ក្រុមស្រាវជ្រាវព្រំដែននៃរាជបណ្ឌិត្យសភាកម្ពុជា ស្នើឲ្យគណបក្សសង្គ្រោះជាតិ រកផែនទី ២ផ្ទាំងបន្ថែមទៀត ដើម្បីទៅពិនិត្យផ្ទៀងផ្ទាត់ជាមួយផែនទីរបស់រដ្ឋាភិបាលសរុបចំនួន ២៦ផ្ទាំង។ ការស្នើនេះ ធ្វើឡើងនៅក្នុងសន្និសីទសារព័ត៌មាន ស្ដីពីការផ្ទៀងផ្ទាត់ផែនទីប្រទេសកម្ពុជា ជាមួយប្រទេសវៀតណាម នៅព្រឹកថ្ងៃទី១៤ ខែសីហា នារាជបណ្ឌិត្យសភាកម្ពុជា។ រហូតមកទល់ពេលនេះ ក្រុមស្រាវជ្រាវព្រំដែនកម្ពុជា ទទួលផែនទីពីគណបក្សសង្គ្រោះជាតិ បាន ២៤ផ្ទាំងរួចហើយ។
ក្រុមស្រាវជ្រាវព្រំដែននៃរាជបណ្ឌិត្យសភាកម្ពុជា មិនទាន់សម្រេចជាផ្លូវការនៅឡើយថា នឹងត្រូវយកផែនទីរបស់រដ្ឋាភិបាលដើម្បីចុះពិនិត្យមើលការបោះបង្គោលព្រំដែនជាក់ស្ដែង។
ប្រធានក្រុមស្រាវជ្រាវព្រំដែនកម្ពុជា លោកបណ្ឌិត សុខ ទូច មានប្រសាសន៍ថា បើទោះជាពេលនេះការផ្ទៀងផ្ទាត់បង្ហាញថា ផែនទីរបស់គណបក្សសង្គ្រោះជាតិ ទាំង ២៤ផ្ទាំង ដូចគ្នាទៅនឹងផែនទីរបស់រដ្ឋាភិបាល និងផែនទី អាយ.ជី.អិន (IGN) ពីប្រទេសបារាំង ក្តី ប៉ុន្តែក្រុមការងារលោកត្រូវរង់ចាំការផ្ទៀងផ្ទាត់ជាមួយផែនទីដែលរដ្ឋាភិបាលនឹងទទួលពីអង្គការសហប្រជាជាតិនៅថ្ងៃទី២០ សីហា បន្ថែមទៀត។
លើសពីនេះ លោកក៏បានស្នើឲ្យគណបក្សសង្គ្រោះជាតិ ផ្តល់ផែនទី ២ផ្ទាំងបន្ថែមទៀតទៅឲ្យក្រុមស្រាវជ្រាវរបស់លោកដើម្បីយកមកផ្ទៀងផ្ទាត់ជាមួយផែនទីរបស់រដ្ឋាភិបាលសរុប ២៦ផ្ទាំង។ យ៉ាងណាក៏ដោយ លោកបណ្ឌិត សុខ ទូច បញ្ជាក់ថា ក្រុមលោកមិនអាចកំណត់ពេលវេលាសម្រាប់គណបក្សសង្គ្រោះជាតិ នោះទេ ប៉ុន្តែលោកថា បើគណបក្សសង្គ្រោះជាតិ មិនប្រគល់ឲ្យនោះទេ ក្រុមលោកសម្រេចថា នឹងយកផែនទីរបស់រដ្ឋាភិបាលទាំង ២៦ផ្ទាំង ដើម្បីចុះទៅពិនិត្យមើលការបោះបង្គោលជាក់ស្ដែងនៅតាមព្រំដែន។
លោកបណ្ឌិត សុខ ទូច៖ «តាមពិតអង្គការសហប្រជាជាតិយើងបានជម្រាបជូនហើយ ដែលមាន ១៨ផ្ទាំង លេខដូចគ្នា ដូចទៅនឹងគណបក្សសង្គ្រោះជាតិ គណបក្សប្រជាជន ដូចរបស់ អាយ.ជី.អិន ដែរ គឺដូចគ្នា ប៉ុន្តែអ្វីដែលបាត់ឯកឧត្ដមលោកបានបង្ហាញហើយ។ លោកថា លោកទៅរកបង្គ្រប់ ហើយបើមិនបង្គ្រប់ យករបស់រដ្ឋាភិបាលទៅ ពីព្រោះយើងទទួលស្គាល់ការពិតថា វាដូចគ្នាហើយ ហើយសំខាន់បំផុត គឺយើងទទួលយកការពិតថា ថ្ងៃនេះ យើងអត់មានបានក្លែងបន្លំ យើងអត់មានបានថ្ពឹនភ្នែក»។
