មន្ត្រីជាន់ខ្ពស់គណបក្សសង្គ្រោះជាតិ សម្លឹងមើលតុលាការព្រហ្មទណ្ឌអន្តរជាតិ (ICC) ដែលជាស្ថាប័នតុលាការមួយអាចរកយុត្តិធម៌ជូនគណបក្សសង្គ្រោះជាតិ និងពលរដ្ឋម្ចាស់ឆ្នោតជាង ៣លាននាក់ ពាក់ព័ន្ធនឹងការធ្វើទុក្ខបុកម្នេញផ្នែកនយោបាយមកលើបក្សប្រឆាំងពីសំណាក់រដ្ឋាភិបាលលោក ហ៊ុន សែន។ អ្នកច្បាប់យល់ស្រប ថាតុលាការអន្តរជាតិមានយុត្តាធិការលើរឿងក្តីនៃការរំលោភបំពានសិទ្ធិសេរីភាព និងប្រជាធិបតេយ្យធ្ងន់ធ្ងរ កាលណាតុលាការជាតិ រងឥទ្ធិពលនយោបាយដែលមិនអាចរកយុត្តិធម៌សង្គមបាន។
អនុប្រធានគណបក្សសង្គ្រោះជាតិ លោក អេង ឆៃអ៊ាង ថ្លែងនៅក្នុងបទសម្ភាសន៍ក្នុងកម្មវិធីផ្សាយរបស់ទូរទស្សន៍អាស៊ីសេរី កាលពីថ្ងៃទី១៦ ខែវិច្ឆិកា ថា តំណាងរាស្ត្រ និងថ្នាក់ដឹកនាំគណបក្សសង្គ្រោះជាតិ គ្រោងនឹងជួបប្រជុំគ្នានៅជុំវិញពិភពលោកចាប់ផ្ដើមពីថ្ងៃស្អែកនេះតទៅ ដើម្បីពិភាក្សាអំពីផែនការសកម្មភាពលម្អិតទៅថ្ងៃអនាគត។ ផែនការសកម្មភាពនោះ ក៏មានបញ្ចូលនូវការសិក្សាអំពីលទ្ធភាពផ្លូវច្បាប់ដើម្បីរកអន្តរាគមន៍ពីតុលាការព្រហ្មទណ្ឌអន្តរជាតិ ICC ក្នុងរឿងធ្វើបាបគណបក្សប្រឆាំងនេះ៖ «យើងនឹងសិក្សាជាមួយច្បាប់ ជាពិសេសច្បាប់អន្តរជាតិ ដើម្បីធ្វើកិច្ចការបន្តទៅទៀត»។
ការណ៍ដែលត្រូវសម្លឹងមើលរហូតដល់យន្តការតុលាការព្រហ្មទណ្ឌអន្តរជាតិបែបនេះ គឺគណបក្សសង្គ្រោះជាតិ មើលឃើញអំពីភាពគ្មានឯករាជ្យរបស់តុលាការកម្ពុជា គ្រប់ជាន់ថ្នាក់ ជាពិសេសតុលាការកំពូល ដែលសម្រេចសេចក្ដីទៅតាមការចង់បានរបស់លោកនាយករដ្ឋមន្ត្រី ហ៊ុន សែន៖ «អ៊ីចឹងបានន័យថា តុលាការហ្នឹងលើគាត់ទៅហើយ! តុលាការនៅស្រុកខ្មែរ មិនមែនមានតែបីថ្នាក់ទេ គឺមានដល់បួនថ្នាក់ឯណោះ ព្រោះមានសែនកំពូលមួយទៀត។ បើសែនកំពូលថាម៉េច គឺយ៉ាងហ្នឹងហើយ។ ទោះអ្នកច្បាប់ពូកែប៉ុណ្ណាក៏អត់ទៅរួចដែរ»។
មន្ត្រីជាន់ខ្ពស់ផ្នែកសិទ្ធិមនុស្សអន្តរជាតិ ក៏សម្លឹងមើលតុលាការព្រហ្មទណ្ឌអន្តរជាតិនេះ ថាអាចពិនិត្យករណីរំលោភសិទ្ធិមនុស្ស និងប្រជាធិបតេយ្យធ្ងន់ធ្ងរនៅកម្ពុជា បានផងដែរ ជាពិសេសពាក់ព័ន្ធនឹងការធ្វើទុក្ខបុកម្នេញផ្នែកនយោបាយមកលើសំឡេងប្រឆាំង។
នាយកប្រតិបត្តិទទួលបន្ទុកកិច្ចការតំបន់អាស៊ីរបស់អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ប្រ៊ែដ អាដាម (Brad Adams) លើកឡើងថា ក្នុងស្ថានភាពដែលប្រព័ន្ធតុលាការនៅក្នុងប្រទេសកម្ពុជា បាត់បង់សមត្ថភាពក្នុងការរកយុត្តិធម៌ព្រហ្មទណ្ឌបែបនេះ គឺតុលាការអន្តរជាតិអាចជួយអន្តរាគមន៍៖ «មានមូលហេតុជាច្រើនដែលតុលាការព្រហ្មទណ្ឌអន្តរជាតិ ICC អាចពិចារណារឿងក្តីនៅកម្ពុជា។ ដូចដឹងស្រាប់ហើយ លោក ហ៊ុន សែន ជាប់ពាក់ព័ន្ធក្នុងអំពើហិង្សាលើអ្នកគាំទ្រគណបក្សប្រឆាំង។ លោក ហ៊ុន សែន បណ្ដោយឲ្យមាននិទណ្ឌភាព និងការរំលោភសិទ្ធិមនុស្ស។ តុលាការព្រហ្មទណ្ឌអន្តរជាតិ អាចកាត់ទោសមេដឹកនាំរបបមួយ ដូចជាលោក ហ៊ុន សែន ដែលគ្មានឆន្ទៈ ឬគ្មានសមត្ថភាពក្នុងការផ្ដន្ទាទោសជនដែលប្រព្រឹត្តរំលោភសិទ្ធិមនុស្សធ្ងន់ធ្ងរ ដូចអ្វីដែលកើតមាននៅកម្ពុជា ដូចសព្វថ្ងៃនេះ!»។
