រឿងរ៉ាវចោទប្រកាន់ថា សមាជិកព្រឹទ្ធសភាមកពីបក្សប្រឆាំងចោទលោកនាយករដ្ឋមន្ត្រី ហ៊ុន សែន សម្លាប់បណ្ឌិត កែម ឡី នោះ អាចនឹងចូលដល់តុលាការនៅដើមខែសីហា។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ប្រាប់អាស៊ីសេរី នៅល្ងាចថ្ងៃទី៣១ កក្កដា ថា ក្រុមអ្នកច្បាប់កំពុងពិនិត្យខ្លឹមសារច្បាប់ប្ដឹងអ្នកស្រី ថាក់ ឡានី ហើយអាចនឹងចូលដាក់ទៅតុលាការនៅថ្ងៃច័ន្ទ ឬថ្ងៃអង្គារ ទី២ ខែសីហា។ លោកបដិសេធចំពោះព័ត៌មានដែលថា អាជ្ញាធរបានបិទច្រកចេញរបស់អ្នកស្រីហើយនោះ៖ «រហូតមកដល់ពេលនេះ យើងមិនទាន់មានវិធានការអីដែលប៉ះពាល់សិទ្ធិសេរីភាពរបស់លោកជំទាវទេ ហើយខ្ញុំជឿជាក់ថា លោកជំទាវបានប្រកាសពីម្សិលមិញហើយ តាមហ្វេសប៊ុករបស់គាត់ គាត់មិនខ្លាច។ គាត់មិនព្រួយបារម្ភអី។ អាហ្នឹងជាការល្អហើយ។ យើងត្រូវដោះស្រាយតាមផ្លូវច្បាប់ជាមួយគ្នាទៅ អាហ្នឹងវាជាការយើងកំពុងតែនាំគ្នាពង្រឹងនីតិរដ្ឋហ្នឹងឯង។ លោកជំទាវក៏បានប្រកាសដែរថា លោកជំទាវមិនបាននិយាយ។ បើមិនបាននិយាយ អាវាមានបញ្ហាអី។ អាហ្នឹងវាស៊ីសងនៅពេលបណ្ដឹងទៅដល់តុលាការ តុលាការនឹងចាត់នីតិវិធីយ៉ាងម៉េច ? ដើម្បីធ្វើការស៊ើបអង្កេតតាមនីតិវិធីរបស់តុលាការហ្នឹង។ បើសិនណាអត់ដូចសាមីជនគាត់មានប្រសាសន៍ហ្នឹង អាហ្នឹងអត់មានបញ្ហាអីទេ » ។
ការប្ដឹងផ្ដល់នេះ គឺបន្ទាប់ពីមានប្រតិកម្មរបស់លោកនាយករដ្ឋមន្ត្រី ហ៊ុន សែន តាមរយៈអង្គភាពព័ត៌មាន ហ្វ្រែស ញូវ (Fresh News)ប្រកាសប្ដឹងអ្នកស្រី ថាក់ ឡានី តាមរយៈឃ្លីបវីដេអូខ្លីមួយ ដែលអ្នកស្រី ថាក់ ឡានី ចោទថា លោក ហ៊ុន សែន សម្លាប់លោក កែម ឡី។
អ្នកស្រី ថាក់ ឡានី បានបដិសេធនៅថ្ងៃទី៣០ កក្កដា ដោយអះអាងថា មានមនុស្សជាង ៧០នាក់ ដែលចូលរួមវេទិកាជាមួយអ្នកស្រីនៅខេត្តរតនគិរី ជាសាក្សី។ អ្នកស្រីថាមិនបាននិយាយថាលោកនាយករដ្ឋមន្ត្រីជាអ្នកសម្លាប់លោក កែម ឡី ទេ គឺនិយាយថា មានអ្នកដទៃមកសម្លាប់។ អ្នកស្រីបញ្ជាក់ថា វីដេអូឃ្លីបដែលត្រូវបានគេបង្ហោះនៅលើប្រព័ន្ធផ្សព្វផ្សាយនោះ គឺជាការកាត់តសំឡេងដើម្បីទម្លាក់កំហុសលើអ្នកស្រី។
ទោះបីជាយ៉ាងនេះក្ដី លោក សុខ ឥសាន ថ្លែងថា តាមរយៈឃ្លីបវីដេអូនោះជាការពិត ប៉ុន្តែរឿងថាកាត់ត ឬយ៉ាងណានោះ លោកមិនទាន់អាចកាត់ស្មានបានទេ រហូតទាល់តែក្រុមសមត្ថកិច្ចធ្វើកោសល្យវិច័យ។ លោកថាការប្ដឹងនេះ គឺតាមរូបភាព និងសំឡេងជាក់ស្ដែង ដែលប៉ះពាល់កិត្តិយសសេចក្ដីថ្លៃថ្នូររបស់លោកនាយករដ្ឋមន្ត្រី ហើយធ្វើឲ្យសាធារណជនយល់ច្រឡំ។ លោកក៏កំពុងរង់ចាំមើលភស្តុតាងដោះបន្ទុករបស់អ្នកស្រី ថាក់ ឡានី ចំពោះការបដិសេធនេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។