នេះគឺលើកទី២ហើយ ដែលក្រុមស្រាវជ្រាវព្រំដែននៃរាជបណ្ឌិត្យសភាកម្ពុជា ធ្វើសន្និសីទសារព័ត៌មានផ្ទៀងផ្ទាត់ផែនទីដែលពួកគេទទួលបានពីភាគីនានា។ ក្នុងការផ្ទៀងផ្ទាត់ពេលនេះ សមាជិកព្រឹទ្ធសភា រដ្ឋសភាមកពីបក្សកាន់អំណាច និងបក្សប្រឆាំង ព្រមទាំងព្រះសង្ឃ និងអ្នកចូលរួមមួយចំនួនទៀត រួមទាំងអ្នកសារព័ត៌មានផង ត្រូវបានក្រុមស្រាវជ្រាវព្រំដែនកម្ពុជា អនុញ្ញាតឲ្យឡើងពិនិត្យមើលដោយផ្ទាល់នូវផ្ទាំងផែនទីដែលគេដាក់បង្ហាញម្តងមួយៗ ទាំងអស់ ២៦ផ្ទាំង។ ក្នុងពេលផ្ទៀងផ្ទាត់រយៈពេលជាង ១ម៉ោង អ្នកឡើងពិនិត្យមើលទាំងអស់បានទទួលយល់ព្រមថា ផែនទីដែលពួកគេពិនិត្យនោះពិតជាមានលក្ខណៈដូចគ្នា ទាំងកូអរដោនេភូមិសាស្ត្រ ទាំងលេខសន្លឹកផែនទី និងឆ្នាំផលិត។
យ៉ាងណាក៏ដោយ តំណាងរាស្ត្រ និងជាមន្ត្រីជាន់ខ្ពស់គណបក្សសង្គ្រោះជាតិ លោក អ៊ូ ច័ន្ទឫទ្ធិ ដែលបានចូលរួមក្នុងការផ្ទៀងផ្ទាត់ដែរនោះ មានប្រសាសន៍ថា បើទោះជាលោកចូលរួមក្នុងនាមជាតំណាងរបស់គណបក្សសង្គ្រោះជាតិ ក្តី ប៉ុន្តែលោកមិនទាន់អាចបញ្ជាក់ជំហររបស់គណបក្សសង្គ្រោះជាតិ បាននៅឡើយទេ នៅពេលនេះ។ លោកបន្តថា គណបក្សសង្គ្រោះជាតិ នឹងធ្វើការផ្ទៀងផ្ទាត់ ហើយចំពោះផែនទី ២ផ្ទាំងដែលខ្វះ លោកថា បក្សប្រឆាំងនឹងព្យាយាមស្វែងរកឲ្យលឿនបំផុតដែលអាចធ្វើបានដើម្បីប្រគល់ឲ្យក្រុមស្រាវជ្រាវព្រំដែន។
លោក អ៊ូ ច័ន្ទឫទ្ធិ អះអាងដែរថា ជាជំហរគណបក្សសង្គ្រោះជាតិ មិនដែលចោទប្រកាន់រដ្ឋាភិបាលថា ប្រើប្រាស់ផែនទីក្លែងក្លាយនោះទេ៖ «គណបក្សសង្គ្រោះជាតិ មិនដែលចោទថា ផែនទីដែលរដ្ឋាភិបាលកម្ពុជា បច្ចុប្បន្នប្រើប្រាស់ ថាផែនទីក្លែងក្លាយនោះទេ ហើយខ្ញុំមិនអាចបញ្ជាក់ជំហរពេលនេះថា វាយ៉ាងណានោះទេ ខ្ញុំត្រូវការជួបពិភាក្សាថ្នាក់ដឹកនាំគណបក្សសង្គ្រោះជាតិ លើបញ្ហានេះ»។
ចំណែកតំណាងរាស្ត្រគណបក្សប្រជាជនកម្ពុជា លោក ឈាង វុន ដែលអះអាងថា គាត់ចូលរួមក្នុងនាមជាបុគ្គលនោះយល់ឃើញថា ដំណាក់កាលនៃការផ្ទៀងផ្ទាត់ផែនទីពេលនេះជារឿងសំខាន់ ដើម្បីឈានដល់ការចុះពិនិត្យលើដីជាក់ស្ដែងរបស់ក្រុមស្រាវជ្រាវ។
លោកបណ្ឌិត សុខ ទូច ឲ្យដឹងថា បន្ទាប់ពីមានការឯកភាពទៅលើផែនទីហើយ ក្រុមការងារលោកនឹងយកផែនទីដែលឯកភាពនោះ ចុះពិនិត្យមើលការបោះបង្គោលជាក់ស្ដែងនៅលើដីទាំងបង្គោលដែលបានបោះហើយចំនួន ៨៣ភាគរយ និងបង្គោលដែលមិនទាន់បោះ ព្រមទាំងបង្គោលដែលអាណានិគមបារាំង បានបោះទាំង ១២៤បង្គោលផងដែរ។
