អតីតអនុប្រធានគណបក្សហ៊្វុនស៊ិនប៉ិច លោក ញឹក ប៊ុនឆៃ គ្រោងបង្កើតគណបក្សថ្មីមួយមានឈ្មោះថា «គណបក្សខ្មែរួបរួមជាតិ»។ លោក ញឹក ប៊ុនឆៃ ថ្លែងថា គណបក្សថ្មីរបស់លោកនេះ នឹងនៅតែមាននិន្នាការរាជានិយម។
លោក ញឹក ប៊ុនឆៃ សម្រេចបង្កើតគណបក្សថ្មី ក្រោយលោកមើលឃើញថា ការដឹកនាំនៅគណបក្សហ៊្វុនស៊ិនប៉ិច ដោយសម្ដេចក្រុមព្រះ នរោត្តម រណឫទ្ធិ មានអំពើពុករលួយ បក្សពួកនិយម និងមិនស្មោះត្រង់នឹងគ្នា។ លោកអះអាងថា គណបក្សថ្មីលោកគ្រោងបង្កើតនឹងមានលក្ខណៈពិសេសជាងគណបក្សផ្សេងៗទៀត ត្រង់ថា គណបក្សនេះនឹងប្រកាន់លទ្ធិប្រជាធិបតេយ្យ មិនពុករលួយ និងមិនបក្សពួកនិយម៖ «របៀបដឹកនាំរបស់គណបក្ស (ហ៊្វុនស៊ិនប៉ិច) សព្វថ្ងៃហ្នឹង ខ្ញុំមិនពេញចិត្ត ព្រោះការដឹកនាំបែបអន្តោម័ត ការសម្រេចដោយប្រធានមួយអ៊ីចឹងទៅ ចំណុចមួយ។ ចំណុចពីរ ខ្ញុំកំពុងតែឃើញថា អាចនឹងឈានទៅមានអំពើពុករលួយ។ ខ្ញុំយល់ថា ប្រសិនបើគណបក្សនយោបាយមានអំពើពុករលួយ បើឈានទៅដឹកនាំជាតិ ក៏ធ្វើឲ្យជាតិខ្ទេចខ្ទីដែរ។ ខ្ញុំមិនពេញចិត្តទេ បក្សពួកនិយម ហើយគ្រួសារនិយមថែមទៀត»។
ការបង្កើតគណបក្សថ្មីនេះ បន្ទាប់ពីមានភាពមិនចុះសម្រុងគ្នារវាងលោក ញឹក ប៊ុនឆៃ និងសម្តេចក្រុមព្រះ នរោត្តម រណឫទ្ធិ។ កាលពីចុងខែមករា សម្ដេចក្រុមព្រះមានបន្ទូលថា «គណបក្សហ៊្វុនស៊ិនប៉ិច រលាយដោយសារអ្នកស៊ីបាយបោកឆ្នាំង» ហើយថា បើសមាជិកគណបក្សហ៊្វុនស៊ិនប៉ិច ណាម្នាក់ មិនពេញចិត្តការដឹកនាំរបស់ព្រះអង្គ ពួកគេអាចដើរចេញពីគណបក្សនេះបាន។ ប៉ុន្តែព្រះអង្គបញ្ជាក់ថា មិនបណ្ដេញអ្នកណាម្នាក់ចេញពីបក្សទេ។
ភ្លាមៗបន្ទាប់ពីការលើកឡើងនេះ លោក ញឹក ប៊ុនឆៃ រិះគន់ថា ក្រោមការដឹកនាំរបស់សម្ដេចក្រុមព្រះ គណបក្សហ៊្វុនស៊ិនប៉ិច នឹងបន្តធ្លាក់ចុះប្រជាប្រិយភាព តែយ៉ាងណា លោកប្ដេជ្ញាមិនដើរចេញពីហ៊្វុនស៊ិនប៉ិច ជាដាច់ខាត។
