គណបក្សអំណាចខ្មែរ សន្យាផ្ដល់ដីមួយឡូត៍ជាចំណងដៃដល់គូស្វាមីភរិយាថ្មី ប្រសិនបើគណបក្សមួយនេះឈ្នះឆ្នោតដឹកនាំរដ្ឋាភិបាល។ ការសន្យានេះ ធ្វើឡើងក្នុងសមាជលើកទីដំបូងនៅថ្ងៃទី១៨ ខែមីនា នាភូមិព្រៃវែង សង្កាត់ព្រៃស ខណ្ឌដង្កោ រាជធានីភ្នំពេញ។ ក្នុងសមាជនេះ គណបក្សអំណាចខ្មែរ ក៏បានរិះគន់លើរបបដឹកនាំដោយលោក ហ៊ុន សែន និងអ្នកនយោបាយបក្សផ្សេងៗទៀត។ សម្រាប់អ្នកវិភាគចាត់ទុកការសន្យារបស់លោក សួន សេរីរដ្ឋា ថាជានយោបាយប្រជាភិថុតិ។ រីឯមន្ត្រីរដ្ឋាភិបាលថា មិនចាប់អារម្មណ៍ពាក្យពេចន៍រិះគន់របស់បក្សប្រឆាំងថ្មីនេះ។
សមាជគណបក្សអំណាចខ្មែរ លើកដំបូងដែលប្រារព្ធនៅថ្ងៃទី១៨ ខែមីនា ឆ្នាំ២០១៦ គឺសមាជិក សមាជិកា និងអ្នកចូលរួមប្រមាណជាង ១.០០០នាក់ បានលើកដៃអនុម័តលក្ខន្តិកៈគោលការណ៍នយោបាយ និងសម្រេចជ្រើសរើសលោក សួន សេរីរដ្ឋា ជាប្រធានគណបក្សចំណែកលោកស្រី លី ណាតាន់ និងលោក គឹម សេងលី ជាអនុប្រធាន។
នៅចំពោះមុខអ្នកចូលរួម លោក សួន សេរីរដ្ឋា ប្រកាសថា ប្រសិនបើគណបក្សរបស់លោកមានឱកាសដឹកនាំរដ្ឋាភិបាលនោះ រដ្ឋធានាថា គ្រួសារពលរដ្ឋខ្មែរត្រូវតែមានដីសម្រាប់សង់ផ្ទះ និងធ្វើកសិកម្ម ដោយមិនប្លន់ដីពីរាស្ត្រដូចសម័យសព្វថ្ងៃនេះឡើយ។ លើសពីនេះ ប្រធានគណបក្សអំណាចខ្មែរ ក៏សន្យាថា នឹងប្រគល់ដីមួយឡូត៍ជាចំណងដៃដល់គូស្វាមីភរិយាថ្មីទៀតផង។ ទំហំនិងទីតាំងដីត្រូវរៀបចំកំណត់ដោយច្បាប់ស្ដីពីគោលនយោបាយជាតិ សម្រាប់ចែកជូនពលរដ្ឋសង់លំនៅឋាន តាមតំបន់ទីក្រុងទីប្រជុំជន និងជនបទ៖ «ប្រទេសខ្មែរយើងមិនមែនអត់ដីចែកប្រជាពលរដ្ឋទេ ប៉ុន្តែដោយសារដីទាំងនោះត្រូវបានឈ្មួញយកអស់ ហើយរដ្ឋបានអោយឈ្មួញទុច្ចរិតគ្រប់គ្រងច្រើនពេក អ៊ីចឹងបានជាពលរដ្ឋអត់ដី។ ដូច្នេះហើយគណបក្សអំណាចខ្មែរមានគោលការណ៍ចែកដី»។
នេះគឺជាគោលនយោបាយមួយក្នុងចំណោមគោលនយោបាយ ៣ជំហាន និង ១៩ចំណុច របស់គណបក្សអំណាចខ្មែរ។ ជំហានទី១ គឺគណបក្សអំណាចខ្មែរ តស៊ូគោលនយោបាយមុននឹងសម្រេចចូលរួមការបោះឆ្នោត ដូចជាទាមទាររំលាយ គ.ជ.ប ដែលជាកូតារបស់គណបក្សនយោបាយ និងទាមទារឲ្យសំអាតឈ្មោះបរទេសចេញពីបញ្ជីឈ្មោះបោះឆ្នោត រួមទាំងទាមទារសិទ្ធិឲ្យពលរដ្ឋខ្មែរនៅក្រៅប្រទេសអាចបោះឆ្នោតបានជាដើម។ ជំហានទី២ គឺកម្មវិធីគោលនយោបាយអភិវឌ្ឍន៍ជាតិ និងជំហានទី៣ ទប់ស្កាត់ការវិលត្រឡប់មកវិញនូវរបបផ្ដាច់ការ និងការពារអធិបតេយ្យភាពបូរណភាពទឹកដី។
