មន្ត្រីក្រសួងការបរទេសកម្ពុជា ឲ្យដឹងថា មន្ត្រីទូតកម្ពុជា កំពុងពិភាក្សាជាមួយភាគីថៃ ដើម្បីស្នើជួយសម្រួលដល់ពលករខ្មែរដែលនៅសេសសល់ធ្វើការងារក្នុងប្រទេសថៃ ឲ្យក្លាយជាពលករស្របច្បាប់នាថ្ងៃអនាគត។
សម្រាប់មន្ត្រីសមាគមអាដហុក (adhoc) បានរិះគន់ទំនាក់ទំនងការទូតរបស់រដ្ឋាភិបាលកម្ពុជា ជាមួយថៃ ដែលឈានដល់ភាគីថៃ ចាប់បញ្ជូនពលករខ្មែរទាំងបង្ខំពេលនេះ។
មន្ត្រីក្រសួងការបរទេសកម្ពុជា ឲ្យដឹងថា មន្ត្រីការទូតកម្ពុជា កំពុងពិភាក្សាជាមួយភាគីរដ្ឋាភិបាលថៃ ដើម្បីស្នើផ្តល់ទិដ្ឋាការការងារជូនដល់ពលករខ្មែរចំនួន ៨.៣៦០នាក់ ដែលកំពុងធ្វើការនៅក្នុងប្រទេសថៃ បានបន្តការងារនាថ្ងៃអនាគត។
លោក កុយ គួង មន្ត្រីក្រសួងការបរទេសកម្ពុជា មានប្រសាសន៍នៅថ្ងៃសុក្រ ទី២០ ខែមិថុនា ថា កម្ពុជា បានផ្ញើកំណត់ទូតជាបន្តបន្ទាប់ជូនស្ថានទូតថៃ ប្រចាំកម្ពុជា ដើម្បីស្នើឲ្យថៃ ជួយផ្តល់ទិដ្ឋាការការងារដល់ពលករខ្មែរកំពុងធ្វើការងារក្នុងប្រទេសថៃ។
លោកបន្តថា តាមរយៈ លោកស្រី អ៊ាត សោភា ឯកអគ្គរាជទូតកម្ពុជា ប្រចាំប្រទេសថៃ គឺបានជួបពិភាក្សាគ្នាជាមួយមន្ត្រីក្រសួងការបរទេសថៃ លើករណីថៃ បញ្ជូនពលករខ្មែរមកកម្ពុជា ជាបន្តបន្ទាប់។ ក្នុងនោះ កម្ពុជា បានស្នើដល់ភាគីថៃ មុននឹងបញ្ជូនពលករខ្មែរឲ្យវិលមកកម្ពុជា ត្រូវផ្តល់ដំណឹងជូនរដ្ឋាភិបាលកម្ពុជា ជាមុន៖ «ពលករដែលជ្រើសរើសពីខ្មែរយើងតាមរយៈក្រុមហ៊ុនស្របច្បាប់ ហើយគេដាក់ទៅគេមានលិខិតឆ្លងដែនហើយ តែគេសុំទិដ្ឋាការការងារពីស្ថានទូតថៃ»។
រហូតមកដល់ពេលនេះ អាជ្ញាធរយោធាថៃ បានចាប់បញ្ជូនពលករខ្មែរចំណាកស្រុកធ្វើការនៅប្រទេសថៃ មានចំនួនជាង ២សែននាក់ហើយឲ្យវិលមកកម្ពុជា វិញ។
ទាក់ទងបញ្ហានេះ សមាគមអាដហុក មានរៀបចំសន្និសីទកាសែតស្តីអំពីសកម្មភាពរបស់អាជ្ញាធរយោធាថៃ ចាប់បញ្ជូនពលករខ្មែរដោយបង្ខំ ឲ្យវិលមកកម្ពុជា ក្នុងរយៈពេលប៉ុន្មានថ្ងៃមកនេះ។
លោក ចាន់ សុវ៉េត អនុប្រធានផ្នែកស៊ើបអង្កេតសមាគមអាដហុក ឲ្យដឹងថា សន្និសីទនេះដើម្បីផ្តល់ឱកាសជូនសាក្សីជាពលករខ្មែរមួយចំនួនដែលថៃ ចាប់បញ្ជូនទាំងបង្ខំឲ្យបង្ហាញពីស្ថានភាពជាក់ស្តែង និងទុក្ខលំបាក ដែលពួកគេបានជួបប្រទះ។ មន្ត្រីសង្គមស៊ីវិលរូបនេះ បានរិះគន់ទំនាក់ទំនងការទូតរបស់រដ្ឋាភិបាលកម្ពុជា ជាមួយថៃ ថាមានភាពកម្សោយ ទើបភាគីថៃ ចាប់បញ្ជូនពលករខ្មែរទាំងបង្ខំឲ្យវិលមកកម្ពុជា ពេលនេះ៖ «សង្គមស៊ីវិលយើងៗមើលឃើញភាពជាក់ស្តែង នៅតាមប្រជាពលរដ្ឋដែលថៃ បានបង្ខំឲ្យវិលត្រឡប់មកវិញនេះ គឺអាជ្ញាធរថៃ គាត់ធ្វើឡើងហាក់បីអត់បានទំនាក់ទំនងជាមួយបណ្ដាប្រទេសសាមីទេ។ ឧទាហរណ៍ប្រទេសកម្ពុជា ភូមា ប្រទេសឡាវ ក្តី គឺអត់បានទំនាក់ទំនងទេ។ ហើយបើសិនជាគាត់ចង់បញ្ជូនពលករខ្មែរចំណាកស្រុកទាំងអស់ហ្នឹងមកវិញ ក៏គាត់ត្រូវធ្វើទំនាក់ទំនងដើម្បីឲ្យប្រទេសសាមីត្រៀមខ្លួនទទួល»។