មេធាវីអន្តរជាតិដែលបានដាក់ពាក្យប្តឹងរដ្ឋាភិបាលលោក ហ៊ុន សែន ជំនួសជនរងគ្រោះខ្មែរ និងលោកបណ្ឌិត កែម ឡី ទៅតុលាការអន្តរជាតិ ប្រាប់អាស៊ីសេរី កាលពីដើមខែវិច្ឆិកា ថាការណ៍ដែលក្រុមអ្នកមានអំណាចជិះជាន់សង្កត់សង្កិន និងធ្វើបាបអ្នកប្រឆាំងទោះក្នុងតម្លៃណាក៏ដោយ ដើម្បីបន្តក្រាញអំណាចបែបនេះ សុទ្ធតែជាធាតុផ្សំបទល្មើស។
មេធាវីជនជាតិអង់គ្លេស លោក រីឆាត រ៉ូជើរ (Richard Rogers) លើកឡើងថា ការធ្វើទុក្ខបុកម្នេញនេះ កំពុងតែបង្កើនសន្ទុះយ៉ាងខ្លាំងរហូតដល់រដ្ឋាភិបាលបណ្ដេញអង្គការសង្គមស៊ីវិល បិទប្រព័ន្ធផ្សព្វផ្សាយឯករាជ្យ និងចេតនារម្លាយគណបក្សប្រឆាំង ដែលស្ដែងឲ្យឃើញអំពីគោលបំណងរបស់គណបក្សប្រជាជនកម្ពុជា ក្នុងការដឹកនាំប្រទេសកម្ពុជា តាមបែបឯកបក្ស និងផ្តាច់ការដ៏សាហាវបំផុត៖ «បទឧក្រិដ្ឋជាច្រើនពាក់ព័ន្ធនឹងការបង្ក្រាបបក្សប្រឆាំងក្នុងពេលថ្មីៗនេះ គឺជាធាតុផ្សំនៃបទល្មើសក្នុងចំណាត់ថ្នាក់ឧក្រិដ្ឋកម្មប្រឆាំងមនុស្សជាតិ។ បើយើងពិនិត្យមើលបទឧក្រិដ្ឋដែលផ្សំបញ្ចូលគ្នាតាំងពីការបណ្ដេញពលរដ្ឋពីលំនៅឋាន ការធ្វើទុក្ខបុកម្នេញលើអ្នកប្រឆាំង ការធ្វើឃាតអ្នកដែលហ៊ាននិយាយរិះគន់រដ្ឋាភិបាល និងការចាប់ខ្លួន និងដាក់ពន្ធនាគារសកម្មជនបក្សប្រឆាំង ដែលទាំងអស់ជាឧក្រិដ្ឋកម្មធ្ងន់ធ្ងរដែលស្ថិតក្នុងប្រភេទនៃឧក្រិដ្ឋកម្មប្រឆាំងមនុស្សជាតិ។ ទាំងនេះឯងហើយដែលតុលាការព្រហ្មទណ្ឌអន្តរជាតិ មានយុត្តាធិការលើអ្វីដែលកំពុងកើតឡើងនៅប្រទេសកម្ពុជា»។
ទោះជាយ៉ាងនេះក្តី មន្ត្រីរដ្ឋាភិបាលយល់ឃើញថា អ្វីដែលជាចំណាត់ការរបស់រដ្ឋាភិបាលកម្ពុជា មកលើសំឡេងប្រឆាំង គឺជាកិច្ចការផ្ទៃក្នុងរបស់កម្ពុជា។ មន្ត្រីនាំពាក្យរដ្ឋាភិបាល លោក ផៃ ស៊ីផាន អះអាងការពារចំណាត់ការទាំងនេះ ថាជាការត្រឹមត្រូវ និងមិនអាចឲ្យអន្តរជាតិមកជ្រៀតជ្រែកបានឡើយ។
តុលាការព្រហ្មទណ្ឌអន្តរជាតិ ជាតុលាការអចិន្ត្រៃយ៍អន្តរជាតិ ដែលមានសមត្ថកិច្ចស៊ើបអង្កេត និងផ្ដន្ទាទោសអ្នកដែលជាប់ចោទពីបទប្រព្រឹត្តឧក្រិដ្ឋកម្មធ្ងន់ធ្ងរ រួមមានឧក្រិដ្ឋកម្មប្រឆាំងមនុស្សជាតិ។ ធាតុផ្សំមួយក្នុងបទឧក្រិដ្ឋប្រឆាំងមនុស្សជាតិ គឺការធ្វើទុក្ខបុកម្នេញផ្នែកនយោបាយ ដូចជាការធ្វើបាបបក្សប្រឆាំងនេះជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។