គណបក្សប្រជាធិបតេយ្យមូលដ្ឋាន បើកសមាជនៅឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី ដើម្បីបោះឆ្នោតជ្រើសរើសថ្នាក់ដឹកនាំបក្សនៅមូលដ្ឋាននេះលើកដំបូង។ សមាជនេះធ្វើឡើងដើម្បីសម្រិតសម្រាំងបេក្ខភាពដឹកនាំនៅមូលដ្ឋាន និងត្រៀមឈរឈ្មោះបោះឆ្នោតក្រុមប្រឹក្សាឃុំ-សង្កាត់ឆ្នាំ២០១៧ ខាងមុខនេះ។
មន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន រំពឹងថានឹងទទួលបានសន្លឹកឆ្នោតគាំទ្រពីពលរដ្ឋនៅឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី នាពេលបោះឆ្នោតជ្រើសរើសក្រុមប្រឹក្សាឃុំនាអាណត្តិបោះឆ្នោតឆ្នាំ២០១៧ ខាងមុខនេះ។
ការរំពឹងនេះ កើតមានឡើងខណៈគណបក្សប្រជាធិបតេយ្យមូលដ្ឋាន បើកសមាជលើកដំបូងរបស់ខ្លួននៅភូមិឡំ ឃុំប៉ក់ញ៉ៃ នៅថ្ងៃទី២៤ ខែកញ្ញា ដោយមានប្រជាពលរដ្ឋជាង ១០០នាក់សម្រេចជ្រើសរើសសមាសភាពថ្នាក់ដឹកនាំគណៈកម្មការប្រតិបត្តិឃុំប៉ក់ញ៉ៃ ចំនួន ៤រូប ឲ្យធ្វើសកម្មភាពបម្រើរាស្ត្រចាប់ពីពេលនេះតទៅ។
ប្រធានគណបក្សប្រជាធិបតេយ្យមូលដ្ឋាន លោក យ៉េង វីរៈ បញ្ជាក់ថា ប្រជាពលរដ្ឋនៅមូលដ្ឋានផ្ទាល់ គឺជាអ្នកបោះឆ្នោតជ្រើសរើសមន្ត្រីបក្សថ្នាក់មូលដ្ឋានដែលពួកគេពេញចិត្ត ដើម្បីដឹកនាំប្រជាពលរដ្ឋ និងត្រៀមបោះឆ្នោតប្រកួតប្រជែងជាមួយគណបក្សផ្សេងទៀតនៅមូលដ្ឋាន៖ « យើងយកគុណភាពបក្សដែលមានប្រជាធិបតេយ្យផ្ទៃក្នុងបក្សទៅប្រកួតប្រជែង។ យើងយកគោលនយោបាយល្អសម្រាប់អភិវឌ្ឍនៅមូលដ្ឋានទៅប្រកួតប្រជែង។ ចុងក្រោយយើងកំពុងរៀបឲ្យមានមនុស្សល្អៗចេញមុខប្រកួតប្រជែង »។
គណបក្សប្រជាធិបតេយ្យមូលដ្ឋាន បង្កើតឡើងតាំងពីឆ្នាំ២០១៥។ រហូតបច្ចុប្បន្ន គណបក្សនេះបានធ្វើសមាជជ្រើសរើសថ្នាក់ដឹកនាំនៅមូលដ្ឋានបាន ១៥ឃុំនៅក្នុងខេត្តចំនួន៦។ ដោយឡែកឃុំប៉ក់ញ៉ៃ គឺជាឃុំទី១៦ ដែលគណបក្សនេះបានបង្កើតរចនាសម្ព័ន្ធដឹកនាំបក្ស ដែលជ្រើសរើសដោយប្រជាពលរដ្ឋនៅមូលដ្ឋាន។
