សេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃទី១៤ វិច្ឆិកា ឱ្យដឹងថា ក្នុងដំណើរទស្សនកិច្ចនេះ លោក ស៊ីនហ្សូ អាបេ នឹងចូលគាល់ព្រះមហាក្សត្រ និងជួបពិភាក្សាជាមួយ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
បន្ទាប់មក លោកនាយករដ្ឋមន្ត្រីទាំងពីរនឹងធ្វើជាអធិបតីក្នុងពិធីចុះហត្ថលេខាលើឯកសារចំនួនពីរ គឺទី១ កិច្ចព្រមព្រៀងរវាងរាជរដ្ឋាភិបាលកម្ពុជា និងជប៉ុន ស្ដីពីកិច្ចសហប្រតិបត្តិការលើការអប់រំ និងបណ្ដុះបណ្ដាលក្នុងវិស័យប្រតិបត្តិការរក្សាសន្តិភាពរបស់អង្គការសហប្រជាជាតិ និងទី២ គឺអនុស្សរណៈស្ដីពីសហប្រតិបត្តិការរវាងក្រសួងសុខាភិបាលនៃព្រះរាជាណាចក្រកម្ពុជា និងក្រសួងសុខាភិបាល ការងារ និងសុខុមាលភាពជប៉ុន។
លោក ស៊ីនហ្សូ អាបេ ក៏នឹងចូលរួមសន្និសីទស្ដីពីសេវាសុខភាព និងវេជ្ជសាស្ត្រ ហើយទស្សនាមជ្ឈមណ្ឌលជាតិគាំពារមាតា និងទារក។
ដំណើរទស្សនកិច្ចរបស់ លោក ស៊ីនហ្សូ អាបេ គឺជាការឆ្លើយតបតាមការអញ្ជើញរបស់លោកនាយករដ្ឋមន្ត្រី ហ៊ុន សែន ហើយកម្ពុជា និងជប៉ុន នឹងចេញសេចក្ដីថ្លែងការណ៍រួមមួយចុងបញ្ចប់នៃដំណើរទស្សនកិច្ចនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។