រដ្ឋសភា សម្រេចបោះឆ្នោតផ្លាស់ប្ដូរសមាសភាពរដ្ឋមន្ត្រីតាមសំណើរបស់រដ្ឋាភិបាលដូចការគ្រោងទុក ក្នុងកិច្ចប្រជុំថ្ងៃទី៤ ខែមេសា ព្រឹកមិញនេះ។ ការបោះឆ្នោតផ្លាស់ប្ដូររដ្ឋមន្ត្រីរដ្ឋាភិបាលនេះ មានសំឡេងគាំទ្រ ៧០សំឡេងលើ ១០៧សំឡេង។ តំណាងរាស្ត្រគណបក្សសង្គ្រោះជាតិ ថ្លែងក្នុងកិច្ចប្រជុំនោះថា ការផ្លាស់ប្ដូរនៅពេលនេះ មិនបានផ្តល់ប្រយោជន៍ច្រើនដល់សង្គមជាតិនោះទេ គ្រាន់តែជាការផ្លាស់ប្ដូរកន្លែងការងារមន្ត្រីរដ្ឋាភិបាលប៉ុណ្ណោះ។
លោកនាយករដ្ឋមន្ត្រី ហ៊ុន សែន និងជាប្រធាននៃគណបក្សកាន់អំណាច អះអាងនៅក្នុងកិច្ចប្រជុំសភានោះថា ការរុះរើគណៈរដ្ឋមន្ត្រីនៅពេលនេះ គឺធ្វើទៅតាមការចង់បានរបស់ប្រជាពលរដ្ឋ តែលោកក៏អរគុណដល់បក្សប្រឆាំង ដែលភាគច្រើនមិនបោះឆ្នោតគាំទ្រចំពោះការរុះរើនេះ៖ «ខ្ញុំសូមយកឱកាសនេះថ្លែងអំណរគុណចំពោះសមាជិក សមាជិកាគណបក្សសង្រ្គោះជាតិ ដែលបានលើកឡើងថា នឹងមិនបោះឆ្នោតគាំទ្រនោះទេ សូមអរគុណណាស់! ព្រោះថា គណបក្សប្រជាជន មិនត្រូវការសំឡេងរបស់អស់លោកអ្នកនោះទេ ហើយថា បើបោះឆ្នោតនាំតែគណបក្សប្រជាជន ជំពាក់គុណរបស់ឯកឧត្ដម លោកជំទាវ អ៊ីចឹងសូមមេត្តាកុំបោះឆ្នោតអោយសោះ»។
ជាលទ្ធផលក្នុងការបោះឆ្នោតចំពោះការរុះរើនេះ មានតំណាងរាស្ត្រគណបក្សសង្រ្គោះជាតិ តែ ២រូបទេបានបោះឆ្នោតគាំទ្រ ខណៈតំណាងរាស្ត្រគណបក្សប្រជាជនកម្ពុជា មានតែ ៦៨សំឡេង។ ភ្លាមៗនោះ លោក ហ៊ុន សែន បង្ហាញទឹកមុខញញឹមញញែមដើរចេញពីកៅអី និងបានយកទូរស័ព្ទរបស់លោកមកថតលទ្ធផលបោះឆ្នោត។
សមាសភាពគណៈរដ្ឋមន្ត្រីដែលរដ្ឋាភិបាលទើបស្នើឲ្យរុះរើថ្មីៗនេះ និងត្រូវបានសភាអនុម័តនោះ រួមមាន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ លោក ហោ ណាំហុង ឧបនាយករដ្ឋមន្ត្រីប្រចាំការ លោក គាត ឈន់ ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក អ៊ឹម ឈុនលឹម ត្រូវបញ្ចប់មុខងារតាមសំណើសាមីជន ប៉ុន្តែបានឈរឈ្មោះជាសមាជិកក្រុមប្រឹក្សាធម្មនុញ្ញ តែរក្សាមុខងារឲ្យ លោក ហោ ណាំហុង ជាឧបនាយករដ្ឋមន្ត្រីដដែល។
ចំណែករដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ប្រាក់ សុខុន ត្រូវតែងតាំងជាទេសរដ្ឋមន្ត្រី និងប្ដូរទៅកាន់ជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ។ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ត្រូវដំឡើងឋានៈជាទេសរដ្ឋមន្ត្រីបន្ថែមលើមុខងារបច្ចុប្បន្ន។
រដ្ឋមន្ត្រីក្រសួងពាណិជ្ជកម្ម លោក ស៊ុន ចាន់ថុល ត្រូវតែងតាំងជាទេសរដ្ឋមន្ត្រី និងប្ដូរទៅជារដ្ឋមន្ត្រីក្រសួងសាធារណការ និងដឹកជញ្ជូន ជំនួស លោក ត្រាំ អ៊ីវតឹក ដែលប្ដូរទៅជារដ្ឋមន្ត្រីក្រសួងប្រៃសណីយ៍ និងទូរគមនាគមន៍ វិញ។
