រដ្ឋសភា បញ្ចប់កិច្ចប្រជុំវិសាមញ្ញបោះឆ្នោតជ្រើសតាំងសមាសភាពគណៈកម្មការជំនាញរដ្ឋសភារួចហើយ នៅថ្ងៃទី២៧ សីហា។ ក៏ប៉ុន្តែ មេដឹកនាំគណបក្សទាំងពីរ មើលមុខគ្នាមិនត្រង់ឡើយ ដោយសារមន្ត្រីជាន់ខ្ពស់គណបក្សសង្គ្រោះជាតិ ពីរនាក់ ត្រូវសមាជិកសភាបោះឆ្នោតទម្លាក់ មិនឲ្យកាន់តំណែងជាប្រធានគណៈកម្មការទី៨ និងទី១០នៃរដ្ឋសភា។
ដំណើរការប្រជុំវិសាមញ្ញសភាថ្ងៃទី២៧ ខែសីហា ដើម្បីជ្រើសរើសសមាសភាពគណៈកម្មការជំនាញដែលនៅសល់នេះ បានបញ្ចប់នៅម៉ោងជាងពីររសៀល។ មនុស្សសំខាន់ៗពីរនាក់របស់គណបក្សសង្គ្រោះជាតិ គឺអ្នកស្រី មូរ សុខហួរ និងលោក យឹម សុវណ្ណ មិនត្រូវបានសមាជិកសភាបោះឆ្នោតគាំទ្រនោះឡើយ។ សំឡេងឆ្នោតដែលគាំទ្រ អ្នកស្រី មូរ សុខហួរ និងលោក យឹម សុវណ្ណ មានចំនួន ៥៦សំឡេង ស្មើគ្នាក្នុងចំណោមសមាជិកសភា ១២២រូបដែលបានចូលរួមប្រជុំ។
ប្រធានគណបក្សសង្គ្រោះជាតិ លោក សម រង្ស៉ី ចាត់ទុកថា ការបោះឆ្នោតនេះជាការបង្ហាញឲ្យឃើញពីឆន្ទៈនយោបាយរបស់គណបក្សទាំងពីរ។ លោកបន្តថា អ្នកតំណាងរាស្ត្រគណបក្សប្រឆាំង ភាគច្រើនបានបោះឆ្នោតគាំទ្រសមាសភាពបេក្ខភាពរបស់គណបក្សប្រជាជនកម្ពុជា ប៉ុន្តែតំណាងរាស្ត្រឈ្មោះល្បី ពីរនាក់របស់គណបក្សសង្គ្រោះជាតិ បែរជាមិនជាប់ឆ្នោតទៅវិញ។ លោកបញ្ជាក់ថា តំណាងរាស្ត្រគណបក្សសង្គ្រោះជាតិ ទាំង ៥៥រូប សុទ្ធតែបោះឆ្នោតគាំទ្របេក្ខភាព លោក យឹម សុវណ្ណ និងអ្នកស្រី មូរ សុខហួរ។ ទោះជាបែបណា លោក សម រង្ស៉ី នៅតែប្ដេជ្ញាចិត្តទាំងមុខស្ងួតថា លោកចង់ឲ្យដំណើរការរដ្ឋសភាប្រព្រឹត្តទៅបានដោយរលូន៖ «សួរខាងគណបក្សប្រជាជនទៅ ព្រោះសំឡេងរបស់គណបក្សប្រជាជនប្រហាក់ប្រហែលនឹងសំឡេងមិនគាំទ្រ តើលទ្ធផលសរុបអាចទទួលយកបានឬអត់ អាចឲ្យសភាចេញឲ្យឆាប់ ធ្វើច្បាប់ឲ្យឆាប់ សូម្បីតែច្បាប់កំពូលរដ្ឋធម្មនុញ្ញ ក៏ត្រូវធ្វើវិសោធនកម្មឲ្យបានឆាប់ដែរ»។
អ្នកស្រី មូរ សុខហួរ ដែលធ្លាប់ប្ដឹងផ្តល់គ្នាឡើងតុលាការជាមួយ លោក ហ៊ុន សែន នោះ ឈរឈ្មោះជាប្រធានគណៈកម្មការទី៨ ទទួលបន្ទុកសុខាភិបាល និងសង្គមកិច្ច កិច្ចការនារីនៃរដ្ឋសភា។ ចំណែក លោក យឹម សុវណ្ណ ឈរឈ្មោះជាប្រធានគណៈកម្មការជំនាញទី១០ ទទួលបន្ទុកអង្កេត និងប្រឆាំងអំពើពុករលួយ។ អ្នកស្រី មូរ សុខហួរ ត្រូវបានសភាពេញអង្គបោះឆ្នោតមិនទុកចិត្តមុន លោក យឹម សុវណ្ណ។
