គណបក្សសង្គ្រោះជាតិ គ្រោងនឹងលើកយកសំណើសុំពន្យារពេលចុះឈ្មោះបោះឆ្នោត និងបញ្ហាអ្នកមានសិទ្ធិបោះឆ្នោតជាច្រើនមិនទាន់បានចុះឈ្មោះ ទៅជជែកជាមួយគណៈកម្មាធិការជាតិរៀបចំការបោះឆ្នោត (គ.ជ.ប) នៅព្រឹកថ្ងៃទី២៥ វិច្ឆិកា។
ការស្នើឲ្យមានការជួបជជែកពិភាក្សានេះ គឺស្របពេលដែលកាលបរិច្ឆេទនៃការចុះឈ្មោះបោះឆ្នោត នឹងត្រូវបញ្ចប់នៅថ្ងៃទី២៩ ខែវិច្ឆិកា ឆ្នាំ២០១៦។
ឆ្លើយតបនឹងលិខិតរបស់គណបក្សសង្គ្រោះជាតិ បានផ្ញើជូនប្រធាន គ.ជ.ប លោក ស៊ិក ប៊ុនហុក ចុះថ្ងៃទី២៣ វិច្ឆិកា គណៈកម្មាធិការជាតិរៀបចំការបោះឆ្នោត បានអនុញ្ញាតឲ្យគណបក្សសង្គ្រោះជាតិ ជួបពិភាក្សានៅព្រឹកថ្ងៃទី២៥ វិច្ឆិកា។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ឲ្យអាស៊ីសេរី ដឹងនៅរសៀលថ្ងៃទី២៤ វិច្ឆិកា ថា ក្រុមតំណាងរាស្ត្រគណបក្សសង្គ្រោះជាតិ នឹងស្នើឲ្យ គ.ជ.ប ពន្យារពេលចុះឈ្មោះបោះឆ្នោតទៅតាមឃុំ-សង្កាត់មួយចំនួន និងបញ្ហាមួយចំនួនដែលគណបក្សសង្គ្រោះជាតិ បានជួបប្រទះ។ លោក យឹម សុវណ្ណ បញ្ជាក់ថា សមាសភាពដែលនឹងចូលទៅជជែកជាមួយនឹងថ្នាក់ដឹកនាំ គ.ជ.ប មានលោក អេង ឆៃអ៊ាង លោក យ៉ែម បុញ្ញឫទ្ធិ រូបលោកផ្ទាល់ និងតំណាងនាយកដ្ឋានកិច្ចការបោះឆ្នោត អ្នកស្រី ម៉េង សុភារី៖ « ជម្រាបជូនគាត់ពីបញ្ហាខ្លះៗដែលពួកយើងបានជួបប្រទះ ហើយធ្វើម៉េចឲ្យគាត់ពន្យារពេលលើការចុះ សុំចុះឈ្មោះនៅតាមឃុំ - សង្កាត់មួយចំនួន ដែលអត្រាអ្នកចុះឈ្មោះក្រោម ៧០ភាគរយ ហើយការិយាល័យមួយចំនួនដែលមានអ្នកចុះឈ្មោះចាប់ពី ៥០នាក់ឡើងទៅ គាត់គួរតែពន្យារពេលទៅ ដើម្បីឲ្យអ្នកដែលគ្រប់អាយុចុះឈ្មោះ បានទៅចុះឈ្មោះឲ្យអស់ » ។
ក្រៅពីការស្នើឲ្យមានការពន្យារពេលកំណត់ចុះឈ្មោះបោះឆ្នោត អ្នកនាំពាក្យរបស់គណបក្សសង្គ្រោះជាតិ លោក យឹម សុវណ្ណ ឲ្យដឹងថា ក្រុមលោកក៏នឹងលើកយកសំណើមួយចំនួនផ្សេងទៀត ដើម្បីយកទៅជជែកផងដែរ ក្នុងនោះមានដូចជា ការស្នើឲ្យ គ.ជ.ប បង្កើនការផ្សព្វផ្សាយឲ្យបានទូលំទូលាយ ស្នើឲ្យបង្កើតការិយាល័យអចិន្ត្រៃយ៍សម្រាប់ពលរដ្ឋមកចុះឈ្មោះបោះឆ្នោត និងស្នើឲ្យការិយាល័យចល័ត ត្រូវចល័តទៅឲ្យដល់កន្លែងដាច់ស្រយាល។
