ក្រុមអង្គការសង្គមស៊ីវិល ដែលតាមដានជុំវិញប្រព័ន្ធបោះឆ្នោតនៅកម្ពុជា ប្រតិកម្មលើសេចក្ដីព្រាងច្បាប់ស្ដីពីការបោះឆ្នោតថ្មី ត្រង់ចំណុចហាមឃាត់មិនឲ្យអង្គការសង្គមស៊ីវិលបញ្ចេញមតិយោបល់រិះគន់ប្រឆាំងគោលនយោបាយរបស់គណបក្សក្នុងថ្ងៃឃោសនាបោះឆ្នោត។ បញ្ហានេះ សង្គមស៊ីវិលចាត់ទុកថា ជាសេចក្ដីព្រាងមួយនាំឲ្យប៉ះពាល់ដល់សេរីភាពនៃការបញ្ចេញមតិធ្ងន់ធ្ងរ។
ក្រុមអង្គការសង្គមស៊ីវិលចាត់ទុកថា ជាការពិភាក្សាកែទម្រង់សេចក្ដីព្រាងច្បាប់បោះឆ្នោតរបស់ក្រុមការងារគណបក្សសង្គ្រោះជាតិ និង គណបក្សប្រជាជនកម្ពុជា បច្ចុប្បន្ននេះ ហាក់ដូចជារុញច្រានស្ថានការណ៍ប្រទេសកម្ពុជា ឲ្យដើរថយក្រោយទៅវិញ។
ក្នុងបទអន្តរាគមន៍របស់លោក គួយ ប៊ុនរឿន សហប្រធាននៃក្រុមចរចាមកពីខាងគណបក្សសង្គ្រោះជាតិ ឲ្យដឹងកាលពីព្រឹកថ្ងៃទី២០ មករា ថា ថ្វីបើកិច្ចពិគ្រោះយោបល់លើសេចក្ដីព្រាងច្បាប់ គ.ជ.ប ថ្មីនេះ កំពុងតែដំណើរក៏ដោយ ក៏ប៉ុន្តែខ្លឹមសារច្បាប់ជាច្រើន គណបក្សនយោបាយ នៅមិនទាន់រកចំណុចរួមបាននៅឡើយទេ។ បើតាមលោក គួយ ប៊ុនរឿន ខ្លឹមសារដែលបន្តខ្វែងគំនិតគ្នានៅពេលនេះ រួមមាន ថ្ងៃឃោសនាបោះឆ្នោត បញ្ជីចុះឈ្មោះបោះឆ្នោត កម្រិតនៃប្រព័ន្ធផ្សព្វផ្សាយ តួនាទីរបស់កងកម្លាំងប្រដាប់អាវុធ និងមន្ត្រីតុលាការ ជាពិសេសនោះ ចុងក្រោយ គឺខ្លឹមសារនៃច្បាប់រឹតត្បិតមិនឲ្យអង្គការសង្គមស៊ីវិល រិះគន់លើគោលនយោបាយរបស់គណបក្សក្នុងថ្ងៃឃោសនាបោះឆ្នោត។
លោក ព្រាប កុល នាយកប្រតិបត្តិអង្គការតម្លាភាពកម្ពុជា ចាត់ទុកថា ការហាមប្រាមមិនឲ្យអង្គការមិនមែនរដ្ឋាភិបាល រិះគន់គោលនយោបាយរបស់គណបក្សក្នុងថ្ងៃឃោសនាបោះឆ្នោត គឺជាការបង្រួមសេរីភាពបញ្ចេញមតិ។ ថ្លែងក្នុងវេទិកាតុមូលស្ដីពីការឃោសនាបោះឆ្នោត និងអនុសាសន៍នៅសណ្ឋាគារ អ៊ីមភឺរៀល (Imperial) លោក ព្រាប កុល និយាយថា បើធ្វើអ្នកនយោបាយ ហើយខ្លាចការរិះគន់ គួរឈប់ធ្វើនយោបាយហើយទៅប្រកបអាជីវកម្មវិញល្អជាង៖ «អ្នកនយោបាយណាដែលរសើបខ្លាំងមិនអាចទទួលយកការរិះគន់ហ្នឹងបានទេ។ ខ្ញុំថាគួរតែកុំធ្វើអ្នកនយោបាយ»។
