ថ្នាក់ដឹកនាំតំណាងរាស្ត្រនៃគណបក្សនយោបាយដែលអាសនៈនៅសភា កំណត់យកថ្ងៃទី១១ ខែសីហា ជាពេលវេលាជាក់លាក់ជួបប្រជុំគ្នា។ សេចក្ដីប្រកាសព័ត៌មានរបស់នាយកដ្ឋានព័ត៌មាន នៃរដ្ឋសភា ដែលផ្សព្វផ្សាយនៅព្រឹកថ្ងៃទី៨ ខែសីហា ឲ្យដឹងថា លោក ស ខេង ប្រធានក្រុមអ្នកតំណាងរាស្ត្រនៃគណបក្សប្រជាជនកម្ពុជា និងប្រធានស្ដីទីនៃក្រុមភាគតិច ឬក្រុមតំណាងរាស្ត្រគណបក្សសង្គ្រោះជាតិ លោក កឹម សុខា នឹងជួបប្រជុំគ្នានៅវេលាម៉ោង ៥ល្ងាចថ្ងៃអង្គារ សប្ដាហ៍ក្រោយ នៅមន្ទីររដ្ឋសភា។
ការជួបទល់មុខគ្នាលើកនេះ គឺក្នុងអំឡុងពេលស្ថានការណ៍នយោបាយកំពុងឡើងកម្ដៅខ្លាំង ដូចបញ្ហាព្រំដែនកម្ពុជា-វៀតណាម និងការតាមចាប់សកម្មជនបក្សប្រឆាំងដាក់គុកជាបន្តបន្ទាប់ ប៉ុន្តែបញ្ហាទាំងពីរនេះ មិនប្រាកដថានឹងបានជជែកគ្នា ឬយ៉ាងណានោះទេ។ យ៉ាងណា នៅក្នុងសេចក្ដីប្រកាសនោះពុំបានបញ្ជាក់ថា ភាគីទាំងពីរនឹងពិភាក្សាគ្នាលើរបៀបវារៈអ្វីឲ្យពិតប្រាកដឡើយ។
អគ្គនាយករងទំនាក់ទំនងកិច្ចការសាធារណៈ នៃគណបក្សសង្គ្រោះជាតិ លោក អ៊ូ ច័ន្ទឫទ្ធិ បានឲ្យដឹងនៅថ្ងៃទី៧ សីហា ថា ការជួបចរចានេះ បើមានឱកាសអាចនឹងពិភាក្សារឿងការចាប់ខ្លួនសកម្មជនគណបក្សសង្គ្រោះជាតិ ឬចរចាក្នុងនាមជាក្រុមតំណាងរាស្ត្រភាគតិច និងភាគច្រើនក្នុងរដ្ឋសភា ដើម្បីដោះស្រាយបញ្ហានយោបាយ និងបញ្ហាផ្សេងៗទៀតដែលពាក់ព័ន្ធ៖ «ទីពីរការដោះស្រាយបញ្ចប់ភាពតានតឹងនយោបាយនៅក្នុងប្រទេសកម្ពុជា ផងដែរ»។
លោក អ៊ូ ច័ន្ទឫទ្ធិ បន្តថា ជំហររបស់គណបក្សសង្គ្រោះជាតិ នៅតែទទូចឲ្យរដ្ឋាភិបាលដោះលែង និងបញ្ឈប់ការតាមចាប់សកម្មជនគណបក្សសង្គ្រោះជាតិ ទាំងអស់ ដើម្បីអនុវត្តកិច្ចព្រមព្រៀងនយោបាយថ្ងៃទី២២ ខែកក្កដា ឆ្នាំ២០១៤។
មកទល់ពេលនេះ សកម្មជនគណបក្សសង្គ្រោះជាតិ ១៤នាក់ហើយ ត្រូវបានចាប់ឃុំខ្លួនក្នុងពន្ធនាគារ និងនៅសល់ពីរនាក់ទៀត កំពុងមានដីកាតាមចាប់ខ្លួន ទាក់ទងនឹងការផ្ទុះអំពើហិង្សានៅស្ពាននាគ ក្បែរទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤។