ប្រធានគណៈកម្មការប្រតិបត្តិគណបក្សប្រជាធិបតេយ្យមូលដ្ឋាន ឃុំប៉ក់ញ៉ៃ ដែលប្រជាពលរដ្ឋជាង ៧០នាក់ក្នុងចំណោមប្រជាពលរដ្ឋជាង ១០០នាក់បោះឆ្នោតជ្រើសរើសនៅថ្ងៃទី២៤ ខែកញ្ញា លោក សេវ ស្វាន់ កត់សម្គាល់ថា កន្លងទៅ គណបក្សនយោបាយជាប់ឆ្នោតមិនបានអនុវត្តតាមការឃោសនារបស់ខ្លួននាអំឡុងពេលឃោសនារកសំឡេងឆ្នោត ជាពិសេសការសន្យាលុបបំបាត់បញ្ហាអសកម្មដូចជាការកាប់បំផ្លាញព្រៃឈើ ទំនាស់ដីធ្លី និងជាពិសេសបញ្ហាព្រំដែនជាមួយប្រទេសជិតខាង។ លោកថា ប្រសិនប្រជាពលរដ្ឋបោះឆ្នោតជ្រើសរើសបេក្ខភាពគណបក្សប្រជាធិបតេយ្យមូលដ្ឋាន ជាប្រធានក្រុមប្រឹក្សាឃុំប៉ក់ញ៉ៃ នាអាណត្តិបោះឆ្នោតឃុំ-សង្កាត់ខាងមុខនេះ មន្ត្រីគណបក្សនឹងបំពេញតួនាទីបម្រើរាស្ត្រពិតប្រាកដ៖ « យើងមកបោះឆ្នោតឲ្យមូលដ្ឋាន យើងមានអនាគតទៅមុខដូចជាការពារដីធ្លី ធនធានមនុស្សជួយបម្រើប្រជាពលរដ្ឋ »។
កាលពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំ២០១២ គណបក្សប្រជាជនកម្ពុជា និងគណបក្ស សម រង្ស៊ី ឈ្នះឆ្នោតក្នុងតំណែងក្រុមប្រឹក្សាឃុំប៉ក់ញ៉ៃ ចំនួន ៥រូប ក្នុងនោះគណបក្សប្រជាជនកម្ពុជា ទទួលបានតំណែងមេឃុំជំទប់ទី១ និងជាសមាជិកក្រុមប្រឹក្សាឃុំ ចំណែកគណបក្ស សម រង្ស៊ី ទទួលបានតំណែងជំទប់ទី២ និងសមាជិកក្រុមប្រឹក្សាឃុំ។
លេខាគណៈកម្មាធិការ ខុមហ្វ្រែល (COMFREL) លោក ជួន ភិនដារ៉ា ថ្លែងស្វាគមន៍ចំពោះគណបក្សប្រជាធិបតេយ្យមូលដ្ឋាន ដែលដាក់បេក្ខជនប្រកួតប្រជែងដឹកនាំនៅមូលដ្ឋាន។ លោកថា មានគណបក្សនយោបាយច្រើនចូលរួមការបោះឆ្នោត បង្ហាញឲ្យឃើញថាកម្ពុជា កំពុងដើរតាមរបបដឹកនាំបែបលទ្ធិប្រជាធិបតេយ្យស្របតាមរដ្ឋធម្មនុញ្ញជាតិ៖ « យកស្នាដៃដើម្បីកសាងជាតិទាំងអស់គ្នា ពេលណាដែលប្រជាពលរដ្ឋមានបញ្ហាកើតឡើង បើមានគណបក្សច្រើនគឺជាការល្អ ព្រោះរបបសេរីពហុបក្សមានបក្សច្រើនទាល់តែមានការប្រកួតប្រជែង »។
តាមការគ្រោងទុក គណបក្សប្រជាធិបតេយ្យមូលដ្ឋាន នឹងរៀបចំសមាជបង្កើតគណៈកម្មការប្រតិបត្តិថ្នាក់ឃុំ-សង្កាត់ឲ្យបាន ១០០ឃុំមុនការបោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំ២០១៧។ គណបក្សនេះប្ដេជ្ញាថានឹងខិតខំធ្វើឲ្យប្រជាពលរដ្ឋមានជំនឿ និងបោះឆ្នោតជូនបេក្ខភាពគណបក្សនេះជាប់ឆ្នោតប្រធានក្រុមប្រឹក្សាឃុំ-សង្កាត់ឲ្យបាន២០៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។