ចំពោះការសន្យានេះ សាស្ត្រាចារ្យវិទ្យាសាស្ត្រនយោបាយ លោកបណ្ឌិត រស់ រ៉ាវុធ ហាក់អស់សំណើចដោយនិយាយថា ជានយោបាយប្រជាភិថុតិ ចង់បានសន្លឹងឆ្នោតពីប្រជាពលរដ្ឋ។ លោកបន្តថា ប្រជាពលរដ្ឋត្រូវតែពិនិត្យមើលឲ្យច្បាស់អំពីគោលនយោបាយរបស់គណបក្សនីមួយៗ ថាតើវាសមស្របជាមួយនឹងស្ថានភាពនៃប្រទេសកម្ពុជា បច្ចុប្បន្នដែរ ឬទេ៖ «នេះគឺជាបញ្ហាមួយដែលមិនអាចទៅរួច ក្នុងការចែកដីពេលខ្លួនកាន់អំណាចឡើយ ព្រោះសួរថា តើមានដីបម្រុងទុកសម្រាប់សង្គមកិច្ចប៉ុន្មានសម្រាប់ការរីកចម្រើន របស់ពលរដ្ឋទៅមុខទៀតនោះ។ ដូច្នេះការឃោសនានេះ គ្រាន់តែជាដើម្បីប្រជាប្រិយភាពសម្រាប់ឈានទៅរកកាន់អំណាច ប៉ុណ្ណោះ»។
ក្រៅពីបង្ហាគោលនយោបាយនោះ ទាំងមន្ត្រី ទាំងប្រធានគណបក្សអំណាចខ្មែរ បានរិះគន់លើរបបដឹកនាំរបស់លោកនាយករដ្ឋមន្ត្រី ហ៊ុន សែន ថា ជារបបផ្ដាច់ការ គ្មានសិទ្ធិសេរីភាព បក្ខពួកនិយម និងរណបបរទេសដូចជាវៀតណាម ជាដើម។
លោក សួន សេរីរដ្ឋា ក៏អំពាវនាវឲ្យប្រជាពលរដ្ឋផ្លាស់ប្ដូរមេដឹកនាំនយោបាយទាំងបក្សកាន់អំណាច ទាំងបក្សប្រឆាំងផ្សេងទៀត ដែលយកប្រជាពលរដ្ឋជាឈ្នាន់ ឬយកខ្មោចពលរដ្ឋខ្មែរជាកម្រាលព្រំសម្រាប់ឆ្លងទៅកាន់អំណាច និងក្ដោបក្ដាប់អំណាចរបស់ខ្លួន។
ចំពោះពាក្យពេចន៍រិះគន់នេះ អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន មានប្រសាសន៍ថា លោកមិនចាប់អារម្មណ៍ពីរឿងនេះឡើយ ដោយលោកចាត់ទុកលោក សួន សេរីរដ្ឋា គឺជាមេបក្សប្រឆាំង៖ «គាត់រៀបចំខ្លួនជាបក្សប្រឆាំងហើយ ដូច្នេះគាត់អាចនិយាយអីស្រេចតែចិត្ត ដូច្នេះខ្ញុំមិនអាចយកជាការបានឡើយ»។
យ៉ាងណាក៏ដោយ ក្នុងសមាជលើកដំបូងនេះ គណបក្សអំណាចខ្មែរ អះអាងថា នឹងយកគំរូលទ្ធិប្រជាធិបតេយ្យតាមសហរដ្ឋអាមេរិក ដើម្បីដឹកនាំកម្ពុជា ឆ្ពោះរកការអភិវឌ្ឍពិតប្រាកដ បើឈ្នះការបោះឆ្នោត។ ចំណែកអ្នកវិភាគមួយចំនួនលើកឡើងថា អ្នកនយោបាយគួរតែផ្លាស់ប្ដូរឥរិយាបថរបស់ខ្លួន ដោយត្រូវរិះរកគោលនយោបាយ និងយុទ្ធសាស្ត្របម្រើជាតិពិតប្រាកដទើបមានសង្ឃឹមឈ្នះឆ្នោត ព្រោះបច្ចុប្បន្ននេះ ប្រជាពលរដ្ឋយល់ដឹងច្រើន និងមិនចាញ់បោកអ្នកនយោបាយដោយងាយៗទៀតឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។