បន្ទាប់ពីប្រធានរដ្ឋសភាប្រកាសលទ្ធផលរួច លោក សម រង្ស៉ី បានទៅលើកទឹកចិត្ត អ្នកស្រី មូរ សុខហួរ។ បន្ទាប់មកទៀត ទាំង លោក សម រង្ស៉ី និងលោក កឹម សុខា បានទៅជជែកឆ្ការដៃឆ្ការជើងជាមួយ លោក ហ៊ុន សែន។ ជជែកគ្នាចប់ លោក សម រង្ស៉ី បានហៅមន្ត្រីធំៗក្នុងបក្សរបស់ខ្លួន ទៅប្រជុំគ្នានៅបន្ទប់ដាច់ដោយឡែកមួយសន្ទុះ ទើបចូលប្រជុំសភាបន្តទៀត។ ពេលចូលដល់ក្នុងសភា ក៏សួរនាំ លោក ហ៊ុន សែន ជាថ្មី លោក ហ៊ុន សែន ក៏ទំនងជាបកស្រាយជាថ្មីទៀតដែរ។ លុះដល់ពេលបោះឆ្នោតជ្រើសរើសគណៈកម្មការទី១០ លទ្ធផល គឺលោក យឹម សុវណ្ណ ធ្លាក់ទៀត កាន់តែធ្វើឲ្យមន្ត្រីគណបក្សសង្គ្រោះជាតិ ល្វីងមុខ។ ជំនួបជជែកគ្នាក្រៅផ្លូវការរវាងមេដឹកនាំទាំងពីរ ក៏កើតឡើងជាថ្មីទៀត។ ម្តងនេះ រដ្ឋសភាបានសម្រេចសម្រាក ១៥នាទី។ បន្ទាប់មក លោក ហ៊ុន សែន ក៏រុញឲ្យសមាជិកគណៈកម្មការទី៨ និងទី១០ បោះឆ្នោតជ្រើសរើសប្រធានដោយខ្លួនឯង។ គណៈកម្មការទាំងពីរនេះ មានសមាជិកតែ ៨នាក់ ក៏បានសម្រេចបោះឆ្នោតទាំងមិនទាន់មាននីតិវិធី។ លទ្ធផលចុងក្រោយ តំណាងរាស្ត្រគណបក្សប្រឆាំង អ្នកស្រី កែ សុវណ្ណរតន៍ ត្រូវជ្រើសរើសជាប្រធានគណៈកម្មការជំនួស អ្នកស្រី មូរ សុខហួរ។ ចំណែក លោក ហូរ វ៉ាន់ ត្រូវជ្រើសរើសជាប្រធានគណៈកម្មការជំនួស លោក យឹម សុវណ្ណ។ នៅពេលដែលប្រជុំសភាចប់ លោក ហ៊ុន សែន ដើរគេចអ្នកកាសែត ដោយបង្គាប់អង្គរក្សឲ្យយកឡានទៅទទួលលោកនៅទ្វារខាងត្បូងរដ្ឋសភា។
លោក ហ៊ុន សែន ធ្លាប់មានប្រសាសន៍ថា លោកសន្យាថា លោកនឹងបបួលតំណាងរាស្ត្ររបស់ខ្លួនឲ្យគាំទ្របេក្ខភាពគណបក្សប្រឆាំង។ ប៉ុន្តែពេលបោះឆ្នោតជាក់ស្តែង មិនដូចការសន្យារបស់ លោក ហ៊ុន សែន ទេ គឺមន្ត្រីគណបក្សប្រជាជនកម្ពុជា ទាំង ៦៦នាក់ មិនបានយល់ព្រមតាមការសន្យារបស់ លោក ហ៊ុន សែន ឡើយ។ បើសិនជាមន្ត្រីគណបក្សសង្គ្រោះជាតិ សុទ្ធតែគាំទ្រសមាសភាព អ្នកស្រី មូរ សុខហួរ និងលោក យឹម សុវណ្ណ មែននោះ មានន័យថា មានតំណាងរាស្ត្រគណបក្សប្រជាជនកម្ពុជា តែម្នាក់ប៉ុណ្ណោះ ដែលបោះឆ្នោតគាំទ្រអ្នកទាំងពីរ។ ឧទាហរណ៍ថា បើ លោក ហ៊ុន សែន បោះឆ្នោតឲ្យនោះ លោក ស ខេង និងលោក ហេង សំរិន សុទ្ធតែបោះឆ្នោតជំទាស់បេក្ខភាពទាំងពីរនេះ។ តើ លោក ស ខេង និងលោក ហេង សំរិន គោរពតាមកិច្ចព្រមព្រៀងថ្ងៃទី២២ ខែកក្កដា ឬអត់?