ចំណែកអ្នកនាំពាក្យគណបក្សប្រជាជនកម្ពុជា លោក សុខ ឥសាន បានបង្ហាញជំហរដាច់ណាត់មួយនៅថ្ងៃទី៧ សីហា ថា ជំនួបក្រុមតំណាងរាស្ត្រទាំងពីរគណបក្សដែលមានអាសនៈក្នុងរដ្ឋសភា នឹងអាចកើតមាននៅពេលឆាប់ខាងមុខនេះ ប៉ុន្តែនឹងមិនជជែកពាក់ព័ន្ធនឹងរឿងសកម្មជនគណបក្សសង្គ្រោះជាតិ ដែលតុលាការកំពុងចាប់ឃុំខ្លួនក្នុងពន្ធនាគារនោះទេ។ លោកពន្យល់ថា បើក្រុមអ្នកតំណាងរាស្ត្រទាំងពីរ ជជែកគ្នាពីរឿងសុំឲ្យដោះលែងអ្នកជាប់ឃុំតាមរយៈវប្បធម៌សន្ទនានោះ គឺមិនអាចទៅរួចទេ ព្រោះជាការលូកដៃជ្រៅរបស់អ្នកតំណាងរាស្ត្រ ចូលក្នុងប្រព័ន្ធយុត្តិធម៌ ឬជាការរំលោភលើយុត្តាធិការរបស់តុលាការ៖ «មេដឹកនាំគណបក្សប្រជាជន បានថ្លែងសារជាចំហរួចហើយថា អត់ត្រូវជជែករឿងហ្នឹងបានទេ កាលណាជជែកទៅវារំលោភសិទ្ធិតុលាការ ហើយផ្ទុយទៅនឹងរដ្ឋធម្មនុញ្ញ»។
ទាក់ទងបញ្ហានេះ មន្ត្រីជាន់ខ្ពស់នៃអង្គការសិទ្ធិមនុស្សលីកាដូ (Licadho) លោក អំ សំអាត មានប្រសាសន៍ថា ជំហរបែបនេះ លោកជឿថា អ្នកនយោបាយអាចបត់បែនបានលឿននៅពេលជួបចរចាទល់មុខគ្នា ហើយលោកជឿថា វប្បធម៌សន្ទនានៅតែមានប្រយោជន៍សម្រាប់អ្នកនយោបាយក្នុងការដោះស្រាយបញ្ហាជាតិ៖ «ពីមុនដូចគ្នាអ៊ីចឹង គឺមិនមានឲ្យនិយាយទេ ប៉ុន្តែនៅពេលចរចា ឬសន្ទនាគ្នាត្រូវ អ្នកទាំងនោះត្រូវបានដោះលែងវិញជាបន្ទាន់។ អ៊ីចឹងបើយើងមើលលើទិដ្ឋភាពទាំងអស់នេះ គឺជានយោបាយច្រើនជាង។ អ្នកដែលជាប់ឃុំទាំងអស់ គឺជាប់ទាក់ទងនឹងស្ថានភាពវប្បធម៌សន្ទនារបស់គណបក្សទាំងពីរ វាសនារបស់លោកដែលត្រូវពឹងផ្អែកនោះ»។
លោកគិតថា ច្រកដែលអាចដោះស្រាយចេញបានតាមរយៈវប្បធម៌សន្ទនានោះ គឺការសម្របសម្រួលគ្នាលើបញ្ហាព្រំដែន និងក្នុងឱកាសមួយទៀត ដែលកិច្ចប្រជុំប្រទេសម្ចាស់ជំនួយកម្ពុជា ជិតចូលមកដល់ ហើយប្រាកដណាស់ថា ប្រទេសមហាអំណាចទាំងនោះមិនចង់ឃើញមានអ្នកនយោបាយជាប់ឃុំដោយអយុត្តិធម៌នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។