មួយវិញទៀត រដ្ឋមន្ត្រីក្រសួងអភិវឌ្ឍន៍ជនបទ លោក ជា សុផារ៉ា ត្រូវតែងតាំងជាទេសរដ្ឋមន្ត្រី និងប្ដូរទៅជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ វិញម្ដង។
អតីតរដ្ឋមន្ត្រីក្រសួងវប្បធម៌ និងវិចិត្រសិល្បៈ លោក ហ៊ឹម ឆែម តែងតាំងជាទេសរដ្ឋមន្ត្រី និងជារដ្ឋមន្ត្រីក្រសួងធម្មការ និងសាសនា ជំនួស លោក មិន ឃិន ដែលត្រូវតែងតាំងជាទេសរដ្ឋមន្ត្រី ទទួលបន្ទុកបេសកកម្មពិសេស។
ចំណែករដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក អ៊ុក រ៉ាប៊ុន ប្ដូរទៅជារដ្ឋមន្ត្រីក្រសួងអភិវឌ្ឍន៍ជនបទ ដោយដាក់រដ្ឋលេខាធិការក្រសួងធនធានទឹក និងឧតុនិយម លោក វេង សាខុន ជំនួសមកវិញ។
រដ្ឋលេខាធិការក្រសួងពាណិជ្ជកម្ម លោក ប៉ាន សូរស័ក្តិ ត្រូវតែងតាំងជារដ្ឋមន្ត្រីក្រសួងពាណិជ្ជកម្ម។ អតីតប្រធានគណៈកម្មាធិការជាតិរៀបចំការបោះឆ្នោត លោក អ៊ឹម សួស្តី តែងតាំងជាទេសរដ្ឋមន្ត្រីទទួលបន្ទុកបេសកកម្មពិសេស។
ក្នុងនោះដែរ អភិបាលខេត្តមួយចំនួន ត្រូវប្ដូរការងារមកធ្វើជារដ្ឋលេខាធិការនៅតាមក្រសួងនានា។
ដោយឡែកមន្ត្រីជាន់ខ្ពស់គណបក្សសង្គ្រោះជាតិ លោក សុន ឆ័យ ផ្តល់បទសម្ភាសន៍ដល់វិទ្យុអាស៊ីសេរី ថា ការផ្លាស់ប្ដូរសមាសភាពរដ្ឋាភិបាលនៅពេលនេះ ផ្តល់ផលប្រយោជន៍សង្គមទាំងមូលតិចតួចណាស់។ លោកបន្តថា អ្វីដែលលោកយល់ថា ជាចំណុចវិជ្ជមាន គឺគ្រាន់តែកាត់ផ្តាច់គ្រួសារនិយមនៅក្នុងក្រសួងប៉ុណ្ណោះ ព្រោះថា រដ្ឋមន្ត្រីភាគច្រើនធ្វើឲ្យក្រសួងរបស់ខ្លួនក្លាយជាក្រសួងគ្រួសារនិយម៖«វាមានផលវិជ្ជមានខ្លះដែរ តិចតួចដែរ ដោយសារតែរដ្ឋមន្ត្រីខ្លះនៅក្នុងក្រសួង២០ ៣០ឆ្នាំ ២០ប្លាយឆ្នាំ គាត់យកគ្រួសារគាត់ បងប្អូនគាត់ទៅដាក់ពេញតែហ្នឹងទៅ ទៅជាកន្លែងរកស៊ីរបស់គ្រួសារដល់ពេលដូរទៅ វាអាចនឹងមានការកែប្រែ អ្នកថ្មីមកទៅ វាអាចនឹងល្អបន្តិចបន្តួចដែរ»។
ពាក់ព័ន្ធនឹងការអនុម័តចំពោះការដោះដូររដ្ឋមន្ត្រីជាផ្លូវការនេះ សាស្ត្រាចារ្យវិទ្យាសាស្ត្រនយោបាយ លោកបណ្ឌិត រស់ រ៉ាវុធ យល់ឃើញថា ការអនុវត្តនេះអាចមានប្រសិទ្ធភាពខ្លះ និងអត់ប្រសិទ្ធភាពខ្លះ តែលោកក៏សាទរដែរ ព្រោះនេះជាព្រឹត្តិការណ៍ប្រវត្តិសាស្ត្រមួយដែលគណបក្សកាន់អំណាចរយៈពេលជាង ៣០ឆ្នាំមកនេះ ដោះដូររដ្ឋមន្ត្រីខ្លួនឯងនៅពាក់កណ្ដាលអាណត្តិ។ ការដោះដូរនេះជាការបង្ហាញពីភាពអសកម្មការងាររបស់ពួកគេ៖«រដ្ឋមន្ត្រីមួយចំនួនមិនបានដោះស្រាយនូវបញ្ហាប្រឈមរបស់ប្រជាពលរដ្ឋមួយចំនួនទៀតមានចូលនិវត្តន៍»។
ទោះបីជា លោក ហ៊ុន សែន ថ្លែងថា ការផ្លាស់ប្ដូរ និងបំពេញបន្ថែមសមាសភាពរដ្ឋាភិបាលរបស់ជាការចង់បានរបស់ពលរដ្ឋ ប៉ុន្តែសង្គមស៊ីវិល និងបក្សប្រឆាំងថា កំណែទម្រង់នៅពេលនេះ គ្រាន់តែជាការប្ដូរកន្លែងការងារមន្ត្រីរបស់លោក និងជារូបភាពនយោបាយប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។