អតីតប្រធានគណបក្សសង្គ្រោះជាតិ លោក សម រង្ស៊ី រំពឹងថានឹងមានពលករចំណាកស្រុកទាំងនៅក្នុង និងនៅក្រៅប្រទេសប្រមាណជិត ២លាននាក់ នឹងបានមកចូលរួមបោះឆ្នោតជ្រើសតាំងតំណាងរាស្ត្រអាណត្តិទី៦ នៅក្នុងឆ្នាំ២០១៨ ខាងមុខ។
ថ្លែងទៅកាន់អ្នកគាំទ្រនៅទីក្រុងឡុងប៊ិច (Long Beach) រដ្ឋកាលីហ្វ័រញ៉ា (California) សហរដ្ឋអាមេរិក កាលពីថ្ងៃទី១៨ មិថុនា ដែលលោកទើបបង្ហោះវីដេអូឃ្លីបនៅលើហ្វេសប៊ុក (facebook) លោក សម រង្ស៊ី មានប្រសាសន៍ថា កម្មករក្នុងស្រុកជាង ៧សែននាក់ និងពលករខ្មែរនៅប្រទេសថៃ ប្រមាណ ១លាននាក់ មិនបានចូលរួមបោះឆ្នោតឃុំ-សង្កាត់ឆ្នាំ២០១៧ នឹងត្រៀមខ្លួនចូលរួមបោះឆ្នោតថ្នាក់ជាតិឆ្នាំ២០១៨ ខាងមុខ។ លោកថា មានតែរដ្ឋាភិបាលថ្មីដឹកនាំដោយគណបក្សសង្គ្រោះជាតិ ទេ ដែលអាចផ្លាស់ប្ដូរនយោបាយថ្នាក់ជាតិ ដែលអាចលើកស្ទួយជីវភាពកម្មករ និងពលករបាន៖ « តែឆ្នាំក្រោយ បោះឆ្នោតឲ្យរដ្ឋាភិបាលថ្មី រដ្ឋាភិបាលសង្គ្រោះជាតិ នឹងដំឡើងប្រាក់ខែឲ្យកម្មករ នយោបាយថ្នាក់ជាតិ រដ្ឋាភិបាលសង្គ្រោះជាតិ នឹងកំណត់ច្បាស់ការងារការពារកម្មករកុំ ឲ្យគេ ដេញ គេជិះជាន់តាមចិត្ត ដែលប៉ះពាល់ដល់ជីវិតអនាគតជីវភាពរបស់គាត់ ។ ពេលនោះ កម្មករត្រូវចេញមុខ។ កម្មករគាត់ថា ឆ្នាំក្រោយបើគេមិនឲ្យឈប់ គាត់ថាកាត់អីកាត់ទៅ ព្រោះបោះឆ្នោតឲ្យសង្គ្រោះជាតិ បានឡើងប្រាក់ខែ មួយជីវិត ហើយជីវភាពកម្មករច្បាស់ជារុងរឿងជាងមុនឆ្ងាយ ។ គាត់ត្រៀមហើយ »។
ទាក់ទងករណីនេះដែរ មន្ត្រីគណបក្សប្រឆាំងបានស្នើជាថ្មីម្តងទៀតឲ្យរដ្ឋាភិបាលបង្កលក្ខណៈងាយស្រួលដល់ការចុះឈ្មោះបោះឆ្នោតសម្រាប់ពលករចំណាកស្រុក តាមរយៈការបង្កើនចំនួនការិយាល័យចុះឈ្មោះបោះឆ្នោតនៅក្បែរព្រំដែនថៃ។
សេចក្ដីប្រកាសរបស់គ.ជ.ប ស្ដីពីប្រតិទិននៃការចាប់ផ្ដើមធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោតនៅតាមឃុំ-សង្កាត់ ឲ្យដឹងថា ការចុះឈ្មោះអ្នកបោះឆ្នោតសម្រាប់បម្រើដល់ការបោះឆ្នោតជ្រើសរើសតំណាងរាស្ត្រ នឹងចាប់ផ្ដើមនៅថ្ងៃទី១ ខែកញ្ញា ដល់ថ្ងៃទី៩ ខែវិច្ឆិកា ឆ្នាំ២០១៧៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។