ពលរដ្ឋខេត្តកោះកុងគ្រោងប្ដឹងអាជ្ញាធរចោទប្រើហិង្សាក្នុងពេលបង្ក្រាបការតវ៉ា
2015.09.03
ប្រជាពលរដ្ឋរងគ្រោះដោយការបង្ក្រាបការតវ៉ាពីអាជ្ញាធរខេត្តកោះកុង សុំអន្តរាគមន៍ផ្នែកច្បាប់ពីអង្គការសិទ្ធិមនុស្ស ឲ្យរកមធ្យោបាយប្ដឹងក្រុមអាជ្ញាធរដែលប្រើអំពើហិង្សា ដើម្បីស្វែងរកយុត្តិធម៌ឲ្យពួកគាត់។ ចំណែកអាជ្ញាធរខេត្តថ្លែងថា ការប្តឹងផ្តល់ណាមួយ គឺជាសិទ្ធិរបស់ពលរដ្ឋ ប៉ុន្តែអាជ្ញាធរបដិសេធថាមិនបានប្រើហិង្សាណាមួយលើពួកគាត់នោះទេ។
ពលរដ្ឋនៅខេត្តកោះកុង ដែលរងរបួសធ្ងន់ក្នុងហេតុការណ៍បង្ក្រាបដោយហិង្សាពីអាជ្ញាធរ មិនឲ្យមានការតវ៉ានោះ កំពុងស្វែងរកកិច្ចអន្តរាគមន៍ពីអង្គការសិទ្ធិមនុស្ស ដើម្បីទាមទារឲ្យមានអ្នកទទួលខុសត្រូវ។
ពួកគាត់ថ្លែងនៅថ្ងៃទី៣ កញ្ញា ថា អាជ្ញាធរមានសមត្ថកិច្ច ត្រូវសងជំងឺចិត្តដល់ពួកគាត់ ព្រោះអាជ្ញាធរបានប្រើកម្លាំងបង្ក្រាបពួកគាត់ដោយហិង្សា ធ្វើឲ្យអ្នកខ្លះសន្លប់ និងរងរបួសធ្ងន់ធ្ងរ ហើយអាជ្ញាធរត្រូវទទួលខុសត្រូវចំពោះការបណ្តោយឲ្យមានក្រុមអ្នកតវ៉ាមួយក្រុមទៀត មកបង្ក្រាបអ្នកតវ៉ាដែលទាមទារឲ្យដោះលែងសកម្មជនបរិស្ថាន ៣នាក់ ដែលកំពុងជាប់ឃុំនៅខេត្តនេះ។
ពលរដ្ឋម្នាក់ដែលរងរបួសធ្ងន់ជាងគេ គឺលោក វ៉ាន នីន នៅឃុំកណ្ដោល បានហៅការបង្ក្រាបក្រុមប្រជាពលរដ្ឋមិនឲ្យតវ៉ាទាមទារឲ្យដោះលែងសកម្មជនបរិស្ថាននោះ ថាជាការបង្ក្រាបព្រៃផ្សៃមួយដែលមិនអាចទទួលយកបាន៖ «សមត្ថកិច្ចបង្ក្រាបយ៉ាងចាស់ដៃ គេធាក់ខ្ញុំ គេចាប់បោកក្បាលនឹងជញ្ជាំង ឥឡូវខ្ញុំកំពុងតែចុកក្នុងទ្រូង ហើយក្បាលខ្ញុំកំពុងពើតឈឺ»។
លោកបន្តថា ពួកគាត់នឹងប្ដឹងរកមុខកម្លាំងសមត្ថកិច្ចណាដែលជាអ្នកបញ្ជា និងអ្នកដៃដល់វាយដំប្រជាពលរដ្ឋ ឲ្យមកទទួលខុសត្រូវចំពោះមុខច្បាប់ ដើម្បីផ្តល់យុត្តិធម៌ដល់រូបលោក និងពលរដ្ឋដទៃទៀត។
ចំណែកស្ត្រីអ្នកតវ៉ាម្នាក់ទៀតឈ្មោះ វី ផល្លា រស់នៅភូមិកោះស្រឡៅ ឃុំកោះកាពិ ដែលរងរបួសក្នុងពេលបង្ក្រាបការតវ៉ានោះដែរ ក៏ចង់ឲ្យមានកិច្ចអន្តរាគមន៍រកយុត្តិធម៌ដូចគ្នាដែរ៖ «ដូចព្រៃផ្សៃពេកហើយ ទាំងប្រជាពលរដ្ឋអត់មានធ្វើអ្វីទៅលើពួកគាត់ ពលរដ្ឋមានតែឱនលំទោន ទាំងគោរពពួកគាត់ តែពួកគាត់ផ្តល់មកប្រជាពលរដ្ឋវិញនូវការបង្ក្រាបពលរដ្ឋយ៉ាងព្រៃផ្សៃ ដែលពិបាកនឹងទទួលយកបានណាស់»។