លោក ញឹក ប៊ុនឆៃ បញ្ជាក់ថា គណបក្សរួបរួមជាតិ ដែលនឹងកើតឡើងនៅពេលខាងមុខនេះ មានគោលនយោបាយដោះស្រាយបញ្ហាដីធ្លី អំពើពុករលួយ និងភាពអយុត្តិធម៌សង្គមជាដើម។
វិទ្យុអាស៊ីសេរី មិនអាចទាក់ទងតំណាងគណបក្សហ៊្វុនស៊ិនប៉ិច ដើម្បីឆ្លើយតបទៅនឹងគម្រោងបង្កើតបក្សថ្មីនេះបានទេ។
នៅពេលមានការលើកឡើងថា ការបង្កើតគណបក្សថ្មីនេះក្រោមជំនួយរបស់គណបក្សប្រជាជនកម្ពុជា លោក ញឹក ប៊ុនឆៃ បដិសេធថា គណបក្សនេះមិនស្ថិតក្រោមឥទ្ធិពលគណបក្សនយោបាយណាមួយនោះទេ។ លោកថា ថវិកាទ្រទ្រង់បក្សនេះ បានមកពីការបរិច្ចាគរបស់សមាជិកបក្ស។ លោកក៏ប្រកាសដែរថា គណបក្សរបស់លោកមិនមានគោលជំហរប្រឆាំងជាមួយរដ្ឋាភិបាល និងគណបក្សណានោះទេ៖ «ខ្ញុំចង់ឃើញស្ថានការណ៍នយោបាយនៅកម្ពុជា អ្នកនយោបាយចេះធ្វើការជាមួយគ្នា កុំឲ្យកន្លងមកប្រឈមដាក់គ្នា។ ប្រឈមដាក់គ្នាទៅវិញទៅមក អត់ចប់ទេ។ យើងចង់ធ្វើម៉េច អាចធ្វើការជាមួយគ្នាបាន»។
លោកស្រី កែវ សុខណា ដែលធ្វើដំណើរមកពីខេត្តពោធិ៍សាត់ ដើម្បីចូលរួមការផ្សព្វផ្សាយពីការបង្កើតបក្សថ្មីនេះ និយាយថា លោកស្រីគាំទ្រអ្នកដឹកនាំបក្សថ្មីនេះ ព្រោះពួកគាត់ធ្លាប់ជួយដោះស្រាយបញ្ហាស្ត្រីនៅតាមមូលដ្ឋានបានទាន់ពេលវេលា។
លោក ញឹក ប៊ុនឆៃ កាលពីឆ្នាំ២០០៦ បានដឹកនាំធ្វើបក្សប្រហារទម្លាក់សម្ដេចក្រុមព្រះចេញពីប្រធានគណបក្ស ដោយចោទប្រកាន់ថា សម្ដេចក្រុមព្រះបានប្រព្រឹត្តអំពើពុករលួយ និងលក់ទីស្នាក់ការកណ្ដាលរបស់គណបក្សនៅក្បែរស្ពានជ្រោយចង្វារ ក៏ប៉ុន្តែសម្ដេចក្រុមព្រះបានវិលត្រឡប់មកដឹកនាំគណបក្សហ៊្វុនស៊ិនប៉ិច ជាថ្មីឡើងវិញ កាលពីដើមឆ្នាំ២០១៥ ក្រោយពីមានការអំពាវនាវពីមន្ត្រីគណបក្សហ៊្វុនស៊ិនប៉ិច។ យ៉ាងណា ការបង្រួបបង្រួមបក្សរាជានិយមនេះ មិនទាន់ទាំងបានដំណើរការស្រួលបួលផង ការបែកបាក់ក៏កំពុងកើតឡើងជាថ្មីទៀត។
សូមស្ដាប់បទសម្ភាសន៍បន្ថែមរវាងលោក ជុន ច័ន្ទបុត្រ និងលោក ញឹក ប៊ុនឆៃ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។