ៊ុន ឬក៏សមត្ថកិច្ចប្ដឹងចោទប្រកាន់សហគមន៍ការពារព្រៃឈើ ឬសហគមន៍ដីធ្លីជាដើម គឺព្រះរាជអាជ្ញារង លោក ឡុង ស៊ីថា តែងតែចុះដឹកនាំកម្លាំងទៅបង្ក្រាបការតវ៉ា ឬក៏រុះរើសំណង់ចោលជាដើម។ ក៏ប៉ុន្តែនៅពេលដែលសហគមន៍ប្ដឹងប្រឆាំងក្រុមហ៊ុនវិញ ព្រះរាជអាជ្ញារងដដែលតែងតម្កល់រឿងទុកអត់ចាត់ការ ដែលជាភាពខុសប្រក្រតីនៃការអនុវត្តច្បាប់៖ «ខ្ញុំបានប្រាប់សហគមន៍ហើយថា ឱ្យពួកគាត់ដាក់សំណើមកខាងខ្ញុំ គឺខ្ញុំនឹងជួយរៀបចំបណ្ដឹងដើម្បីដាក់ទៅរដ្ឋមន្ត្រីក្រសួងយុត្តិធម៌ ដាក់ទៅអគ្គព្រះរាជអាជ្ញា និងដាក់ទៅរដ្ឋសភាដើម្បីឱ្យពិនិត្យករណីហ្នឹងឡើងវិញ»។
សហគមន៍ការពារព្រៃឈើបឹងទន្លេម្រេច ក៏បង្ហាញការមិនពេញចិត្តចំពោះការបញ្ជាឱ្យរុះរើទីស្នាក់ការការពារព្រៃឈើនោះដែរ។
តំណាងសហគមន៍ការពារព្រៃឈើបឹងទន្លេម្រេចម្នាក់ ក្នុងចំណោមជាច្រើនទៀត គឺលោក ហួន គាណូ មានប្រសាសន៍ថា កាលពីថ្ងៃទី៧ ខែមីនា កន្លងទៅ ព្រះរាជអាជ្ញាអមសាលាដំបូងខេត្តព្រះវិហារ បានបញ្ជាកម្លាំងបរិស្ថាននិងប៉ូលិសឱ្យទៅរុះរើទីស្នាក់ការការពារព្រៃឈើរបស់សហគមន៍ចោល។
លោក ហួន គាណូ បញ្ជាក់ទៀតថា ក្នុងពេលអនុវត្តការរុះរើនោះ គឺកម្លាំងសមត្ថកិច្ចបានធាក់ ទាត់បុរសចំណាស់ម្នាក់ឱ្យរបួស នៅពេលដែលកម្លាំងសហគមន៍ និងសមត្ថកិច្ចប្រទូសរ៉ាយគ្នា៖ «ព្រះរាជអាជ្ញាបញ្ជាឱ្យកម្លាំងបរិស្ថានប៉ូលិសមករុះរើដឹកទៅអស់ ទាំងអាចាស់មុនដែលគេកាប់ចោលនិងអាថ្មីមួយទៀត»។
ក៏ប៉ុន្តែព្រះរាជអាជ្ញារងអមសាលាដំបូងខេត្តព្រះវិហារ លោក ឡុង ស៊ីថា បានឆ្លើយតបថា លោកមិនបានធ្វើអ្វីដែលប្រាសចាកពីប្រព័ន្ធយុត្តិធម៌និងផ្លូវច្បាប់ទេ។
លោក ឡុង ស៊ីថា បញ្ជាក់ថា មូលហេតុដែលលោកបញ្ជាឱ្យរុះរើទីស្នាក់ការការពារព្រៃឈើនៃសហគមន៍បឹងទន្លេម្រេចនោះ បន្ទាប់ពីប្រធានសហគមន៍ប្ដឹងទៅរូបលោកនិងអាជ្ញាធរខេត្ត ថាមានមនុស្សមួយចំនួនបានទៅសាងសង់ខុសច្បាប់នៅក្នុងដីសហគមន៍។ ក្រុមអ្នកទៅសង់ទីស្នាក់ការនោះ គឺធ្វើសកម្មភាពមិនប្រាប់ទៅប្រធានសហគមន៍ការពារព្រៃឈើ ដែលអាជ្ញាធរទទួលស្គាល់នោះឡើយ៖ «គាត់ប្ដឹងថា គាត់ហ្នឹងជាសហគមន៍ទន្លេម្រេច ប៉ុន្តែប្រធានសហគមន៍អត់បានដឹងថា តើក្រុមនោះទៅកាប់បំផ្លាញ ឬក៏ធ្វើផ្ទះនៅទីនោះ គឺប្រធានអត់ដឹងទេ»។
រយៈពេលជាង ១ឆ្នាំមកហើយ សហគមន៍ទន្លេម្រេចបានប្រឈមមុខនឹងបញ្ហាទំនាស់ដីធ្លីជាញឹកញាប់ ចាប់តាំងពីក្រុមហ៊ុនរបស់លោកឧកញ៉ា ទ្រី ភាព ទទួលបានដីសម្បទានសេដ្ឋកិច្ចនៅតំបន់នោះមក។
