ពិធីចុះហត្ថលេខានេះ នឹងធ្វើឡើងដើម្បីឲ្យគណបក្សនយោបាយទាំងអស់គោរពក្រមសីលធម៌ក្នុងការបោះឆ្នោត និងបង្ហាញព័ត៌មានដោយស្ម័គ្រចិត្តអំពីចំណូល និងចំណាយនៅក្នុងការឃោសនាបោះឆ្នោតរបស់បក្សនយោបាយ។ តែទោះជាយ៉ាងណា សង្គមស៊ីវិលបានកត់សម្គាល់ថា គណបក្សប្រជាជនកម្ពុជា កម្រចូលរួមក្នុងកម្មវិធីរបស់ពួកគេណាស់។
គណបក្សប្រជាជនកម្ពុជា បានបដិសេធមិនចូលរួមចុះហត្ថលេខាបង្ហាញពីការគោរពក្រមសីលធម៌ និងតម្លាភាពចំណូលចំណាយក្នុងរដូវឃោសនា ដែលរៀបចំដោយក្រុមអង្គការមិនមែនរដ្ឋាភិបាល ឃ្លាំមើលការបោះឆ្នោតនោះទេ។
មន្ត្រីច្បាប់នៃគណៈកម្មាធិការខុមហ្វ្រែល (Comfrel) លោក សួន យុធ្យា បានសម្ដែងការសោកស្ដាយចំពោះគណបក្សប្រជាជនកម្ពុជា ដែលមិនចូលរួមពិធីចុះហត្ថលេខានេះ។ លោកថា ពិធីនេះនឹងមានប្រយោជន៍ទៅដល់ម្ចាស់ឆ្នោតក្នុងការធ្វើសេចក្ដីសម្រេចចិត្តជ្រើសអ្នកតំណាងបក្ស ដែលខ្លួនពេញចិត្ត ដោយសារតែហ៊ានបើកចំហពីចំណូលចំណាយការឃោសនា ដើម្បីបញ្ជាក់ពីតម្លាភាពទៅដល់ម្ចាស់ឆ្នោត។
គណៈកម្មាធិការខុមហ្វ្រែល គ្រោងរៀបចំពិធីចុះហត្ថលេខាស្ដីពីការគោរពក្រមសីលធម៌ក្នុងការឃោសនាបោះឆ្នោត និងការបង្ហាញព័ត៌មានដោយស្ម័គ្រចិត្តអំពីចំណូល និងចំណាយនៅក្នុងយុទ្ធនាការបោះឆ្នោតរបស់គណបក្សនយោបាយ នៅថ្ងៃច័ន្ទ ទី២៤ មិថុនា។ ពិធីនេះមានគោលបំណងលើកកម្ពស់តម្លាភាព និងសុចរិតភាពនៅក្នុងការឃោសនាបោះឆ្នោត ដើម្បីចូលរួមចំណែកឲ្យការបោះឆ្នោតជ្រើសតាំងតំណាងរាស្ត្រនៅខែកក្កដា ខាងមុខប្រព្រឹត្តទៅដោយសេរី ត្រឹមត្រូវ និងមានតម្លាភាព។
ឆ្លើយតបបញ្ហានេះ សមាជិកគណៈកម្មាធិការអចិន្ត្រៃយ៍នៃគណៈកម្មាធិការកណ្ដាលនៃគណបក្សប្រជាជនកម្ពុជា លោក សាយ ឈុំ មានប្រសាសន៍ដោយខ្លីថា ទាល់តែមានការអនុញ្ញាតពីគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប ទើបអាចចូលរួមបាន។
ផ្ទុយទៅវិញ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានគាំទ្រការរៀបចំពិធីនេះ។
យ៉ាងណាក៏ដោយ អគ្គលេខាធិការគណបក្សហ៊្វុនស៊ិនប៉ិច លោក ញឹក ប៊ុនឆៃ ហាក់នៅមានភាពស្ទាក់ស្ទើរមិនប្រាកដប្រជាចំពោះការចូលរួមនេះនៅឡើយ។
