យុវជនមួយក្រុមដែលអះអាងថា ខ្លួនជានិស្សិតមកពីសកលវិទ្យាល័យនានា ប្ដឹងស្ត្រីដែលរងការចោទប្រកាន់ពាក់ព័ន្ធរឿងរ៉ាវស្នេហាជាមួយលោក កឹម សុខា កញ្ញា ខុម ចាន់តារាទី ហៅស្រីមុំ ពីបទឆបោក។
តំណាងក្រុមយុវជនទាំងនោះលោក ស្រី ចំរើន អះអាងដូច្នេះ ក្នុងសិក្ខាសាលារបស់ខ្លួននៅរសៀលថ្ងៃទី១១ មីនា ដោយចោទប្រកាន់កញ្ញា ខុម ចាន់តារាទី ថាឆបោកមិនទទួលស្គាល់សំឡេងរបស់ខ្លួន។
ក្រុមយុវជនទាំងនោះអះអាងថា ពួកគេបានធ្វើកោសល្យវិច័យសំឡេង នៃខ្សែអាត់បែកធ្លាយសាសងស្នេហារវាងប្រធានស្ដីទីគណបក្សសង្គ្រោះជាតិ លោក កឹម សុខា កញ្ញា ខុម ចាន់តារាទី លើបណ្ដាញសង្គមហ្វេសប៊ុក និងសំឡេងបទសម្ភាសន៍ជាមួយវិទ្យុអាស៊ីសេរីនោះ ថា ជាសំឡេងតែមួយ។
យុវជនមួយក្រុមដែលអះអាងថា ខ្លួនជានិស្សិតនោះ ធ្លាប់ទៅដល់មុខស្នាក់ការកណ្ដាលបក្សសង្គ្រោះជាតិ ហើយតែងតែទៅតាមវេទិកាសាធារណៈរបស់បក្សនេះ ដើម្បីជជីកសួរឲ្យប្រធានស្ដីទីបក្សប្រឆាំង លោក កឹម សុខា បកស្រាយពីខ្សែអាត់សំឡេងរឿងរ៉ាវស្នេហានោះ។ ប៉ុន្តែយុវជនទាំងនោះ មិនដែលបានបង្ហាញកាតនិស្សិតរបស់ពួកគេឡើយ ទោះបីជាអ្នកសារព័ត៌មានសួររកកាតរបស់ពួកគេក្ដី។
ទោះបីជាយ៉ាងណាក៏ដោយ កញ្ញា ខុម ចាន់តារាទី បដិសេធជាថ្មីទៀតថា សំឡេងនៅក្នុងខ្សែអាត់នោះ មិនមែនជាសំឡេងរបស់នាងទេ ក្រោយពីនាងទៅជួបនាយកដ្ឋានប្រឆាំងភេរវកម្ម ក្រសួងមហាផ្ទៃ តាមបណ្ដឹងរបស់កញ្ញា ធី សុវណ្ណថា ដែលប្ដឹងឲ្យរកម្ចាស់សំឡេងសន្ទនាជាមួយលោក កឹម សុខា បរិហារកេរ្តិ៍លើកញ្ញា ធី សុវណ្ណថា ក្តី។
កាលពីថ្ងៃទី៩ មីនា កញ្ញា ខុម ចាន់តារាទី បានចេញមុខបដិសេធម្ដងហើយ ថា នាងមិនមានពាក់ព័ន្ធរឿងរ៉ាវស្នេហាជាមួយ លោក កឹម សុខា ដូចការចោទប្រកាន់ឡើយ។
ស្ដាប់សេចក្ដីរាយការណ៍របស់លោក ថា កិត្យា តាមការសាកសួររបស់លោក យាង សុជាមេត្តា៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។