កាលពីថ្ងៃទី៤ ខែកក្កដា ឆ្នាំ២០១៤ កន្លងទៅ ក្រុមប្រជាពលរដ្ឋចំនួន ១៣០នាក់ ធ្លាប់លើកគ្នាទៅតវ៉ានៅមុខមន្ទីរបរិស្ថានខេត្តព្រះវិហារ ម្ដងមកហើយ ដោយសារតែមន្ត្រីបរិស្ថាន និងប៉ូលិសបានចាប់ខ្លួនបុរសម្នាក់ នៅពេលដែលសមត្ថកិច្ចចុះទៅរារាំងអ្នកភូមិមិនឱ្យសង់លំនៅឋាន ៩ខ្នង នៅទល់មុខគ្នានឹងក្រុមហ៊ុន ទ្រី ភាព។ តំណាងសហគមន៍ទន្លេម្រេចធ្លាប់អះអាងថា ក្រុមហ៊ុនដីសម្បទានរបស់លោកឧកញ៉ា ទ្រី ភាព ចេះតែរំកិលចូលទៅក្នុងដែនដីសហគមន៍បន្តិចម្ដងៗ ហើយនៅពេលសហគមន៍ព្រៃឈើដាក់ពាក្យប្ដឹងទៅអាជ្ញាធរ និងតុលាការ គឺមិនដែលឃើញមានការដោះស្រាយទេ ក៏ប៉ុន្តែនៅពេលដែលប្រជាសហគមន៍ព្រួយបារម្ភខ្លាចបាត់បង់ដី ក៏ទៅសង់ផ្ទះការពារ បែរជាមន្ត្រីដឹកនាំសមត្ថកិច្ចចុះអនុវត្តការបណ្ដេញចេញ និងចាប់ខ្លួនអ្នកភូមិទៅវិញ។
កាលពីថ្ងៃទី៨ ខែមករា ឆ្នាំ២០១៥ កន្លងទៅ សហគមន៍ទន្លេម្រេច ក៏ធ្លាប់ដាក់ពាក្យប្ដឹងប្រឆាំងប្រធានទីស្នាក់ការបរិស្ថាន ពីបទយកម៉ាស៊ីនទៅកាត់បំផ្លាញទីស្នាក់ការរបស់ពួកគេដែរ ប៉ុន្តែតុលាការហាក់មិនមានចំណាត់ការអ្វីទេ។
មន្ត្រីផ្នែកតស៊ូមតិរបស់អង្គការពន្លកខ្មែរ លោក ប៉ិក សោភ័ណ ឱ្យដឹងថា ការដែលតុលាការបញ្ជាឱ្យសមត្ថកិច្ចរុះរើទីស្នាក់ការសហគមន៍ការពារព្រៃឈើចោលនោះ គឺមិនសមស្របទៅតាមនីតិវិធីទេ ពីព្រោះលោកដឹងថា កន្លងទៅអាជ្ញាធរបានប្រកាសប្រគល់ព្រៃនោះទៅឱ្យសហគមន៍ការពាររួចហើយ ក៏ប៉ុន្តែនៅពេលដែលក្រុមហ៊ុន ទ្រី ភាព ចូលទៅកាន់កាប់ដីសម្បទានក្បែរនោះ បែរជាសមត្ថកិច្ច ឬក៏អ្នកអភិរក្សព្រៃឈើមិនជួយការពារសហគមន៍ទេ ដោយជួយការពារក្រុមហ៊ុនទៅវិញ៖ «យើងមើលឃើញថា សហគមន៍គាត់មានការភ័យខ្លាចបាត់បង់ព្រៃសហគមន៍របស់គាត់ ដូច្នេះគាត់ចេះតែខំវាតទីកន្លែង ឬក៏ការពារព្រៃ ប៉ុន្តែបែរជាត្រូវបានចោទប្រកាន់ពីសមត្ថកិច្ចទៅវិញ»។
តំណាងសហគមន៍ការពារព្រៃឈើបឹងទន្លេម្រេច នៅតែបង្ហាញជំហរថា ពួកគេនៅតែព្យាយាមធ្វើពាក្យបណ្ដឹងដើម្បីការពារព្រៃឈើទីនោះ ក៏ប៉ុន្តែគេមិនមានសង្ឃឹមថា អាចមានយុត្តិធម៌ឡើយ ពីព្រោះជាច្រើនលើកមកហើយ គេធ្លាប់ដាក់ពាក្យប្ដឹងប្រឆាំងក្រុមហ៊ុន ទ្រី ភាព និងប្ដឹងប្រឆាំងមន្ត្រីបរិស្ថានផង ក៏ប៉ុន្តែរាល់ការប្ដឹងនោះ មិនបានទទួលយុត្តិធម៌អ្វីឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។