គណៈកម្មាធិការជាតិរៀបចំការបោះឆ្នោត (គ.ជ.ប) នឹងជ្រើសរើសអគ្គលេខាធិការ និងអគ្គលេខាធិការរងសម្រាប់ស្ថាប័នខ្លួន។ តែទោះយ៉ាងណា អ្នកនាំពាក្យ គ.ជ.ប មិនទាន់បង្ហាញឈ្មោះបុគ្គលរូបណាដែលត្រូវជ្រើសតាំងនៅថ្ងៃណានៅឡើយ ខណៈដែលការជ្រើសរើសនេះ ត្រូវការសំឡេងភាគច្រើនដាច់ខាត ឬ ៥ ភាគ ៩ នៃសមាសភាពសមាជិក គ.ជ.ប ទាំង ៩រូប។
ទាក់ទងការជ្រើសរើសតួនាទីអគ្គលេខាធិការនេះ សង្គមស៊ីវិលដែលធ្វើការឃ្លាំមើលការបោះឆ្នោត មានការយល់ឃើញផ្សេងៗគ្នា។
អ្នកនាំពាក្យនៃគណៈកម្មាធិការជាតិរៀបចំការបោះឆ្នោត លោកបណ្ឌិត ហង្ស ពុទ្ធា ឲ្យដឹងនៅថ្ងៃទី១២ ខែសីហា ថា សមាជិកទាំង ៩រូបនៃ គ.ជ.ប នឹងជ្រើសរើសផ្គូផ្គងបេក្ខភាពនានា ដើម្បីឲ្យសមស្របធ្វើជាអគ្គលេខាធិការ និងអគ្គលេខាធិការរងនៃ គ.ជ.ប។ តែទោះយ៉ាងណា អ្នកនាំពាក្យរូបនេះ បដិសេធមិនពន្យល់លម្អិតពីការជ្រើសរើសនេះនៅឡើយទេ ដោយអះអាងថា ពេលនេះ គ.ជ.ប មិនទាន់ធ្វើដល់រឿងជ្រើសរើសអគ្គលេខាធិការនៅឡើយទេ៖ «យើងមើលខ្លឹមសារច្បាប់ ធ្វើម៉េចឲ្យសំណើភាគច្រើនដាច់ខាតនោះ ប្រធាន គ.ជ.ប ចឹងធ្វើម៉េចឲ្យអ្នកទាំង ៩រូបនេះ អ្នកយល់ព្រម ៥រូបគ្រប់គ្រាន់ហើយ»។
អនុក្រឹត្យស្ដីពីការរៀបចំ និងការប្រព្រឹត្តទៅនៃអគ្គលេខាធិការដ្ឋាននៃគណៈកម្មាធិការជាតិរៀបចំការបោះឆ្នោត ចុះថ្ងៃទី១០ ខែសីហា មាត្រា៧ ចែងថា អគ្គលេខាធិការដ្ឋាននៃ គ.ជ.ប ដឹកនាំដោយអគ្គលេខាធិការ ១រូប និងអគ្គលេខាធិការរងមួយចំនួនជាជំនួយការ តាមការចាំបាច់ដែលត្រូវតែងតាំងដោយព្រះរាជក្រឹត្យ តាមសំណើរបស់ប្រធាន គ.ជ.ប បន្ទាប់ពីបានយោបល់យល់ស្របតាមសំឡេងភាគច្រើនដាច់ខាតនៃសមាសភាព គ.ជ.ប ទាំងមូល។
ទោះជាមិនទាន់ដឹងថា គ.ជ.ប ជ្រើសរើសឲ្យអ្នកណាធ្វើជាអគ្គលេខាធិការ ឬអគ្គលេខាធិការរងនៃស្ថាប័ននេះ ប៉ុន្តែអ្នកសិក្សាស្រាវជ្រាវសង្គម លោក កែម ឡី យល់ថា លោក ទេព នីថា នឹងនៅតែធ្វើជាអគ្គលេខាធិការដដែល ព្រោះគណបក្សប្រជាជនកម្ពុជា ចង់បានបុគ្គលនេះ ហើយគណបក្សប្រជាជនកម្ពុជា ក៏នៅតែមានឥទ្ធិពលលើ គ.ជ.ប ដដែល។ លោក កែម ឡី ថា បើមិនចង់ឲ្យរឿងនេះកើតឡើង លុះត្រាណាការជ្រើសរើសនោះត្រូវធ្វើឡើងដោយបើកចំហឲ្យសាធារណជនទូទៅចូលរួម និងត្រូវជ្រើសរើសដោយសំឡេង ២ ភាគ ៣៖ «ខ្ញុំគិតថា បើគណបក្សប្រជាជនកម្ពុជា ចង់បាន លោក ទេព នីថា គឺបានហើយ បើចង់អ្នកផ្សេង គឺអ្នកផ្សេង»។
វិទ្យុអាស៊ីសេរី មិនអាចសុំការបំភ្លឺពី លោក ទេព នីថា ដែលកំពុងកាន់តួនាទីជាអគ្គលេខាធិការសព្វថ្ងៃនេះនៅឡើយទេ។ ចំណែកអ្នកនាំពាក្យ គ.ជ.ប លោក ហង្ស ពុទ្ធា បញ្ជាក់ថា អ្នកកាន់តួនាទីក្បាលម៉ាស៊ីននៅក្នុងអគ្គលេខាធិការដ្ឋាន អាចនឹងមានមន្ត្រីដែលធ្វើការងារនេះស្រាប់។
ទាក់ទងបញ្ហានេះ លោក គល់ បញ្ញា នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (COMFREL) ស្នើឲ្យមានការកំណត់លក្ខណៈសម្បត្តិជាក់លាក់ និងដំណើរការជ្រើសរើស ត្រូវធ្វើឡើងដោយបើកចំហចំពោះតំណែងអគ្គលេខាធិការ ឬអគ្គលេខាធិការរង។ លោក គល់ បញ្ញា បញ្ចេញទស្សនៈថា គ.ជ.ប ថ្មី គួរតែជ្រើសរើសអគ្គលេខាធិការរបស់ខ្លួនជាមនុស្សថ្មី ដែលមិនមែនជា លោក ទេព នីថា៖ «គ.ជ.ប ថ្មី គេរើសអ្នកប្រតិបត្តិថ្មីរបស់គេហើយ ជាពិសេសអគ្គលេខាធិការតែម្តង»។
អនុក្រឹត្យស្ដីពីការរៀបចំ និងការប្រព្រឹត្តទៅនៃអគ្គលេខាធិការដ្ឋាននៃ គ.ជ.ប តម្រូវឲ្យអគ្គលេខាធិការដ្ឋាននេះធ្វើជាជំនួយការរបស់ គ.ជ.ប នៃការបោះឆ្នោតសកល និងអសកល ព្រមទាំងមានភារកិច្ចអនុវត្តច្បាប់បោះឆ្នោត បទបញ្ជា និងនីតិវិធីសម្រាប់ការបោះឆ្នោត បទបញ្ជាផ្ទៃក្នុង សេចក្តីសម្រេច និងសេចក្តីណែនាំនានារបស់ គ.ជ.ប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។