អ្នកនាំពាក្យក្រសួងការបរទេសជប៉ុន បានចេញសេចក្ដីថ្លែងការណ៍របស់ខ្លួនមួយ នៅថ្ងៃទី៨ មករា ស្ដីពីការប៉ះទង្គិចគ្នារវាងបាតុករ និងអាជ្ញាធរក្នុងប្រទេសកម្ពុជា។
សេចក្ដីថ្លែងការណ៍ដែលវិទ្យុអាស៊ីសេរី ទទួលបាននៅថ្ងៃទី៩ មករា បានសរសេរនៅចំណុចទី១ ថា ជប៉ុន ព្រួយបារម្ភយ៉ាងខ្លាំងចំពោះស្ថានការណ៍នៅក្នុងប្រទេសកម្ពុជា ដោយកម្លាំងសន្តិសុខ និងបាតុករប៉ះទង្គិចគ្នាក្នុងវិវាទការងារ នៅថ្ងៃទី៣ មករា ដែលបណ្ដាលឱ្យមានអ្នកស្លាប់ និងរបួសជាច្រើននាក់។
ចំណុចទីពីរ ក្រសួងការបរទេសជប៉ុន លើកទឹកចិត្តម្ដងទៀតដល់គ្រប់ភាគីទាំងអស់ឱ្យចៀសវាងការប្រើប្រាស់អំពើហិង្សា ហើយដោះស្រាយបញ្ហាដោយសន្តិវិធី។ ប្រទេសជប៉ុន សង្ឃឹមយ៉ាងមុតមាំថា កិច្ចពិភាក្សារវាងគណបក្សកាន់អំណាច និងគណបក្សប្រឆាំង ពាក់ព័ន្ធនឹងលទ្ធផលបោះឆ្នោតនៅខែកក្កដា ឆ្នាំមុននេះ នឹងត្រូវបានបន្តឡើងវិញឱ្យទាន់ពេលវេលា ដើម្បីធ្វើឱ្យស្ថានការណ៍មានភាពប្រក្រតីឡើងវិញឱ្យបានឆាប់។
ចំណុចទីបី នៃសេចក្ដីថ្លែងការណ៍បានសរសេរថា ប្រទេសជប៉ុន នឹងបន្តតាមដានយ៉ាងយកចិត្តទុកដាក់ទៅលើស្ថានការណ៍ក្នុងប្រទេសកម្ពុជា ដោយរួមមានទស្សនវិស័យក្នុងការធានាសុវត្ថិភាពរបស់ក្រុមហ៊ុន និងជនជាតិជប៉ុន។
កាលពីថ្ងៃទី៣ មករា កងកម្លាំងសន្តិសុខប្រដាប់អាវុធរដ្ឋាភិបាល បើកយុទ្ធនាការបង្ក្រាបក្រុមបាតុករនៅតាមផ្លូវវ៉េងស្រេង ក្នុងសង្កាត់ស្ទឹងមានជ័យ រាជធានីភ្នំពេញ ដោយបាញ់សម្លាប់បាតុករ ៤នាក់ ហើយជាច្រើននាក់ទៀតរបួស និងចាប់ខ្លួន។
មួយថ្ងៃបន្ទាប់ពីការស្លាប់បាតុករទាំងនោះ គឺនៅថ្ងៃទី៤ មករា រដ្ឋមន្ត្រីការបរទេសអាល្លឺម៉ង់ លោក ហ្វ្រែង វ៉លធើរ ស្តេនម៉េយើរ (Frank-Walter Steinmeier) បានរិះគន់ និងថ្កោលទោសចំពោះសកម្មភាពរបស់អាជ្ញាធរកម្ពុជា ដែលបង្កសោកនាដកម្មដោយវាយ និងបាញ់សម្លាប់ក្រុមកម្មករតវ៉ា ខណៈដែលពួកគេងើបទាមទារសិទ្ធិរបស់គេ។ ការថ្លែងរបស់លោក គឺធ្វើឡើងតាមសារព័ត៌មានអនឡាញមួយឈ្មោះ ស្ពីហ្គែល (Spiegel Online)។ លោកបន្តថា ការឆ្លើយតបដោយកម្លាំងរបស់កងសន្តិសុខ គឺមិនសមស្របទេ ហើយការប្រើកម្លាំង ក៏មិនមែនជាចម្លើយសម្រាប់ជម្លោះសេដ្ឋកិច្ច និងសង្គមដែរ។ លោក ហ្វ្រែង ថ្លែងទៀតថា អ្នកដែលទទួលខុសត្រូវ ត្រូវតែគោរពកាតព្វកិច្ចអន្តរជាតិ និងទប់កុំប្រើអំពើហិង្សា។ លោកថា ជម្លោះនៅប្រទេសកម្ពុជា ក៏ទាក់ទងនឹងប្រទេសអាល្លឺម៉ង់ ដែរ។
