មន្ត្រីក្រុមប្រឹក្សាខេត្តនៃគណបក្ស សម រង្ស៊ី លោក ដួង ចិត្រា បានបញ្ជាក់នៅថ្ងៃទី២២ សីហា ថា មន្ត្រីក្រុមប្រឹក្សាឃុំខ្នារឆ្មារ ចំនួន ៣រូប និងមន្ត្រីក្រុមប្រឹក្សាស្រុកសាមគ្គីមានជ័យ ចំនួន ២រូប ត្រូវបានដកចេញពីតំណែងជាបន្តបន្ទាប់ ដោយសារមន្ត្រីក្រុមប្រឹក្សារបស់គណបក្សប្រជាជនកម្ពុជា ចោទថា អ្នកទាំង ៥នាក់នោះ បានចូលរួមទៅក្នុងជួរគណបក្សសង្គ្រោះជាតិ។
លោក ដួង ចិត្រា បន្តថា មន្ត្រីក្រុមប្រឹក្សាទាំង ៥រូបនោះ គឺពុំមានឈ្មោះផ្លូវការក្នុងបញ្ជីបេក្ខភាពរបស់គណបក្សសង្គ្រោះជាតិ នោះទេ៖ «ដោយសារលោក ជិន វិចិត្រ ហ្នឹង គាត់បាននិយាយថា នៅក្នុងអង្គប្រជុំម្សិលមិញហ្នឹង គាត់ថាគេនឹងបង្ខាំងប្រាក់ខែគាត់ទុកសម្រាប់ក្រុមប្រឹក្សាឃុំទាំងបីរូបហ្នឹង ដោយគេអះអាងថា អ្នកទាំងបីរូបហ្នឹងបាត់សុពលភាពពីសាមីគណបក្សដើម»។
ជំទប់ទី២ ឃុំខ្នារឆ្មារ មកពីគណបក្ស សិទ្ធិមនុស្ស លោក ញ៉ែម សំណាង មានប្រសាសន៍ថា លោក និងក្រុមប្រឹក្សា ២នាក់ទៀត ត្រូវមន្ត្រីក្រុមប្រឹក្សាស្រុក លោក ជិន វិចិត្រ ប្រកាសនៅក្នុងអង្គប្រជុំក្រុមប្រឹក្សាឃុំ នៅថ្ងៃទី២១ ថា មន្ត្រីក្រុមប្រឹក្សាមកពីគណបក្ស សម រង្ស៊ី និងសិទ្ធិមនុស្សចំនួន ៣រូបហ្នឹង ត្រូវដកតំណែងដោយសារតែបានចូលរួមសកម្មភាពនយោបាយជាមួយគណបក្សសង្គ្រោះជាតិ៖ «គាត់ថាក្រុមប្រឹក្សាស្រុកសាមគ្គីមានជ័យ ពីរនាក់ គេបង្កកប្រាក់ខែ គេអត់ឲ្យចូលរួមប្រជុំនៅសាលាស្រុកផង។ អីចឹង នៅក្នុងឃុំនេះ គឺត្រៀមទៅ គាត់ថាឲ្យត្រៀមរកអ្នកតំណាងទៅ ព្រោះច្បាប់ត្រូវតែដកចេញ។ គេថាមានពួកខ្ញុំបីនាក់ទៅមិនតែខ្ញុំបីនាក់ទេ មេភូមិគ្រប់ភូមិ ហើយក្រុមប្រឹក្សាឃុំ មេឃុំអី ក្រុមប្រឹក្សាស្រុកដែលនិយាយជាមួយខ្ញុំម្សិលមិញហ្នឹង ក៏គាត់ទៅស្ដាប់ដែរ»។
ឆ្លើយតបនឹងបញ្ហានេះ មន្ត្រីក្រុមប្រឹក្សាស្រុកសាមគ្គីមានជ័យ មកពីគណបក្សប្រជាជនកម្ពុជា លោក ជិន វិចិត្រ ពន្យល់ថា យោងតាមច្បាប់គណបក្សនយោបាយត្រង់ជំពូកទី៣ មាត្រា១៥ ប្រជាពលរដ្ឋខ្មែរម្នាក់មិនអាចជាសមាជិកគណបក្សនយោបាយលើសពី១ ក្នុងពេលតែមួយបានទេ៖ «នៅពេលឃោសនា អ្នកទាំងអស់នោះបានចូលរួមក្នុងការឃោសនាជាមួយគណបក្សសង្គ្រោះជាតិ មិនត្រឹមតែប៉ុណ្ណោះទេ បានបោះផ្លាកគណបក្សសង្គ្រោះជាតិ ហ្នឹងនៅខាងមុខផ្ទះរបស់ខ្លួនទៀតផង»។
លោកបញ្ជាក់ថា ចំពោះមន្ត្រីក្រុមប្រឹក្សាទាំងអស់នោះ មានឈ្មោះជាបេក្ខជន ឬតួនាទីអ្វីនៅក្នុងគណបក្សសង្គ្រោះជាតិ លោកមិនបានដឹងច្បាស់នោះទេ ប៉ុន្តែការប្រកែកថាមិនជាប់ពាក់ព័ន្ធជាមួយនឹងគណបក្សសង្គ្រោះជាតិ គឺគ្រាន់តែជាល្បិចកលរបស់គណបក្សប្រឆាំងប៉ុណ្ណោះ។
ទាក់ទងនឹងបញ្ហានេះ ប្រធានក្រុមអ្នកច្បាប់ការពារសិទ្ធិមនុស្សនៅកម្ពុជា លោក សុក សំអឿន មានប្រសាសន៍ថា ការផ្អាកប្រាក់ខែ និងដកតួនាទីរបស់មន្ត្រីក្រុមប្រឹក្សាឃុំ និងស្រុករបស់គណបក្សប្រឆាំង ដោយគ្រាន់តែមានសកម្មភាពគាំទ្រគណបក្សសង្គ្រោះជាតិ គឺជារឿងមិនត្រឹមត្រូវ៖ «សកម្មភាពវាមានជាស្អីហើយ ចុះបើពួកហ្នឹងមកគាំទ្រគណបក្សកាន់អំណាចវិញម៉េចដែរ យើងកុំប្រៀបធៀបជាមួយខាងតំណាងរាស្ត្រ ពីព្រោះខាងតំណាងរាស្ត្រគាត់ទៅឈរឈ្មោះជាតំណាងរាស្ដ្រឲ្យគណបក្សមួយផ្សេង ដូច្នេះយើងដក ឬបញ្ចប់ពីតំណែង អាហ្នឹងវាសមហេតុសមផល»។
មន្ត្រីគណបក្សសង្គ្រោះជាតិ ប្រចាំខេត្តកំពង់ឆ្នាំង បានបញ្ជាក់ថា មន្ត្រីក្រុមប្រឹក្សាឃុំខ្នារឆ្មារ ចំនួន ៣រូប ដែលត្រូវបានគេដកតំណែងនោះ គឺទី១ លោក គង់ សុន ជំទប់ទី១ ទី២ លោក ញ៉ែម សំណាង ជំទប់ទី២ និងទី៣ លោក សោម សារ៉ាន់ ជាសមាជិកក្រុមប្រឹក្សាឃុំ។ ចំណែកមន្ត្រីក្រុមប្រឹក្សាស្រុកសាមគ្គីមានជ័យ ចំនួន ២រូប ក៏ត្រូវបានគេដកចេញពីតំណែងក្នុងរូបភាពដូចគ្នានេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។