ត្រង់ចំណុចនេះ លោក កុយ គួង មន្ត្រីនាំពាក្យក្រសួងការបរទេសកម្ពុជា បញ្ជាក់ថា ករណីនេះ កម្ពុជា បានផ្ញើកំណត់ទូតជាបន្តបន្ទាប់ទៅស្ថានទូតថៃ ប្រចាំកម្ពុជា ដើម្បីស្នើសុំឲ្យថៃ ជួយសម្រួលដល់ពលករខ្មែរដែលកំពុងធ្វើការខុសច្បាប់ ឲ្យមានទិដ្ឋាការការងារស្របច្បាប់នាថ្ងៃអនាគត។
លោកបន្តថា ជាការឆ្លើយតបសំណើរបស់ក្រសួងការបរទេសកម្ពុជា ភាគីថៃ ឆ្លើយតបថា នឹងបញ្ជាឲ្យស្ថានទូតថៃ ប្រចាំកម្ពុជា ផ្តល់ទិដ្ឋាការការងារដល់ពលករខ្មែរតាមសំណើកម្ពុជា ឲ្យបានឆាប់។ បន្ថែមលើនេះ កម្ពុជា ក៏បានសំណូមពរឲ្យភាគីថៃ ផ្តល់ព័ត៌មានអំពីពេលវេលា និងច្រកទ្វារព្រំដែននានា ដែលថៃ ត្រៀមបញ្ជូនពលករខ្មែរមកកម្ពុជា មកស្ថានទូតកម្ពុជា បានដឹងជាមុន ដើម្បីងាយក្នុងការគ្រប់គ្រង និងជួយដល់ពលករខ្មែរចំណាកស្រុកខុសច្បាប់ទាំងនោះ។
ទាក់ទិនបញ្ហានេះដែរ សមាគមអាដហុក នៅល្ងាចថ្ងៃសុក្រ ទី២០ ខែមិថុនា នេះ បានបើកធ្វើសន្និសីទកាសែតជាប្រញាប់មួយ ជុំវិញស្ថានភាពថៃ ចាប់បញ្ជូនពលករខ្មែរចំណាកស្រុកឲ្យវិលមកកម្ពុជា ទាំងតក់ក្រហល់ក្នុងប៉ុន្មានថ្ងៃមកនេះ។
សន្និសីទកាសែតដែលដឹកនាំដោយ លោក ធន សារាយ ប្រធានសមាគមអាដហុក បានសម្ដែងការខកចិត្តពីរបៀបនៃការបញ្ជូនពលករចំណាកស្រុកខ្មែរចេញពីប្រទេសថៃ ដែលពុំមានលក្ខណៈស៊ីវិល័យ អមនុស្សធម៌ នាំឲ្យមានការរំលោភធ្ងន់ធ្ងរដល់សិទ្ធិរបស់ពលករចំណាកស្រុកទាំងនោះ។ សមាគមអាដហុក បានចាត់ទុករបៀបនៃការបណ្ដេញពលករចំណាកស្រុកពីប្រទេសថៃ ពេលនេះ ថាធ្វើឡើងដោយមានការបំភិតបំភ័យពីអាជ្ញាធរយោធាថៃ ធ្វើឲ្យមានការតក់ស្លុតដល់ពលករខ្មែរជាទូទៅ មានដូចជា ពលករខ្មែរទាំងនោះរងនូវការគំរាមកំហែង បំបាក់ស្មារតី បំភិតបំភ័យ ធ្វើទារុណកម្ម និងការប្រើអំពើហិង្សាផ្សេងៗទៀត នាំឲ្យប៉ះពាល់ដល់អាយុជីវិតពលករកម្ពុជា មួយចំនួន។ ហើយថា ការបញ្ជូននេះ គឺធ្វើឡើងដូចសត្វធាតុ។ ជាងនេះ សមាគមអាដហុក ក៏បានសម្ដែងការសោកស្ដាយ ដែលប្រទេសទាំង១០ ក្នុងតំបន់អាស៊ីអាគ្នេយ៍ ដែលត្រៀមចូលជា សហគមន៍តែមួយ និងមានវាសនាតែមួយ នៅឆ្នាំ២០១៥ ខាងមុខ បែរជាមានរដ្ឋដែលជាសមាជិកអាស៊ានមួយ បានរំលោភសិទ្ធិយ៉ាងធ្ងន់ធ្ងរទៅលើប្រជាជននៃរដ្ឋផ្សេងទៀត នៃសហគមន៍អាស៊ានបែបនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។