លោកបណ្ឌិត សុខ ទូច មានប្រសាសន៍ថា ក្រុមការងារលោកគ្រោងចំណាយពេល ២ឆ្នាំ ដើម្បីធ្វើការងារពិនិត្យបង្គោលព្រំដែននេះ ហើយថា បើពេលពិនិត្យជាក់ស្ដែងឃើញថា មានកំហុស ក្រុមលោកនឹងធ្វើរបាយការណ៍ទៅឲ្យរដ្ឋាភិបាល។
រដ្ឋាភិបាលនឹងអញ្ជើញតំណាងបក្សនយោបាយឲ្យចូលរួមពិធីប្រគល់និងទទួលផែនទីពីអ.ស.ប
រដ្ឋាភិបាលនឹងអញ្ជើញតំណាងបក្សនយោបាយធំ៣ នៅកម្ពុជា ឲ្យចូលរួមក្នុងពិធីប្រគល់ និងទទួលផែនទីពីអង្គការសហប្រជាជាតិ នៅថ្ងៃទី២០ ខែសីហា។
ក្នុងសេចក្ដីជូនដំណឹងរបស់ខ្លួនចុះថ្ងៃទី១៣ ខែសីហា លេខាធិការដ្ឋាននៃគណៈកម្មការចំពោះកិច្ចសម្រាប់សម្របសម្រួលការងារទទួល ប្រគល់ និងផ្ទៀងផ្ទាត់ផែនទីឲ្យដឹងថា នៅយប់ថ្ងៃទី១៨ ខែសីហា មន្ត្រីអង្គការសហប្រជាជាតិចំនួន ២រូប នឹងមកដល់កម្ពុជា ដើម្បីនាំយកផែនទីដែលរដ្ឋាភិបាលកម្ពុជា ខ្ចីពីអង្គការសហប្រជាជាតិ ប្រគល់ឲ្យរដ្ឋាភិបាល។
យ៉ាងណាក៏ដោយ ពិធីប្រគល់ និងទទួលផ្លូវការនឹងធ្វើឡើងនៅព្រឹកថ្ងៃទី២០ ខែសីហា នាវិមានសន្តិភាព ដែលមានលោក ហោ ណាំហុង រដ្ឋមន្ត្រីក្រសួងការបរទេស និងជាប្រធានគណៈកម្មការចំពោះកិច្ចសម្របសម្រួលការងារទទួលប្រគល់ និងផ្ទៀងផ្ទាត់ផែនទី ជាអ្នកទទួល។
សេចក្ដីជូនដំណឹងដដែលឲ្យដឹងដែរថា នៅក្នុងពិធីប្រគល់ផែនទីជាផ្លូវការនោះ មន្ត្រីពាក់ព័ន្ធមួយចំនួនក៏នឹងត្រូវគណៈកម្មការចំពោះកិច្ចអញ្ជើញឲ្យចូលរួមផងដែរ ក្នុងនោះរួមមានតំណាងគណបក្សប្រជាជនកម្ពុជា ចំនួន ៥រូប គណបក្សសង្គ្រោះជាតិចំនួន ៥រូប និងគណបក្សហ្វ៊ុនស៊ិនប៉ិច ចំនួន ៥រូប សមាជិកសភាគណបក្សប្រជាជនកម្ពុជា ៣រូប គណបក្សសង្គ្រោះជាតិ ៣រូប សមាជិកព្រឹទ្ធសភាគណបក្សប្រជាជនកម្ពុជា ៣រូប គណបក្ស សម រង្ស៊ី ៣រូប តំណាងក្រុមប្រឹក្សាធម្មនុញ្ញចំនួន ២រូប ឧត្ដមក្រុមប្រឹក្សានៃអង្គចៅក្រម ២រូប លោកបណ្ឌិត សុខ ទូច និងសហការី នៃរាជបណ្ឌិត្យសភាកម្ពុជា ៣រូប ព្រមទាំងទីប្រឹក្សារដ្ឋាភិបាលដែលជាជនបរទេសមួយចំនួនផងដែរ។
លោកនាយករដ្ឋមន្ត្រី ហ៊ុន សែន បានថ្លែងកាលពីថ្ងៃទី១៣ ខែសីហា ថា នៅបន្ទាប់ពីការប្រគល់ និងទទួលផែនទីនោះ រដ្ឋាភិបាលនឹងធ្វើការផ្ទៀងផ្ទាត់នៅពេលជាមួយគ្នាតែម្ដង។ លោក ហ៊ុន សែន បញ្ជាក់ថា រដ្ឋាភិបាលធ្វើបែបនេះ គឺដើម្បីជៀសវាងកុំឲ្យមានការចោទប្រកាន់ថា រដ្ឋាភិបាលយកផែនទីទៅក្លែងបន្លំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។