មន្ត្រីបក្សសង្គ្រោះជាតិអះអាងនៅថ្ងៃទី១៧ កក្កដា ថា លោក សម រង្សី ប្រធានបក្សសង្គ្រោះជាតិ នឹងវិលពីស្រុកបារាំង មកកម្ពុជាវិញនៅចុងសប្ដាហ៍នេះ។
អ្នកនាំពាក្យបក្សសង្គ្រោះជាតិ លោក យឹម សុវណ្ណ ឲ្យដឹងនៅរសៀលថ្ងៃទី១៧ កក្កដា ថា លោក សម រង្ស៊ី នឹងមកដល់កម្ពុជា នៅម៉ោង៩ ព្រឹកថ្ងៃទី១៩ កក្កដា តាមជើងយន្តហោះថៃអ៊ែរវ៉េ។
ការវិលត្រឡប់មកស្រុកវិញយ៉ាងតក់ក្រហល់នេះ ក្រោយពេលប្រធានស្ដីទីបក្ស លោក កឹម សុខា ត្រូវបានតុលាការកោះហៅឲ្យចូលបំភ្លឺនៅថ្ងៃទី១៨ កក្កដា ខាងមុខនេះ ពាក់ព័ន្ធរឿងហិង្សាកើតឡើងរវាងកងសន្តិសុខ និងក្រុមបាតុករបក្សសង្គ្រោះជាតិនៅស្ពាននាគ ក្បែរទីលានប្រជាធិបតេយ្យ រាជធានីភ្នំពេញ កាលពីថ្ងៃទី១៥ កក្កដា កន្លងទៅនេះ។
លោក យឹម សុវណ្ណ បន្តថា យ៉ាងហោចណាស់មានមន្ត្រីបក្សសង្គ្រោះជាតិប្រហែល ២០ នាក់ទៀតកំពុងនៅក្រៅប្រទេសដែលត្រូវវិលចូលស្រុកវិញបន្ទាន់ដូចជា៖ នៅអាមេរិក បារាំង កាណាដា និងអូស្ត្រាលី ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។