ព្រះមហាក្សត្រព្រះករុណាព្រះបាទសម្ដេច ព្រះបរមនាថ នរោត្តម សីហមុនី និងសម្ដេចព្រះមហាក្សត្រីយ៍នរោត្តម មុនីនាថ សីហនុ ព្រះអង្គបានយាងមកដល់រាជធានីភ្នំពេញវិញហើយ នៅរសៀលថ្ងៃទី១ មករា ក្រោយពីទ្រង់យាងទៅគង់នៅព្រះរាជដំណាក់នៅក្រុងព្រះសីហនុ ចំនួន ២យប់ ដើម្បីចូលរួមជាមួយពលរដ្ឋខ្មែរក្នុងពិធីឆ្លងឆ្នាំនៅទីនោះ។
កាលពីថ្ងៃទី៣០ ធ្នូ ព្រះអង្គទាំងទ្វេអមព្រះរាជដំណើរដោយរាជវង្សានុវង្ស ព្រមទាំងលោកនាយករដ្ឋមន្ត្រី ហ៊ុន សែន និងភរិយាផង បានយាងតាមរទេះភ្លើងពីរាជធានីភ្នំពេញ ទៅកាន់ក្រុងព្រះសីហនុ ដោយឆ្លងកាត់ខេត្តតាកែវ និងខេត្តកំពត។ ពលរដ្ឋច្រើនពាន់នាក់ បានរង់ចាំទទួលព្រះរាជដំណើររបស់ព្រះអង្គ។
នេះជាលើកទី១ ហើយដែលព្រះមហាក្សត្រយាងតាមរទេះភ្លើងទៅកាន់ក្រុងព្រះសីហនុ ចាប់តាំងពីសេវាកម្មធ្វើដំណើរតាមរថភ្លើងពីភ្នំពេញទៅកាន់ខេត្តព្រះសីហនុ ត្រូវបានរៀបចំឲ្យប្រសើរឡើង និងដាក់ឲ្យដំណើរការកាលពីខែមេសា ឆ្នាំ២០១៦។
ផ្លូវរថភ្លើងពីរាជធានីភ្នំពេញ ឆ្ពោះទៅកាន់ខេត្តព្រះសីហនុ គឺជាស្នាព្រះហស្តរបស់អតីតព្រះបិតាជាតិខ្មែរ ព្រះបរមរតនកោដ្ឋ សម្ដេចព្រះនរោត្តម សីហនុ ដែលព្រះអង្គបានកសាងឡើងនៅក្នុងសម័យសង្គមរាស្ត្រនិយម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។