ប្រមុខកងទ័ពថៃ សុំទោសចំពោះការបាញ់សម្លាប់ពលរដ្ឋកម្ពុជា ដែលឆ្លងដែនចូលទឹកដីថៃ កន្លងទៅ។ ទន្ទឹមគ្នានេះ ភាគីទាំងពីរ គឺថៃ និងកម្ពុជា ព្រមព្រៀងគ្នាលើការជំរុញគោរពច្បាប់ និងនីតិវិធីនៃគោលការណ៍មនុស្សធម៌។
ការសុំទោសរបស់ថៃ គឺធ្វើឡើងដោយឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃ លោក ប្រាវីត វង្សសុវណ្ណ (Prawit Wongsuwan) ក្នុងឱកាសដឹកនាំកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ លើកទី១០ រួមគ្នាជាមួយរដ្ឋមន្ត្រីក្រសួងការពារជាតិកម្ពុជា លោក ទៀ បាញ់ នារាជធានីភ្នំពេញនៅព្រឹកថ្ងៃទី២៤ ធ្នូ៖ «ចំពោះបញ្ហារឿងនេះ ខាងភាគីថៃ ក៏បានធ្វើការសុំទោស ហើយយើងក៏បានសងនូវអ្វីដែលបានខូចខាតមួយចំនួនខ្លះៗហើយបាទ»។
ទាក់ទងនឹងបញ្ហានេះដែរ ខាងភាគីរដ្ឋមន្ត្រីក្រសួងការពារជាតិ លោក ទៀ បាញ់ ថ្លែងថា រឿងបាញ់សម្លាប់ពលរដ្ឋកម្ពុជា នេះជារឿងកើតឡើងម្ដងម្កាលដោយការភ័ន្តច្រឡំ។ លោកថា ភាគីទាំងពីរតែងជួបដោះស្រាយ និងទាក់ទងគ្នា ដើម្បីកាត់បន្ថយករណីនេះ។ ប៉ុន្តែលោកមិនបានបញ្ជាក់ពីវិធានការជាក់លាក់លើអ្នកបាញ់សម្លាប់ពលរដ្ឋខ្មែរទាំងនោះទេ៖ «សូមជម្រាបថា រឿងទោសពៃរ៍នេះ ត្រូវផ្អែកទៅតាមភស្តុតាងទាំងឡាយ ផ្អែកតាមបទល្មើសដែលមានពិតប្រាកដ។ ដូច្នេះ បើសិនជារកឃើញពិតប្រាកដថា នោះមានចេតនា ឬហៅថា រំលោភបំពានពិតប្រាកដនូវអ្វីដែលយើងតែងតែជួបសន្យាធ្វើការជាមួយគ្នា គឺច្បាស់ណាស់ មិនថាខាងយើងកម្ពុជា ឬមិនថាខាងថៃ ទេ គឺសុទ្ធសឹងថាត្រូវបំពេញទាំងអស់កិច្ចការហ្នឹង»។
កាលពីថ្ងៃទី១៣ ធ្នូ កន្លងទៅ ទាហានការពារព្រំដែនថៃ ខេត្តសុរិន្ទ បានបញ្ជូនសាកសពស្ត្រីខ្មែរខេត្តឧត្តរមានជ័យ ម្នាក់ ដែលខ្លួនបានបាញ់សម្លាប់ មកឱ្យក្រុមគ្រួសារវិញ។ ស្ត្រីខ្មែរដែលត្រូវអាជ្ញាធរថៃ នៃខេត្តសុរិន្ទ បាញ់ស្លាប់ គឺនៅពេលគាត់ដើរជីកមើមដំឡូងព្រៃសម្រាប់គ្រួសារហូប និងលក់ទិញអង្ករ។
