អតីតប្រធានគណបក្សសង្គ្រោះជាតិ គឺលោក សម រង្ស៊ី ថ្លែងដោយសង្ឃឹមថា គណបក្សសង្គ្រោះជាតិ នឹងឈ្នះឆ្នោតលើសលប់នៅពេលខាងមុខនេះ។ សេចក្ដីថ្លែងការណ៍របស់លោក គឺក្នុងកិច្ចពិភាក្សាលក្ខណៈរង្វង់គ្រួសារខ្មែរមួយនៅជិតទីក្រុងប៉ារីស ស្ដីពីការវិវឌ្ឍន៍នយោបាយនៅប្រទេសកម្ពុជា ក្នុងឆ្នាំ២០១៧ និងឆ្នាំ២០១៨។
លោក សម រង្ស៊ី ថ្លែងក្នុងវីដេអូតាមទំព័រហ្វេសប៊ុក (facebook) របស់លោក ក្នុងកិច្ចពិភាក្សានោះកាលពីថ្ងៃទី១៥ មេសា ថា គណបក្សសង្គ្រោះជាតិ នឹងឈ្នះឆ្នោតភ្លូកទឹកភ្លូកដីនៅពេលបោះឆ្នោតក្នុងឆ្នាំ២០១៧ និងឆ្នាំ២០១៨។
លោក សម រង្ស៊ី ថ្លែងដោយក្ដីសង្ឃឹមបែបនេះ ព្រោះលោកយល់ថាមានសន្ទុះគាំទ្រពីអ្នកនៅក្នុងជួរគណបក្សកាន់អំណាច ដែលពេលនេះនៅសម្ងំសុខ រក្សាតំណែង ការពារសុវត្ថិភាពខ្លួន មិនហ៊ាននិយាយស្ដី និងមិនទាន់ចាប់គណបក្សសង្គ្រោះជាតិ ដោយសារមិនទាន់ឃើញថា គណបក្សសង្គ្រោះជាតិ ខ្លាំង៖ « ប៉ុន្តែដល់ពេលបោះឆ្នោតឃុំហើយ បោះឆ្នោតព្រឹទ្ធសភាហើយ ឃើញ ថាគណបក្ស សង្គ្រោះជាតិ នឹងឈ្នះថ្នាក់ជាតិ អាហ្នឹងឈ្នះផ្ដាច់ព្រ័ត្រ។ ពេលហ្នឹងគេលែងហើយ គឺខុសគ្នាតែ ៦ខែទេ គេនឹងលែងគណបក្សកាន់អំណាច គេនឹងមកគាំទ្រគណបក្សសង្គ្រោះជាតិ។ អ៊ីចឹងជ័យជម្នះខែ៧ បោះឆ្នោតជ្រើសរើសតំណាងរាស្ត្រថ្មី នាយករដ្ឋមន្ត្រី ថ្មី គឺនឹងទទួលជ័យជម្នះភ្លូកទឹកភ្លូកដី ជ័យជម្នះកាន់តែធំឡើងៗអត់មានថយក្រោយទេ » ។
ទន្ទឹមគ្នានឹងក្ដីសង្ឃឹមនេះ ព្រោះលោកក្ដាប់បានព័ត៌មានថា ការរៀបចំការបោះឆ្នោតខាងមុខនេះ នឹងមិនមានអ្វីជាបញ្ហាគ្រោះថ្នាក់ទេ ហើយការប៉ុនប៉ងលួចចូលទៅកែឈ្មោះ ក៏ធ្វើមិនបានដែរ។ ត្រង់នេះហើយដែលលោកជឿថា ការបោះឆ្នោតនៅពាក់កណ្ដាលឆ្នាំនេះ នឹងឆ្លុះបញ្ចាំងឆន្ទៈប្រជារាស្ត្រចាប់ផ្ដើមផ្លាស់ប្ដូរនៅថ្នាក់មូលដ្ឋាន ដែលជឿថាគណបក្សលោក នឹងមានមេឃុំចៅសង្កាត់យ៉ាងតិចពាក់កណ្ដាល៖ « អ៊ីចឹងខ្ញុំនិយាយអម្បាញ់មិញថា គណបក្សសង្គ្រោះជាតិ ទទួលបានសំឡេង និង តំណែងជា សមាជិក ក្រុមប្រឹក្សា ឃុំ - សង្កាត់ ច្រើនជាងគណបក្សគេមួយទៀត ដូច្នេះអង្គបោះឆ្នោតរបស់យើង គឺច្រើនជាងគណបក្សគេមួយទៀត បោះឆ្នោតជ្រើសរើសសមាជិកព្រឹទ្ធសភា។ អ៊ីចឹង តំណែងព្រឹទ្ធសភា នឹងបានមកគណបក្សសង្គ្រោះជាតិ ច្រើនលើសលប់លើសគណបក្សគេមួយទៀត។ អ៊ីចឹងយើង ព្រឹទ្ធសភាច្រើនជាងគណបក្សគេមួយទៀត។ ដល់ពេលបោះឆ្នោតព្រឹទ្ធសភាហើយ ព្រឹទ្ធសភាគេ ប្រជុំ ពេញអង្គ ដើម្បីបោះឆ្នោតរើសប្រធានព្រឹទ្ធសភា។ អ៊ីចឹងបើយើងមានសមាជិកព្រឹទ្ធសភាច្រើនជាងគេ គឺប្រធានព្រឹទ្ធសភា គឺមកពីគណបក្សសង្គ្រោះជាតិ។ អ៊ីចឹងគឺលើកទីមួយហើយ ឆ្នាំ២០១៧ បោះឆ្នោតថ្នាក់មូលដ្ឋាន។ ដល់ចូល ដល់ឆ្នាំ២០១៨ ភ្លាម ខែ១ គឺបោះឆ្នោតព្រឹទ្ធសភា គឺ ថ្នាក់ជាតិ គឺស្ថាប័ន ហើយស្ថាប័នជាតិ ដំបូងដែល គណបក្សសង្គ្រោះជាតិ ដឹកនាំ គឺព្រឹទ្ធសភា ខែ១ ឆ្នាំ២០១៨ ។ ៦ខែបន្ទាប់ គឺបោះឆ្នោតថ្នាក់ជាតិ ខែ៧ ឆ្នាំ២០១៨ »។
ទាក់ទងនឹងសេចក្ដីថ្លែងការណ៍របស់លោក សម រង្ស៊ី មន្ត្រីនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា ជ័យជម្នះនេះ លោក សម រង្ស៊ី ថ្លែង ២៣ឆ្នាំមកហើយ៖ «យើងដឹងហើយថា សម រង្ស៊ី ជាមេប្រឆាំង។ អ៊ីចឹងគាត់និយាយវាផ្ទុយរហូត។ កាលណាគាត់និយាយថាឈ្នះ វាចាញ់ហើយ អាហ្នឹងវាធម្មតា។ បើយើងនិយាយទៅ ពាក្យខ្មែរវាផ្ទុយ។ កាលណាវាឈ្នះ គឺចាញ់ កាលណានិយាយខ្មៅវាស និយាយថាអត់អភិវឌ្ឍន៍ វាមានអភិវឌ្ឍន៍។ អាហ្នឹងតាមចិត្តអ៊ីចឹង ព្រោះគាត់ជាអ្នកប្រឆាំងទៅហើយ។ ពាក្យប្រឆាំងវាផ្ទុយពីអ្នកកាន់អំណាច។ ពិតជាមានការទាក់ទងគ្នានឹងក្រុមប្រឹក្សាឃុំ-សង្កាត់ហ្នឹងហើយ បើកាលណាគាត់ឈ្នះក្រុមប្រឹក្សាឃុំ-សង្កាត់ច្រើន អាហ្នឹងវាមានឥទ្ធិពលទៅដល់អង្គស្ថាប័នព្រឹទ្ធសភា ក៏ប៉ុន្តែការស្រែកឈ្នះរបស់គាត់នោះ វាអត់មានឈ្នះផង ធ្វើម៉េចបានទៅព្រឹទ្ធសភាកើត ?»។
ឆ្លើយតបនឹងសំណួរថា តើសេចក្ដីថ្លែងការណ៍នេះធ្វើឲ្យគណបក្សប្រជាជនកម្ពុជា ព្រួយបារម្ភពីការបាត់បង់ ឬថយសំឡេងឆ្នោតគាំទ្រនៅពេលបោះឆ្នោតឬទេ? លោក សុខ ឥសាន មានប្រសាសន៍ថា គណបក្សលោកមិនភ្ញាក់ផ្អើលទេ៖ « និយាយរួម គឺគណបក្សប្រជាជន មិនឆាប់រអើលទេ។ គ្រាន់តែឮមាន់រត់ប៉ះប៉ោតធ្លាក់ក្ដុងក្ដាំង ថា គ្រាប់បែកដែរ គណបក្សប្រជាជន មិនដែលផ្អើលរបៀបអ៊ីចឹងទេ មានតែគណបក្សផ្សេង ទេដែល ផ្អើល » ។
ប្រទេសកម្ពុជា នឹងរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅថ្ងៃទី៤ ខែមិថុនា ឆ្នាំ២០១៧។ រហូតមកដល់ពេលនេះ មានគណបក្សនយោបាយចំនួន១២ បានចុះបញ្ជីចូលរួមប្រកួតប្រជែងយកសំឡេងគាំទ្រនៅក្នុងការបោះឆ្នោតឃុំ-សង្កាត់នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។