មន្ត្រីគណបក្សសង្គ្រោះជាតិ ពីរក្រុមនៅខេត្តរតនគិរី ជេរប្រមាថ និងប្រទាញប្រទង់គ្នាទាក់ទិនការលើកបដាប្រឆាំងការប្រកាសសុពលភាពសមាសភាពគណៈកម្មការប្រតិបត្តិគណបក្សប្រចាំខេត្ត។ មន្ត្រីឃ្លាំមើលសិទ្ធិមនុស្ស ចាត់ទុកថាជាអំពើបង្ករបួសស្នាមដែលអាចប្រឈមមុខទៅនឹងបទល្មើសព្រហ្មទណ្ឌ។
ស្ត្រីជាមន្ត្រីគណបក្សសង្គ្រោះជាតិ ខេត្តរតនគិរី មួយរូបរងរបួសស្រាលក្នុងការប៉ះទង្គិចគ្នាដោយអំពើហិង្សាដណ្ដើមបដាគ្នា នៅព្រឹកថ្ងៃទី២៧ ខែមេសា នាមុខស្នាក់ការគណបក្សសង្គ្រោះជាតិ ក្នុងសង្កាត់កាចាញ ក្រុងបានលុង។
អំពើហិង្សានេះ កើតមានឡើងក្រោយពេលមន្ត្រីជាន់ខ្ពស់គណបក្សសង្គ្រោះជាតិ ដឹកនាំដោយប្រធានគណៈកម្មការនាយកគណបក្សសង្គ្រោះជាតិ លោក យឹម សុវណ្ណ ប្រកាសសុពលភាពសមាសភាពគណៈកម្មការប្រតិបត្តិគណបក្សថ្នាក់ខេត្តថ្មី ខណៈដែលសមាសភាពចាស់មួយក្រុមបានជំទាស់ច្រើនលើកមកហើយ។
ប្រធានគណៈកម្មការប្រតិបត្តិគណបក្សសង្គ្រោះជាតិ ប្រចាំស្រុកអណ្ដូងមាស អ្នកស្រី សួន សុខាន់ ដែលរងរបួសរលាត់កែងដៃបញ្ជាក់ថា ក្រុមអ្នកស្រីមានគ្នាប្រមាណ ៦នាក់ទៅ ៨នាក់ បានលើកបដាតវ៉ានៅផ្លូវសាធារណៈ សុំឲ្យថ្នាក់ដឹកនាំគណបក្សរកយុត្តិធម៌ដល់ក្រុមអ្នកស្រី ដែលបានបម្រើ និងស្មោះត្រង់ជាមួយបក្សយូរឆ្នាំ ក៏ប៉ុន្តែត្រូវបានដកចេញដោយគ្មានហេតុផល។ អ្នកស្រីរៀបរាប់ថា ក្នុងពេលនោះ ភាគីម្ចាស់ផ្ទះជាភរិយាប្រធានគណៈកម្មការប្រតិបត្តិគណបក្សប្រចាំក្រុងបានលុង បានទាញអូសអ្នកស្រីឲ្យដួល ធ្វើឲ្យមានរបួស ហើយបណ្ដេញក្រុមអ្នកស្រីឲ្យចេញពីមុខស្នាក់ការ និងជាគេហដ្ឋានពួកគេ។ អ្នកស្រីបន្តថា នេះជាអំពើបង្ករំលោភសិទ្ធិ និងរបួសស្នាម ត្រូវតែទទួលខុសត្រូវចំពោះច្បាប់៖ « ខ្ញុំសុំប្ដឹងសុំឲ្យអាជ្ញាធររកយុត្តិធម៌ឲ្យខ្ញុំផង។ ខ្ញុំអត់មកជេរប្រមាថគាត់ទេ។ ខ្ញុំមកការងារគណបក្ស រកយុត្តិធម៌ ព្រោះ សុង យីន គាត់ជាប់ឆ្នោតយូរហើយ ហើយមកទម្លាក់គាត់ដាក់អ្នកថ្មីយ៉ាងម៉េច មិន ត្រូវ។ ខ្ញុំមកតវ៉ាទេ មិនមែនមកវាយសំពងទេ។ ហេតុអ្វីចាប់បោកខ្ញុំសន្លប់របកអស់កែងដៃ»។