ក្នុងកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ លើកទី១០ ដែលដឹកនាំដោយសហប្រធាននាយឧត្ដមសេនីយ៍ រដ្ឋមន្ត្រីក្រសួងការពារជាតិថៃ លោក ប្រាវីត វង្សសុវណ្ណ និងកម្ពុជា លោក ទៀ បាញ់ គឺដើម្បីអនុវត្តនូវកិច្ចព្រមព្រៀងបង្កើតគណៈកម្មាធិការព្រំដែនទូទៅរវាងប្រទេសទាំងពីរ និងពង្រឹងកិច្ចសហប្រតិបត្តិការគ្នាទៅវិញទៅមក ក្នុងវិស័យដូចជា ទី១ កិច្ចសហប្រតិបត្តិការបង្កើនសន្តិសុខ និងថែរក្សាសន្តិភាពក្នុងតំបន់ព្រំដែននៃប្រទេសទាំងពីរ ក្នុងក្របខ័ណ្ឌនៃគណៈកម្មាធិការព្រំដែនទូទៅ។ ការឯកភាពនេះ គឺរួមទាំងកិច្ចសហប្រតិបត្តិការចាត់ចែងកម្លាំងពលកម្មអន្តោប្រវេសន៍ក្នុងប្រទេសថៃ ស្របតាមកិច្ចព្រមព្រៀងរបស់អាជ្ញាធរពាក់ព័ន្ធនៃប្រទេសទាំងពីរ។ ទី២ ការបង្ការ និងបង្ក្រាបការរត់ពន្ធមនុស្ស ការកេងប្រវ័ញ្ចកម្លាំងពលកម្ម និងរាល់សកម្មភាពល្មើសច្បាប់ទាំងឡាយក្នុងតំបន់ព្រំដែន រួមមាន ការជួញដូរគ្រឿងញៀន ការកាប់ឈើខុសច្បាប់ ការកាប់បំផ្លាញព្រៃឈើ និងរាល់សកម្មភាពឆ្លងដែនខុសច្បាប់។ ភាគីទាំងពីរ ក៏បានព្រមព្រៀងគ្នាជំរុញសហប្រតិបត្តិការលើសន្តិសុខផ្ទៃសមុទ្រ ការគោរពច្បាប់ និងនីតិវិធីនៃគោលការណ៍មនុស្សធម៌។ ទី៣ ការលើកកម្ពស់ជីវភាពរស់នៅរបស់ពលរដ្ឋនៅតាមបណ្ដោយព្រំដែន ដូចជាការធ្វើពាណិជ្ជកម្មនៅព្រំដែន ដូចជាតំបន់សេដ្ឋកិច្ចពិសេស កសិកម្ម សុខភាពសាធារណៈ ទេសចរណ៍ ការអប់រំ សាសនា និងវប្បធម៌។ ទី៤ បង្កើនកិច្ចសហប្រតិបត្តិការរវាងកងសន្តិសុខតំបន់ព្រំដែននៃប្រទេសទាំងពីរ ដើម្បីរក្សាសន្តិភាព និងសន្តិសុខឱ្យបានជានិរន្ត។ ទី៥ សហការប្រយុទ្ធប្រឆាំងភេរវកម្ម រួមទាំងការត្រួតពិនិត្យយ៉ាងម៉ត់ចត់នូវសកម្មភាពរបស់ភេរវករ និងការជួញដូរអាវុធ តាមរយៈការប្ដូរព័ត៌មានរវាងអាជ្ញាធរនៃប្រទេសទាំងពីរ ដើម្បីថែរក្សាសន្តិសុខ និងសុវត្ថិភាពក្នុងតំបន់ព្រំដែន។
ភាគីព្រះរាជាណាចក្រថៃ នឹងធ្វើជាម្ចាស់ផ្ទះនៃកិច្ចប្រជុំគណៈកម្មាធិការព្រំដែនទូទៅលើកទី១១។ រីឯពេលវេលា និងកម្មវិធីជាក់លាក់ នឹងជូនដំណឹងនៅពេលក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។