នៅថ្ងៃទី៤ មករា សហភាពអឺរ៉ុប ក៏បានសម្ដែងក្ដីព្រួយបារម្ភដែរ និងសោកស្ដាយលើការប្រើប្រាស់កម្លាំងហួសហេតុ និងគ្មានសមាមាត្រដោយកងសន្តិសុខ ដែលបណ្ដាលឱ្យស្លាប់។ សហភាពអឺរ៉ុប អំពាវនាវដល់ភាគីខ្វែងគំនិតគ្នាឱ្យឈប់ប្រើអំពើហិង្សា និងវិលទៅតុចរចា រកដំណោះស្រាយការខ្វែងគំនិតគ្នា។
កាលពីថ្ងៃច័ន្ទ ទី៦ មករា សហរដ្ឋអាមេរិក បានថ្កោលទោសចំពោះអំពើហិង្សានោះ។ មន្ត្រីនាំពាក្យស្ថានទូតសហរដ្ឋអាមេរិក ប្រចាំនៅកម្ពុជា លោក សន ម៉ាឃីនតូស (SEAN McIntosh) ថ្លែងថា សហរដ្ឋអាមេរិក សោកស្ដាយជាខ្លាំងចំពោះការបាត់បង់ជីវិតក្នុងការប៉ះទង្គិចដោយហិង្សារវាងបាតុករ និងកងសន្តិសុខ កាលពីសប្ដាហ៍មុននេះ និងថ្កោលទោសទាំងស្រុងចំពោះការប្រើប្រាស់មធ្យោបាយហិង្សាដោះស្រាយបញ្ហា ហើយគូសបញ្ជាក់ថា កងកម្លាំងសន្តិសុខជាអ្នកទទួលខុសត្រូវក្នុងការទប់ចិត្ត៖ «យើងសុំជំរុញរាជរដ្ឋាភិបាលកម្ពុជា ឱ្យពិចារណាឡើងវិញអំពីជំហររបស់ខ្លួន ហើយជាថ្មីម្ដងទៀត យើងសុំរាជរដ្ឋាភិបាលកម្ពុជា សម្រួលដល់ការអនុវត្តសិទ្ធិសេរីភាពនៃការបញ្ចេញមតិដោយសន្តិវិធី នៃការជួបប្រជុំ ដូចដែលអ្វីដែលប្រព្រឹត្តទៅគួរឱ្យសោកសង្រេងក្នុងរយៈពេលចុងក្រោយនេះ»។
លោក សន ម៉ាឃីនតូស បញ្ជាក់ថា ស្ថានទូតសហរដ្ឋអាមេរិក ប្រចាំនៅកម្ពុជា បានប្រាស្រ័យទាក់ទងតំណាងគ្រប់ភាគីនយោបាយ ឱ្យអនុវត្តការទប់ចិត្តឱ្យខ្ពស់បំផុត គោរពនីតិរដ្ឋ។ ការតវ៉ាដោយសន្តិវិធី និងការសម្ដែងមតិដោយសេរី គឺជាចំណុចសំខាន់នៃលទ្ធិប្រជាធិបតេយ្យ និងជាដំណោះស្រាយនៃការចរចា។ លោកក៏សុំអំពាវនាវឱ្យរដ្ឋាភិបាល និងសហជីពកម្មករ ធ្វើការរួមគ្នាដោះស្រាយបញ្ហារបស់កម្មករ។
ដោយឡែកស្ថានទូតមួយចំនួនទៀតប្រចាំនៅប្រទេសកម្ពុជា យើងមិនទាន់ឃើញមានប្រតិកម្មអ្វីទេ ទាក់ទងនឹងអំពើហិង្សានោះ ដោយស្ថានទូតខ្លះមិនទាន់បានឆ្លើយតបអ៊ីមែល និងខ្លះទៀត មិនអាចទាក់ទងបាន។
ស្ថានទូតហ្វីលីពីន ឱ្យដឹងថា ខ្លួនមិនមានប្រតិកម្មទេ ហើយនឹងមិនមានចេញសេចក្ដីថ្លែងការណ៍អ្វីដែរជុំវិញបញ្ហាអំពើហិង្សានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។