ប្រធានស្ដីទីគណបក្សសង្គ្រោះជាតិ លោក កឹម សុខា ជួបជជែកគ្នាជាសម្ងាត់ពីរដាច់ដោយឡែកពីគ្នាជាមួយលោកនាយករដ្ឋមន្ត្រី ហ៊ុន សែន និងរដ្ឋមន្ត្រីក្រសួងមហាផ្ទៃ លោក ស ខេង នាវិមានរដ្ឋសភា នៅព្រឹកថ្ងៃទី៧ ធ្នូ ខណៈសភាពេញអង្គ កំពុងដំណើរប្រជុំជជែកលើច្បាប់ស្ដីពីការទូទាត់ថវិកាទូទៅរបស់រដ្ឋ សម្រាប់ការគ្រប់គ្រងឆ្នាំ២០១៥។
ក្នុងជំនួបសម្ងាត់នេះ លោក កឹម សុខា បានជួបជជែកជាមួយលោក ហ៊ុន សែន ជិត១ម៉ោង។ បន្ទាប់មកលោក កឹម សុខា ក៏មានជំនួបជាមួយលោក ស ខេង។
យ៉ាងណាក៏ដោយ ការប្រជុំសម្ងាត់ទាំងពីរលើនេះ ពុំទាន់ដឹងជជែកលើបញ្ហាអ្វីនោះទេ ក្រោយពេលដែលលោក ហ៊ុន សែន ទើបតែពន្យល់នៅក្នុងកិច្ចប្រជុំរដ្ឋសភា អំពីតួនាទីថ្មីរបស់លោក កឹម សុខា ក្នុងរដ្ឋសភា។
លោក ហ៊ុន សែន អះអាងថា លោក កឹម សុខា ទទួលតួនាទីប្រធានក្រុមតំណាងរាស្ត្រភាគតិចក្នុងសភា ជំនួសប្រធានគណបក្សសង្គ្រោះជាតិ លោក សម រង្ស៊ី និងជាដៃគូសន្ទនាជាមួយនឹងលោក។
ចំណែកលោក កឹម សុខា មិនបានឆ្លើយតបយ៉ាងណានឹងការលើកឡើងរបស់លោក ហ៊ុន សែន ទេ ដោយលោកគ្រាន់តែលើកឡើងថា លោកមិនចង់ឲ្យបក្សនយោបាយជាប់ឆ្នោតទាំងពីរនេះ ខ្វែងគំនិតគ្នាទេ គឺចង់ឲ្យបក្សទាំងពីរជជែកដោះស្រាយវិបត្តិនយោបាយសម្រាប់ជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។