សហរដ្ឋអាមេរិក ជំរុញឲ្យរដ្ឋសភាកម្ពុជា ប្រគល់សមាជិកភាពសភា និងអភ័យឯកសិទ្ធិសភាទៅឲ្យ លោក សម រង្ស៊ី ប្រធានគណបក្សសង្គ្រោះជាតិ វិញ។ ការទទូចនេះ ធ្វើឡើងភ្លាមៗបន្ទាប់ពីរដ្ឋសភា បានសម្រេចដកទាំងស្រុងនូវសិទ្ធិ បុព្វសិទ្ធិ និងសមាជិកភាពជាសមាជិកសភារបស់ លោក សម រង្ស៊ី ពីមណ្ឌលកំពង់ចាម នៅថ្ងៃទី១៦ ខែវិច្ឆិកា។
សេចក្តីប្រកាសព័ត៌មានរបស់ស្ថានទូតសហរដ្ឋអាមេរិក ប្រចាំកម្ពុជា ចុះផ្សាយនៅថ្ងៃទី១៦ ខែវិច្ឆិកា លើកឡើងថា សហរដ្ឋអាមេរិក មានការព្រួយបារម្ភយ៉ាងខ្លាំងពីការដកសមាជិកភាពសភា លោក សម រង្ស៊ី ដោយគណបក្សប្រជាជនកម្ពុជា។
សហរដ្ឋអាមេរិក ដែលចាត់ទុកការដកសមាជិកភាពសភា លោក សម រង្ស៊ី ថាកំពុងតែធ្វើឲ្យបរិយាកាសប្រជាធិបតេយ្យនៅកម្ពុជា រឹតតែធ្លាក់ចុះមួយកម្រិតទៀតនោះ ជំរុញឲ្យរដ្ឋសភាប្រគល់សមាជិកភាពសភា និងអភ័យឯកសិទ្ធិសភាទៅឲ្យ លោក សម រង្ស៊ី វិញជាបន្ទាន់។ សហរដ្ឋអាមេរិក ក៏ទទូចឲ្យរដ្ឋាភិបាលដកចេញនូវដីកាតាមចាប់ខ្លួន លោក សម រង្ស៊ី ក្នុងសំណុំរឿងបរិហារកេរ្តិ៍ លោក ហោ ណាំហុង រដ្ឋមន្ត្រីក្រសួងការបរទេស ដែលសហរដ្ឋអាមេរិក លើកឡើងថា បានកើតឡើងរយៈពេល ៧ឆ្នាំមកហើយនោះ។
សហរដ្ឋអាមេរិក កត់សម្គាល់ថា ចំណាត់ការរបស់រដ្ឋសភាមកលើ លោក សម រង្ស៊ី ពេលនេះ គឺជាឧប្បត្តិហេតុថ្មីបំផុតមួយទៀត ដែលបង្ហាញពីការយាយី និងការគំរាមកំហែងទៅលើបក្សប្រឆាំង ក្នុងនោះរួមមាន តាំងពីការវាយប្រហារទៅលើតំណាងរាស្ត្របក្សប្រឆាំងនៅមុខរដ្ឋសភា និងការដកតំណែង លោក កឹម សុខា ពីអនុប្រធានទី១ រដ្ឋសភាផងដែរ។ សហរដ្ឋអាមេរិក លើកឡើងថា ព្រឹត្តិការណ៍ទាំងនេះកំពុងធ្វើឲ្យប៉ះពាល់ដល់ដំណើរការលទ្ធិប្រជាធិបតេយ្យនៅកម្ពុជា។
ឆ្លើយតបចំពោះការទទូចរបស់សហរដ្ឋអាមេរិក ពេលនេះ អ្នកនាំពាក្យរដ្ឋសភាមកពីគណបក្សប្រជាជនកម្ពុជា លោក ឈាង វុន មានប្រសាសន៍ថា រដ្ឋសភាកម្ពុជា មិនអាចទទួលការលើកឡើងរបស់សហរដ្ឋអាមេរិក បាននោះទេ។ លោកថា រដ្ឋសភា ជាសភារបស់ប្រទេសឯករាជ្យ និងមានអធិបតេយ្យភាព៖ «យើងទទួលយកមិនបានទេការលើកឡើងរបៀបអាណានិគម។ កម្ពុជា