ពិធីចុះហត្ថលេខាដូចគ្នានេះ គណៈកម្មាធិការខុមហ្វ្រែល ធ្លាប់បានរៀបចំធ្វើម្ដងរួចមកហើយកាលពីបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ២០១២។ អង្គការនេះបានអះអាងថា មានគណបក្សនយោបាយមួយចំនួន គោរពក្រមសីលធម៌ក្នុងការបោះឆ្នោត និងបានផ្ញើរបាយការណ៍ចំណូលចំណាយសម្រាប់ការឃោសនា ដើម្បីបង្ហាញឲ្យខុមហ្វ្រែល ផ្សព្វផ្សាយដល់ម្ចាស់ឆ្នោតទៀតផង។ ប៉ុន្តែ មានតែគណបក្សប្រជាជនកម្ពុជា ប៉ុណ្ណោះ ដែលមិនផ្ញើរបាយការណ៍ចំណូលចំណាយសម្រាប់ការឃោសនារបស់ខ្លួន។
សឹងតែរៀងរាល់លើកនៅពេលអង្គការសង្គមស៊ីវិលរៀបចំវេទិកាសាធារណៈ ធ្វើសមាជប្រជាជន កម្មវិធីដោះស្រាយបញ្ហាដីធ្លី បញ្ហាអំពើពុករលួយ និងកំណែទម្រង់ប្រព័ន្ធតុលាការជាដើម តំណាងពីគណបក្សប្រជាជនកម្ពុជា ពុំសូវបានចូលរួមនោះទេ។ តួយ៉ាងក្នុងអំឡុងពេលរដូវឃោសនារកសំឡេងឆ្នោតជិតមកដល់ អង្គការសង្គមស៊ីវិលរៀបចំវេទិកានយោបាយជាច្រើនលើក ក៏គេសង្កេតឃើញគណបក្សប្រជាជនកម្ពុជា មិនបានចូលរួមដែរ។
មន្ត្រីសម្របសម្រួលគម្រោងបណ្ដាញសិទ្ធិមនុស្សនៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត បានត្អូញថា លោកមានការលំបាកក្នុងការអញ្ជើញមន្ត្រីពីគណបក្សប្រជាជនកម្ពុជា មកជួបជាមួយពលរដ្ឋណាស់។ លោកថា អ្វីជាហេតុផលសំខាន់ លោកគិតថា ប្រហែលជាគណបក្សកាន់អំណាចមួយនេះមិនហ៊ានប្រឈមជាមួយពលរដ្ឋរងគ្រោះ។
អ្នកសម្របសម្រួលកម្ពុជា បណ្ដាញរួបរួមដើម្បីគណនេយ្យភាពសង្គមនៅអាស៊ីបូព៌ា និងប៉ាស៊ីហ្វិក លោក សន ជ័យ ថ្លែងថា ការសម្រេចមិនចូលរួមរបស់គណបក្សប្រជាជនកម្ពុជា គឺជាការបាត់បង់ប្រជាប្រិយភាពមួយ។ លោកថា ទំនងជាបក្សកាន់អំណាចមួយនេះ ខ្លាចមិនហ៊ានប្រឈមជាមួយពលរដ្ឋ និងសហគមន៍រងគ្រោះ ដោយសារតែការខកខានក្នុងការដោះស្រាយបញ្ហាដែលនៅសេសសល់ តាមរយៈការសន្យាខ្យល់ពីមួយអាណត្តិទៅមួយអាណត្តិនោះ។
សង្គមស៊ីវិលបានលើកឡើងថា ជាដំណោះស្រាយគណបក្សប្រជាជនកម្ពុជា គួរតែប្រើឱកាសនេះផ្លាស់ប្ដូរឥរិយាបថ ដោយងាកមកចូលរួមគ្រប់សកម្មភាពរបស់សង្គមស៊ីវិល ដើម្បីទាញយកសំឡេងគាំទ្រផ្ដល់ទំនុកចិត្តកាន់តែខ្លាំងឡើងថែមទៀតពីម្ចាស់ឆ្នោត ដែលម្ចាស់ឆ្នោតជាអ្នកសម្រេចជោគវាសនាប្រទេសជាតិនៅពេលដ៏ខ្លីខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។