សមត្ថកិច្ចខេត្តកោះកុង ក្រៅពីបានបំបែកការប្រមូលផ្តុំពលរដ្ឋដែលមកស្នាក់នៅតវ៉ា ក្នុងបរិវេណវេទិកាបាល់ទាត់មុខសាលាដំបូងខេត្តកោះកុង កាលពីថ្ងៃទី២ កញ្ញា នោះ សមត្ថកិច្ចក៏បានចាប់ឃាត់ខ្លួនមន្ត្រីសង្គមស៊ីវិល អ្នកកាសែត សកម្មជនការពារបរិស្ថាន និងតំណាងសហគមន៍សរុប ១៧នាក់ ដើម្បីសួរចម្លើយនៅស្នងការដ្ឋាននគរបាលខេត្តនេះ ខណៈពួកគាត់ចុះឃ្លាំមើលសកម្មភាពតវ៉ារបស់ប្រជាពលរដ្ឋមានទំនាស់ដីធ្លី និងសកម្មជនការពារបរិស្ថាន នៅមុខសាលាដំបូងខេត្តកោះកុង នោះ។
ទាក់ទងនឹងការចាប់ និងឃុំខ្លួននេះ ក្រុមសង្គមស៊ីវិលក្នុងស្រុកជិត ២០ស្ថាប័ន បានចេញសេចក្តីថ្លែងការណ៍រួម ថ្កោលទោសចំពោះសកម្មភាពរបស់អាជ្ញាធរខេត្តកោះកុង។ ពួកគេចាត់ទុកសកម្មភាពរបស់អាជ្ញាធរខេត្តកោះកុង ថាជាការរំលោភសិទ្ធិមនុស្សធ្ងន់ធ្ងរ។
ឆ្លើយតបរឿងនេះ អភិបាលរងក្រុងខេមរភូមិន្ទ ខេត្តកោះកុង លោក ប៉ែន ប៊ុនឈួយ បានច្រានចោលចំពោះការថ្លែងរបស់អង្គការសង្គមស៊ីវិល ដែលថាអាជ្ញាធរបង្ក្រាបការតវ៉ារបស់ពលរដ្ឋដោយហិង្សា៖ «មានតែការសម្របសម្រួលឲ្យពួកគាត់ត្រឡប់ទៅវិញដោយសន្តិវិធី ហើយពួកគាត់មានចំនួន ២០នាក់ហ្នឹង»។
ទោះយ៉ាងណាក្តី មន្ត្រីសម្របសម្រួលនៃសមាគមអាដហុក (ADHOC) ប្រចាំខេត្តកោះកុង លោក ញៀប សំអឿន ឲ្យដឹងថា អង្គការលោកនឹងជួយអន្តរាគមន៍ជូនពលរដ្ឋរងគ្រោះ នៅពេលដែលទទួលពាក្យបណ្ដឹងជាផ្លូវការ៖ «យើងនឹងពិនិត្យមើលថា តើឆន្ទៈរបស់ពួកគាត់ចង់បានអ្វី? ហើយអង្គការយើងនឹងសម្របសម្រួលជួយពួកគាត់ទៅតាមផ្លូវច្បាប់»។
មកដល់ពេលនេះ សកម្មជនបរិស្ថាន ៣នាក់ ដែលកំពុងជាប់ឃុំនោះ តុលាការមិនទាន់កំណត់ពេលជាក់លាក់ក្នុងការបើកសវនាការនៅឡើយ។
អង្គការសង្គមស៊ីវិលយល់ឃើញថា សកម្មភាពទាមទាររបស់យុវជន ៣នាក់នៃអង្គការមាតាធម្មជាតិ និងពលរដ្ឋ មិនឲ្យក្រុមហ៊ុនបូមខ្សាច់នោះ គឺជាការចូលរួមយ៉ាងសំខាន់ក្នុងការការពារបរិស្ថាន ដែលត្រូវបានធានាដោយរដ្ឋធម្មនុញ្ញ និងច្បាប់ជាតិ ដោយពួកគាត់មិនត្រូវក្លាយជាជនជាប់ចោទនោះទេ។ ស្របពេលគ្នានោះ អង្គការសង្គមស៊ីវិល ស្នើឲ្យអាជ្ញាធរសិក្សាពីផលប៉ះពាល់បរិស្ថាន និងសង្គម ចំពោះការបូមខ្សាច់របស់ក្រុមហ៊ុន ដាយរិក អាកសេស (Direct Access) និងក្រុមហ៊ុន អ៊ិនធឺណេសិនណល រ៉េនបូ (International Rainbow) ឡើងវិញ៕