តំណាងរាស្ត្រគណបក្សកាន់អំណាច លោក ឈាង វុន បញ្ជាក់ថា គណបក្សប្រជាជនកម្ពុជា មិនបានរៀបចំក្បួនធ្វើស៊ីបក្សប្រឆាំងទេ។ លោកបន្តថា ការបោះឆ្នោតទុកចិត្ត ឬមិនទុកចិត្ត វាជាសិទ្ធិរបស់អ្នកតំណាងរាស្ត្រម្នាក់ៗ៖ «មិនមែនតែគណបក្សប្រជាជន មិនពេញចិត្តទេ ក្នុងហ្នឹងមានគ្នាគាត់ដែរ មានគណបក្សសង្គ្រោះជាតិ ដែរ។ ខ្ញុំមានទៅឆែកអីរបស់បស់គេ។ ចំពោះខ្ញុំ ខ្ញុំបោះឲ្យតើ! (តើមួយសន្លឹកហ្នឹងរបស់ឯកឧត្តម ឬម៉េច?) អត់ទេៗ»។
ចំណែកឯ លោក យឹម សុវណ្ណ វិញបញ្ជាក់ថា លោកមិនខ្វល់នឹងការជាប់ជាប្រធានគណៈកម្មការជំនាញ ឬអត់ទេ ប៉ុន្តែលោកនៅតែបំពេញតួនាទីជាអ្នកតំណាងរាស្ត្រ ដើម្បីបម្រើប្រយោជន៍ជាតិ។
ទាក់ទងនឹងបញ្ហានេះ អ្នកជំនាញវិទ្យាសាស្ត្រនយោបាយ លោកបណ្ឌិត សុខ ទូច មានប្រសាសន៍ថា នេះជាមេរៀនរបស់គណបក្សប្រឆាំងដែលត្រូវប្រុងប្រយ័ត្ន។ លោកបន្តថា គណបក្សប្រជាជនកម្ពុជា ឆ្លៀតយកចន្លោះប្រហោងនៃកិច្ចព្រមព្រៀងថ្ងៃទី២២ ខែកក្កដា និងចន្លោះប្រហោងនៃច្បាប់ យកមកព្រមានមន្ត្រីបក្សប្រឆាំង។
កិច្ចព្រមព្រៀងរវាងគណបក្សទាំងពីរ កាលពីថ្ងៃទី២២ ខែកក្កដា មាន ៧ចំណុច។ ចំណុចមួយចែងថា គណបក្សសង្គ្រោះជាតិ ត្រូវកាន់តំណែងជាអនុប្រធានទី១រដ្ឋសភា និងកាន់ការជាប្រធានគណៈកម្មការជំនាញរដ្ឋសភាចំនួន៥ ប៉ុន្តែមិនបញ្ជាក់ពីសមាសភាពពិតប្រាកដទេ។ អ្នកកាន់តួនាទីជាប្រធានគណៈកម្មការជំនាញរដ្ឋសភា នឹងអាចទទួលបានរថយន្តពីរដ្ឋសភា និងអាចជ្រើសរើសបុគ្គលិកបំពេញការងារបានច្រើនជាងសមាជិកធម្មតា ព្រមទាំងមានផលប្រយោជន៍ផ្នែករដ្ឋបាលដទៃទៀត។
រដ្ឋសភាមិនទាន់កំណត់ថ្ងៃប្រជុំជាថ្មីនៅឡើយ ហើយកិច្ចប្រជុំជាថ្មីនោះ នឹងមានរបៀបវារៈបោះឆ្នោតជ្រើសរើសសមាជិកគណៈកម្មការទី៨ និងទី១០ ជំនួសកន្លែង លោក យឹម សុវណ្ណ និងអ្នកស្រី មូរ សុខហួរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។