ថ្នាក់ដឹកនាំកំពូលនៃប្រទេសវៀតណាម មិនចាប់អារម្មណ៍ពីស្ថានការណ៍នយោបាយនៅកម្ពុជា នោះទេ។ ចំណែកមន្ត្រីជាន់ខ្ពស់របស់គណបក្សសង្គ្រោះជាតិ ថាដំណើរទស្សនកិច្ចរបស់ប្រធានរដ្ឋវៀតណាម នៅពេលនេះ មិនអាចជួយស្រោចស្រង់ស្ថានការណ៍នយោបាយបានទេ។
ក្នុងជំនួបបិទទ្វាររវាងប្រធានរដ្ឋសភាកម្ពុជា លោក ហេង សំរិន និងប្រធានាធិបតីវៀតណាម លោក ត្រឹង ដាយ ខ្វាង ដែលមានរយៈពេលជាងកន្លះម៉ោងនៅវិមានរដ្ឋសភា កាលពីរសៀលថ្ងៃទី១៥ ខែមិថុនា ភាគីទាំងពីរជជែកទាក់ទងនឹងការពង្រឹងទំនាក់ទំនងរវាងរដ្ឋ និងរដ្ឋ និងទំនាក់ទំនងរវាងគណបក្សកាន់អំណាចរបស់កម្ពុជា និងគណបក្សកុម្មុយនិស្តវៀតណាម។
នាយកខុទ្ទកាល័យប្រធានរដ្ឋសភា លោក កែវ ពិសិដ្ឋ ថ្លែងប្រាប់ក្រុមអ្នកសារព័ត៌មានថា ក្នុងជំនួបរវាងលោក ហេង សំរិន និងលោក ត្រឹង ដាយ ខ្វាង (TRAN DAI QUANG) ភាគីទាំងពីរមិនជជែកទាក់ទងនឹងស្ថានការណ៍នយោបាយកម្ពុជា ដែលកំពុងកើតឡើងនៅពេលនេះឡើយ៖ «មិនមានចាប់អារម្មណ៍ពីស្ថានការណ៍នយោបាយគណបក្សទាំងពីរអីទេ នៅក្នុងសវនាការនេះ អត់បានលើកឡើងពីស្ថានការណ៍នយោបាយទេ»។
តំណាងរាស្ត្រគណបក្សប្រជាជនកម្ពុជា និងជានាយកខុទ្ទកាល័យប្រធានរដ្ឋសភា លោក កែវ ពិសិដ្ឋ ប្រាប់ថា ទំនាក់ទំនងនេះ ជាការរួមចំណែកថែរក្សាសន្តិភាព និងការអភិវឌ្ឍនៅក្នុងតំបន់ និងសកលលោក។
ចំណែកអ្នកវិភាគនយោបាយលោក កែម ឡី យល់ថា ការបំពេញទស្សនកិច្ចរបស់ប្រធានរដ្ឋនៃសាធារណរដ្ឋសង្គមនិយមវៀតណាម នៅពេលនេះ គឺវៀតណាម ចង់បង្ហាញថា ខ្លួនមានឥទ្ធិពលលើប្រទេសកម្ពុជា។ លោកសង្កេតឃើញថា នៅពេលប្រទេសកម្ពុជា មានបញ្ហានយោបាយ ទោះថ្នាក់ដឹកនាំកម្ពុជា ទៅប្រទេសវៀតណាម ឬថ្នាក់ដឹកនាំវៀតណាម មកកម្ពុជា គឺរុញស្ថានការណ៍នោះកាន់តែស្មុគស្មាញ៖ «ខ្ញុំមានការព្រួយបារម្ភរហូតមិនមែនតែដំណើរទស្សនកិច្ចក៏គេទាក់ទងគ្នាតាមផ្លូវផ្សេងទៀតដែរ។ យើងឃើញលោក ហ៊ុន សែន ក្រោយពីមកពីវៀតណាម កាលពីថ្ងៃទី៤ (មករា ឆ្នាំ២០១៤) ពេលលោកមកវិញមានហិង្សានៅផ្លូវវ៉េងស្រេង បាញ់សម្លាប់កម្មករ»។
ក្នុងដំណើរទស្សនកិច្ចរយៈពេលពីរថ្ងៃ ចាប់ពីថ្ងៃទី១៥ ដល់ថ្ងៃទី១៦ ខែមិថុនា របស់លោក ត្រឹង ដាយ ខ្វាង ក្រៅពីជួបលោក ហេង សំរិន លោកនឹងចូលបង្គំគាល់ព្រះមហាក្សត្រ ហើយជួបជាមួយប្រធានព្រឹទ្ធសភា លោក សាយ ឈុំ លោកនាយករដ្ឋមន្ត្រី ហ៊ុន សែន និងសម្ដេចព្រះសង្ឃរាជទាំងពីរគណៈ។
ដោយឡែក អ្នកនាំពាក្យគណបក្សប្រជាជនកម្ពុជា លោក សុខ ឥសាន និយាយថា ការថ្លែងរបស់លោក កែម ឡី ដែលថា វៀតណាម ចង់ត្រួតត្រា និងចង់បានទឹកដីប្រទេសកម្ពុជា ព្រោះលោក កែម ឡី មិនមែនជាអ្នកវិភាគឯករាជ្យ៖ «ព្រោះគាត់មិនមែនជាអ្នកវិភាគឯករាជ្យ។ មិនមែនជារឿងនយោបាយទេ ព្រោះគាត់ (លោក ត្រឹង ដាយ ខ្វាង) ទើបតែងតាំងជាប្រធានរដ្ឋ គាត់មកសំណេះសំណាលជាមួយប្រទេសជាសមាជិកអាស៊ាន ព្រោះវៀតណាម ក៏សមាជិកអាស៊ានដែរ»។
ដំណើរទស្សនកិច្ចរបស់ប្រធានរដ្ឋប្រទេសវៀតណាម នៅពេលនេះ ចំពេលដែលក្បាលម៉ាស៊ីនប្រទេសនេះទើបផ្លាស់ប្ដូរថ្មី និងចំពេលគណបក្សមានសំឡេងឆ្នោតនៅក្នុងសភារបស់កម្ពុជា កំពុងមានជម្លោះនយោបាយ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ កត់សម្គាល់ឃើញថា នៅពេលកម្ពុជា មានបញ្ហានយោបាយតែងតែមានថ្នាក់ដឹកនាំវៀតណាម មកប្រទេសកម្ពុជា។ លោកយល់ថា ដំណើរទស្សនកិច្ចនេះ មិនអាចជួយដោះស្រាយអ្វីដល់កម្ពុជា បានទេ៖ «ខ្ញុំមិនដឹងថា ហេតុផលអីទេ ប៉ុន្តែបើបានជាអញ្ជើញមកដល់ហើយធ្វើម៉េចជួយដោះស្រាយឲ្យមានភាពធូរស្រាលបញ្ហានយោបាយវាជាការល្អ»។
ផ្ទុយពីប្រទេសវៀតណាម អង្គការសហប្រជាជាតិ និងសភាសហភាពអឺរ៉ុប ដែលមានសមាជិកចំនួន ២៨ប្រទេស កំពុងបារម្ភពីវិបត្តិនយោបាយនៅពេលនេះ និងស្នើឲ្យរដ្ឋាភិបាលកម្ពុជា បញ្ឈប់ការធ្វើទុក្ខបុកម្នេញលើគណបក្សប្រឆាំង សង្គមស៊ីវិល និងប្រព័ន្ធផ្សព្វផ្សាយឯករាជ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។