មន្ត្រីជាន់ខ្ពស់នៃទីស្ដីការគណៈរដ្ឋមន្ត្រីដែលស្និទ្ធនឹងក្រុមគ្រួសាររបស់លោកឧបនាយករដ្ឋមន្ត្រី សុខ អាន ឲ្យដឹងថា នៅពេលនេះ លោក សុខ អាន ត្រូវបានបញ្ជូនចេញពីមន្ទីរពេទ្យប្រទេសបារាំង ទៅព្យាបាលនៅប្រទេសសិង្ហបុរី វិញ។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ឲ្យអាស៊ីសេរីដឹងនៅថ្ងៃទី១២ ខែមីនា នេះថា មូលហេតុដែលត្រូវបញ្ជូនលោក សុខ អាន ដែលជារដ្ឋមន្ត្រីនៃទីស្ដីការគណៈរដ្ឋមន្ត្រីទៅព្យាបាលបន្តនៅប្រទេសសិង្ហបុរី វិញនេះ ព្រោះនៅជិតកម្ពុជា ជាងប្រទេសបារាំង ដែលបង្កភាពងាយស្រួលដល់មន្ត្រីក្រោមឱវាទសុំយោបល់ពីលោក សុខ អាន មុនសម្រេចការងារអ្វីមួយ។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បញ្ជាក់ថា ព័ត៌មានចុងក្រោយដែលលោកទទួលបានពីក្រុមគ្រួសាររបស់លោក សុខ អាន នៅថ្ងៃទី១២ ខែមីនា គឺលោក សុខ អាន មានសុខភាពល្អប្រសើរ ប៉ុន្តែលោកមិនទាន់ដឹងថា លោក សុខ អាន នឹងវិលត្រឡប់មកបំពេញការងារវិញនៅពេលណានោះទេ៖ « តាមអ្នកជិតស្និទ្ធជាមួយលោក និងក្រុមគ្រួសារដែលខ្ញុំបានសួរថា គាត់ ( លោក សុខ អាន ) បានប្រសើរ គេប្រាប់អ៊ីចឹងថា មិនអីទេ។ ដំណឹងថាមរណភាពហ្នឹងមិនត្រឹមត្រូវទេ ពីព្រោះខ្ញុំសួរក្រុមគ្រួសារគាត់។ ក្រុមគ្រួសារគេប្រាប់អ៊ីចឹង ជួនកាលមួយរយៈកន្លងមកយើងមុននឹងសម្រេចអី យើងទូរស័ព្ទទៅសួរលោក»។
ការឲ្យដឹងរបស់លោក ផៃ ស៊ីផាន នៅពេលនេះ គឺជាការឆ្លើយតបទៅនឹងបណ្ដាញសារព័ត៌មានមួយចំនួន និងអ្នកប្រើប្រាស់បណ្ដាញសង្គមហ្វេសប៊ុក (facebook) សរសេរថា លោក សុខ អាន ទទួលមរណភាពហើយ។ ប៉ុន្តែលោក ផៃ ស៊ីផាន ចោទប្រកាន់ព័ត៌មាននេះថា ជាពាក្យចចាមអារ៉ាមដែលប្រមាថដល់អាយុជីវិតថ្នាក់ដឹកនាំកំពូលប៉ុណ្ណោះ។
នៅរយៈពេលចុងក្រោយនេះ គេមិនបានឃើញលោក សុខ អាន ដែលជាតំណាងរាស្ត្រគណបក្សប្រជាជនកម្ពុជា និងជាឧបនាយករដ្ឋមន្ត្រី កាន់ការងាររដ្ឋាភិបាលដ៏ច្រើននោះ បង្ហាញមុខជាសាធារណៈ ឬចូលប្រជុំសភានោះទេ។ ប៉ុន្តែលោក ផៃ ស៊ីផាន ថាលោក សុខ អាន ទើបធ្វើដំណើរចុះឡើងទៅព្យាបាលជំងឺនៅក្រៅប្រទេសកាលពីពេលថ្មីៗនេះប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។