គិតមកដល់ថ្ងៃទី២៤ វិច្ឆិកា លទ្ធផលបណ្ដោះអាសន្ននៃការចុះឈ្មោះបោះឆ្នោត បានបង្ហាញថា ពលរដ្ឋដែលបានចុះឈ្មោះបោះឆ្នោតមានប្រមាណ ៧លាន ៥សែននាក់ គឺស្នើនឹង ៧៧,៥៧% នៃអ្នកមានសិទ្ធិបោះឆ្នោតសរុបចំនួន ៩លាន ៦សែននាក់។ ក្នុងចំណោមរាជធានី-ខេត្តដែលពលរដ្ឋមិនទាន់មានអ្នកចុះឈ្មោះបោះឆ្នោតច្រើននោះ រួមមានរាជធានីភ្នំពេញ ខេត្តបាត់ដំបង ខេត្តបន្ទាយមានជ័យ ខេត្តកំពង់ចាម ខេត្តត្បូងឃ្មុំ និងខេត្តព្រៃវែង ជាដើម។
គណបក្សសង្គ្រោះជាតិ អះអាងថា ក្នុងចំណោមអ្នកដែលមិនទាន់បានចុះឈ្មោះបោះឆ្នោតប្រមាណ ១លាននាក់ គឺជាពលករចំណាកស្រុក។ លោក យឹម សុវណ្ណ មានសុទិដ្ឋិនិយមថា ពលករចំណាកស្រុកប្រមាណ ៩០ភាគរយ គឺជាអ្នកបោះឆ្នោតឲ្យគណបក្សសង្គ្រោះជាតិ។
ទាក់ទងនឹងពលករចំណាកស្រុកដែលមិនទាន់បានចុះឈ្មោះបោះឆ្នោតនេះដែរ លោក យឹម សុវណ្ណ ឲ្យដឹងថា ក្រុមលោកក៏នឹងលើកយកទៅជជែកជាមួយ គ.ជ.ប ផងដែរ៖ « យើងទៅជជែកជាមួយ សួរគាត់ថាមានមធ្យោបាយអី ? ដើម្បីឲ្យកម្មករហ្នឹងបានចុះឈ្មោះ។ បើឥឡូវហ្នឹងជិតផុតទៅហើយ ប៉ុន្តែពេលវេលាខាងមុខទៀតនោះ យើងអាចបង្កើតឲ្យមានការិយាល័យអចិន្ត្រៃយ៍ណាមួយ ដើម្បីចុះគាត់បានទេ ហើយតើគាត់គួររៀបចំឲ្យមានការិយាល័យចុះឈ្មោះបោះឆ្នោតតាមស្ថានទូតបានទេ ហ្នឹងគឺជាអ្វីដែលយើងចង់យកទៅជជែកជាមួយគាត់ » ។
ទាក់ទងនឹងការបោះឆ្នោតនេះដែរ នៅរសៀលថ្ងៃទី២៤ វិច្ឆិកា នេះ ក្រុមអង្គការសង្គមស៊ីវិល និងសមាជិកនៃសម្ព័ន្ធកំណែទម្រង់ការបោះឆ្នោត បានចេញសេចក្តីថ្លែងការណ៍រួមមួយស្នើទៅដល់ គ.ជ.ប ឲ្យបន្ថែមចំនួនថ្ងៃនៃការចុះឈ្មោះបោះឆ្នោត ដែលមិនប៉ះពាល់ដល់ការចាប់ផ្តើមប្រតិទិននៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ ដើម្បីឲ្យពលរដ្ឋដែលមិនទាន់បានចុះឈ្មោះបោះឆ្នោត អាចប្រើប្រាស់សិទ្ធិអនុវត្តសិទ្ធិពលរដ្ឋក្នុងការជ្រើសរើសថ្នាក់ដឹកនាំមូលដ្ឋាន។
ក្រៅពីនេះ ក្រុមអង្គការសង្គមស៊ីវិល ក៏អំពាវនាវឲ្យ គ.ជ.ប និងភាគីពាក់ព័ន្ធ អាជ្ញាធរ គណបក្សនយោបាយ អង្គការសង្គមស៊ីវិល និងសារព័ត៌មាន បន្ថែមការផ្សព្វផ្សាយដល់ពលរដ្ឋបន្ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។