ឆ្លើយតបការចោទប្រកាន់នេះ ប្រធានគណៈកម្មការប្រតិបត្តិគណបក្សប្រចាំក្រុងបានលុង លោក ស៊ិន ប៊ុនណា បញ្ជាក់ថា ក្រុមអ្នកស្រី សួន សុខាន់ មកអុកឡុករំខាននៅមុខស្នាក់ការគណបក្សលោក ទើបកើតមានការប្រទង់ប្រទាញយកឈ្នះរៀងខ្លួន។ លោកថា ភរិយាលោកក៏មានរបួសដៃដោយស្នាមក្រចកដៃរបស់ភាគីម្ខាងទៀតដែរ៖ « ប្រ ពន្ធខ្ញុំកូនខ្ចីឱបកូនទៅហាមឃាត់ គាត់មិនស្តាប់ទេ។ គាត់កញ្ឆក់ប្រពន្ធខ្ញុំ តែប្រពន្ធខ្ញុំខ្លាំងជាង ការទាញគ្នាដួល ហើយក្រញៅដាច់ដៃអស់»។
មន្ត្រីមូលដ្ឋាននៃគណបក្សសង្គ្រោះជាតិ ខេត្តរតនគិរី កើតមានជម្លោះផ្ទៃក្នុងជាងមួយឆ្នាំកន្លងទៅ ទាក់ទិនការចាត់តាំងសមាសភាពគណៈកម្មការប្រតិបត្តិថ្នាក់ខេត្ត។ ចំណែកថ្នាក់ដឹកនាំគណបក្សសង្គ្រោះជាតិ ថ្នាក់ជាតិ បានព្យាយាមដោះស្រាយសម្របសម្រួលបញ្ហានេះ ក៏ប៉ុន្តែមិនបានលទ្ធផល។
ស្នងការរងនគរបាលខេត្តរតនគិរី លោក អ៊ឹម ផានី មានប្រសាសន៍ថា ភាគីមានរបួសបានដាក់ពាក្យប្ដឹងមកការិយាល័យព្រហ្មទណ្ឌកម្រិតស្រាល ចោទភាគីម្ខាងទៀតថាប្រើអំពើហិង្សា និងបង្ករបួសស្នាម។ លោកថា នេះជាជម្លោះផ្ទៃក្នុងរបស់សមាជិកគណបក្ស មិនទាក់ទិនបញ្ហានយោបាយអ្វីឡើយ៖ « ល្ងាចនេះបានហៅភាគីម្ខាងទៀតសួរ ទើបហៅបានម្ខាងពីបទប្រើអំពើហិង្សាបង្ករបួសស្នាម»។
មន្ត្រីឃ្លាំមើលសិទ្ធិមនុស្ស សម្ដែងការសោកស្ដាយចំពោះភាគីទំនាស់មិនដោះស្រាយទំនាស់ដោយសន្តិវិធី។ លោកថា ការបង្ករបួសស្នាម នឹងត្រូវប្រឈមមុខទៅនឹងបទល្មើសព្រហ្មទណ្ឌ ប្រសិនសមត្ថកិច្ចរកឃើញអ្នកបង្កហេតុ៖ «សមត្ថកិច្ចត្រូវតែបំពេញតួនាទីហើយ ភាគីណាបង្កត្រូវតែទទួលខុសត្រូវ»។
ទោះបីជាយ៉ាងណាក៏ដោយ ប្រធានគណៈកម្មការប្រតិបត្តិគណបក្សសង្គ្រោះជាតិ លោក យឹម សុវណ្ណ អំពាវនាវឲ្យសមាជិក និងមន្ត្រីគណបក្សទាំងអស់ ពង្រឹងសាមគ្គីផ្ទៃក្នុងត្រៀមលក្ខណៈស្វែងរកសំឡេងឆ្នោតគាំទ្រពីពលរដ្ឋឲ្យបានជោគជ័យ សម្រាប់ការបោះឆ្នោតឆ្នាំ២០១៨ ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។