ក្រុមការងារចរចារបស់គណបក្សនយោបាយទាំងពីរឲ្យដឹងថា កិច្ចការដែលខ្វែងគំនិតគ្នាមិនអាចរកចំណុចរួមបាន គឺទុកឲ្យមេដឹកនាំធ្វើសេចក្ដីសម្រេចចុងក្រោយ។
ពាក់ព័ន្ធរឿងនេះ លោកនាយករដ្ឋមន្ត្រី ហ៊ុន សែន ព្រមានកាលពីទី១៩ មករា ថា បើចំណុចណាមួយ ក្រុមការងារជំនាញនៅតែមិនចុះសម្រុងនឹងគ្នាទេទុកកិច្ចការនេះឲ្យសភាជាអ្នកអនុម័តវិញ។ លោកបន្តថា លោកលែងខ្វល់រឿងច្បាប់បោះឆ្នោតថ្មីនេះហើយ៖ «មិនទាន់កាន់អំណាចផង គេធ្វើប៉ុណ្ណឹងទៅហើយ ផ្ដាច់ការប៉ុណ្ណឹងទៅហើយ ទម្រាំតែកាន់អំណាចតើគេធ្វើអីទៀត? សំឡេងយើងមានច្រើននៅក្នុងសភា អត់មានអីត្រូវញ៉ាក។ អាច្បាប់បោះឆ្នោតមិនបោះឆ្នោត អាណាធ្វើទាន់មិនទាន់ក៏ហីទៅ»។
លោក គល់ បញ្ញា នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (Comfrel) យល់ឃើញថា ការបង្កើតគណៈកម្មការដែលមានផលប្រយោជន៍រៀងៗខ្លួននេះ នឹងពុំមែនជាយន្តការដោះស្រាយល្អប្រសើរឡើយ។ លោកថ្លែងបន្តថា ជាគំរូនៅក្នុងប្រទេសដែលប្រកាន់លទ្ធិប្រជាធិបតេយ្យពេញលេញ ជាមធ្យោបាយការបង្កើតគណៈកម្មការនេះ គឺគេទាមទារឲ្យមានការចូលរួមពីអ្នកជំនាញការឯករាជ្យបន្ថែមទៀត៖ «នៅប្រទេសច្រើនណាស់ដែលខ្ញុំមានពិសោធន៍ ដែលខ្ញុំធ្លាប់ទៅចូលរួមសង្កេតនឹងគេ។ គេបង្កើតគណៈកម្មការចម្រុះមួយដែលមានភាគីច្រើន»។
ថ្លែងក្នុងវេទិកាតុមូលដែលរៀបចំដោយសម្ព័ន្ធកំណែទម្រង់ការបោះឆ្នោត ឬហៅកាត់ថា អឺរ៉ា (ERA) លោក គួយ ប៊ុនរឿន អះអាងថា បើទោះភាគីចរចាទាំងពីរនៅបន្តខ្វែងគំនិតគ្នាលើខ្លឹមសារនៃសេចក្ដីព្រាងច្បាប់ស្ដីពីការបោះឆ្នោតនេះក៏ដោយ ក៏សេចក្ដីព្រាងច្បាប់ គ.ជ.ប ថ្មីនេះ និងសេចក្ដីព្រាងច្បាប់ស្ដីពីការបោះឆ្នោត នឹងត្រូវបញ្ចប់កិច្ចពិគ្រោះយោបល់របស់ខ្លួនក្នុងខែកុម្ភៈ ដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។