ធ្លាប់មនុស្សមួយហ្វូងបម្រើគោលនយោបាយអាមេរិកកាំង មានសង្គ្រាមតាំងពីឆ្នាំ១៩៧០ ស្លាប់អស់ជាង ២លាននាក់ដោយបង្កើតឡើងនូវរបបប្រល័យពូជសាសន៍។ អ៊ីចឹងហើយសុំឲ្យកម្ពុជា រស់បានសុខទៅ ទុកឲ្យកម្ពុជា ដឹកនាំប្រទេសជាតិរបៀបកម្ពុជា ទៅ ឲ្យកម្ពុជា បន្តការអភិវឌ្ឍបន្តទៀតដូចសម័យនេះ»។
ទាក់ទងនឹងសភាពការណ៍នយោបាយនៅកម្ពុជា នេះដែរ អ្នកនាំពាក្យក្រសួងការបរទេសសហរដ្ឋអាមេរិក លោក ម៉ាក់ ថូននើ (Mark Toner) កាលពីថ្ងៃទី១៣ វិច្ឆិកា ក៏បានទទូចឲ្យរដ្ឋាភិបាលកម្ពុជា ទម្លាក់ចោលបទចោទប្រកាន់ចំពោះ លោក សម រង្ស៊ី ដោយលោកចាត់ទុកថា ករណីនេះវាជារឿងនយោបាយ។
លោក ម៉ាក់ ថូននើ មានប្រសាសន៍ថា ការចេញដីកាតាមចាប់ខ្លួន លោក សម រង្ស៊ី គឺបង្ហាញឲ្យគេឃើញរឹតតែច្បាស់អំពីឥទ្ធិពលរបស់អ្នកនយោបាយទៅលើប្រព័ន្ធតុលាការនៅកម្ពុជា ហើយថា សហរដ្ឋអាមេរិក នឹងតាមដានយ៉ាងយកចិត្តទុកដាក់ចំពោះស្ថានការណ៍នយោបាយនៅកម្ពុជា។
សហរដ្ឋអាមេរិក ទទូចឲ្យរដ្ឋាភិបាលកម្ពុជា ចាត់វិធានការជាបន្ទាន់ ដើម្បីធានានូវបរិយាកាសនយោបាយដែលគ្មានការគំរាមកំហែង និងសម្លុតបំភ័យទៅលើបក្សប្រឆាំង និងទទូចឲ្យរដ្ឋាភិបាល អនុញ្ញាតឲ្យ លោក សម រង្ស៊ី និងសមាជិកដទៃទៀតរបស់គណបក្សប្រឆាំងវិលត្រឡប់មកប្រទេសកម្ពុជា វិញ ដោយគ្មានការភ័យខ្លាចពីការចាប់ខ្លួន និងការធ្វើទុក្ខបុកម្នេញ។
ចំណែកអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) លើកឡើងថា ចំណាត់ការរបស់តុលាការប្រឆាំងទៅនឹង លោក សម រង្ស៊ី នៅពេលនេះ វាបង្ហាញឲ្យឃើញជាថ្មីទៀតអំពីភាពទន់ខ្សោយរបស់ប្រព័ន្ធយុត្តិធម៌នៅកម្ពុជា ដែលតែងត្រូវបាន លោក ហ៊ុន សែន ប្រើប្រាស់ធ្វើជាឧបករណ៍នយោបាយ ដើម្បីរក្សាអំណាចអស់រយៈពេលជាង ៣០ឆ្នាំរបស់លោក។ យូមែន រ៉ៃត៍ វ៉ច្ឆ ក៏បានទទូចឲ្យម្ចាស់ជំនួយជំរុញទៅរដ្ឋាភិបាលកម្ពុជា ទម្លាក់ចោលបទចោទលើ លោក សម រង្ស៊ី និងជំរុញឲ្យ លោក ហ៊ុន សែន បញ្ចប់នូវការប្រើប្រាស់ច្បាប់ព្រហ្មទណ្ឌប្រឆាំងទៅនឹងអ្នកនយោបាយបក្សប្រឆាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។