សិល្បករមួយចំនួនបានបញ្ចេញមតិ និងសកម្មភាពគាំទ្រគណបក្សនយោបាយនៅតាមស្ថានីយទូរទស្សន៍ និងវិទ្យុជាដើម។ ក្រៅពីនេះពួកគេក៏មមាញឹកខ្លាំងណាស់ដែរក្នុងការចេញមុខដើរធ្វើយុទ្ធនាការឃោសនាបោះឆ្នោតជ្រើសតាំងតំណាងរាស្ត្រនីតិកាលទី៥នេះ។ ក៏ប៉ុន្តែ ស្របពេលនេះដែរ ប្រធានសមាគមអ្នកសិល្បករខ្មែរព្រមានថា អ្នកសិល្បៈគប្បីរក្សាសេចក្ដីថ្លៃថ្នូរ និងការទទួលខុសត្រូវខ្ពស់ កុំយកអាជីព និងប្រជាប្រិយភាពរបស់ខ្លួនទៅវាយប្រហារគណបក្សដទៃ នាំឲ្យបាត់បង់ការគាំទ្រ និងការងារសិល្បទៅថ្ងៃអនាគត។
មន្ត្រីគណបក្សប្រឆាំង រិះគន់ចំពោះសិល្បករមួយចំនួនថា បានយកអាជីពដើម្បីបម្រើគណបក្សនយោបាយច្រើនជាងការអប់រំដល់មហាជន ឬសម្រាប់ប្រយោជន៍រួមដល់សង្គមជាតិទាំងមូល។
តំណាងរាស្ត្រ និងជាមន្ត្រីនាំពាក្យរបស់គណបក្សសង្គ្រោះជាតិ លោក យឹម សុវណ្ណ មានប្រសាសន៍ថា សិល្បករត្រូវមានលក្ខណៈសម្បត្តិ និងសកម្មភាពខុសពីអ្នកនយោបាយដែលមានប្រជាពលរដ្ឋខ្លះស្អប់ និងខ្លះស្រលាញ់។ ចំពោះអ្នកសិល្បត្រូវសំរួមចិត្ត និងសកម្មភាពដើម្បីឲ្យមហាជនគ្រប់រូបគោរព និងស្រឡាញ់ខ្លួន។
លោកបន្តថា ពិធីករ ពិធីការិនីមានតួនាទីយ៉ាងសំខាន់ក្នុងការផ្ដល់ការអប់រំដល់មហាជន៖ «នៅប្រទេសណាក៏ដោយ សិល្បករគឺដើរតួនាទីអប់រំ ដើរតួនាទីបង្រួបបង្រួមធ្វើឲ្យប្រជាពលរដ្ឋទូទាំងប្រទេសស្គាល់អំពីទង្វើល្អនិងទង្វើអាក្រក់ ក៏ប៉ុន្តែនៅក្នុងប្រទេសកម្ពុជា ខ្ញុំមានការសោកស្ដាយណាស់ចំពោះសិល្បករទាំងអស់ហ្នឹង ដល់យើងទៅចូលជួបពាក់ព័ន្ធនយោបាយពេលខ្លះបើនិយាយការពិតយើងមិនតូចចិត្តទេ ប៉ុន្តែនិយាយខុសការពិត បំភ្លៃ បំផ្លើសការពិតថែមទៅទៀត»។
នៅថ្ងៃទី២៧ មិថុនា ដែលជាថ្ងៃទីមួយនៃយុទ្ធនាឃោសនាបោះឆ្នោត គេឃើញមានវត្តមានលោក អ៊ូ ប៊ុនរ៉ាត់ ហៅ នាយក្រឹម និងសិល្បករ សិល្បការិនីជាច្រើនរូបផ្សេងទៀត បានចូលរួមក្នុងក្បួនឃោសនារកសំឡេងឆ្នោតរបស់គណបក្សប្រជាជនកម្ពុជា ក្នុងរាជធានីភ្នំពេញ។
តារាកំប្លែងលោក អ៊ូ ប៊ុនរ៉ាត់ ហៅ នាយក្រឹម មានប្រសាសន៍នៅថ្ងៃទី៣០ មិថុនា ថា លោកនិងតារាផ្សេងទៀតមានភាពមមាញឹកច្រើនក្នុងពេលយុទ្ធនាការបោះឆ្នោតនេះ។ លោកជាបុគ្គលិកពេញសិទ្ធិម្នាក់របស់ស្ថានីយទូរទស្សន៍បាយ័ន និងបានគាំទ្រគណបក្សប្រជាជនកម្ពុជា តាំងពីឆ្នាំ១៩៩៣ មក ហើយនៅក្នុងយុទ្ធនាការលើកនេះ លោកមានគម្រោងចេញសំដែងរកសំឡេងឆ្នោតចំនួន ១៥លើក៖ «អូ! រឿងថវិកាវិញ គឺអត់មានទេ គេផ្ដល់នូវសម្ភារៈអីឲ្យយើងតុបតែងឡានអីហ្នឹងណា៎។ ឡានៗដែលខ្ញុំរៀបចំហ្នឹង ខាងសាលាក្រុងឲ្យខ្ញុំអ្នករៀបចំឡានក្បួនហែសម្រាប់ក្រុម»។
ប្រធានសមាគមអ្នកសិល្បករខ្មែរ លោក សុះ ម៉ាច មានប្រសាសន៍ថា ការគាំទ្រគណបក្សនយោបាយណាមួយគឺជាសិទ្ធិសេរីភាពរបស់សិល្បករម្នាក់ៗ ក៏ប៉ុន្តែក្នុងនាមលោកជាប្រធានសមាគមសុំអំពាវនាវដល់សិល្បករ សិល្បការិនី ជាពិសេសសិល្បករដែលជាសមាជិករបស់សមាគមជាង ៤០០នាក់ កុំយកអាជីព និងប្រជាប្រិយភាពរបស់ខ្លួនទៅវាយប្រហារគណបក្សដទៃនាំឲ្យមានបញ្ហាទៅថ្ងៃក្រោយ៖ «វាយប្រហារគេអ៊ីចឹងទៅធ្វើឲ្យគណបក្សមួយចំនួនគាត់មិនសប្បាយចិត្ត ជួនកាលគណបក្សខ្លះមានឥទ្ធិពលនៅក្នុងសង្គមអ៊ីចឹងទៅ ក៏អាចធ្វើឲ្យប៉ះពាល់ដល់អាជីពរបស់គាត់ អត់មានអ្នកណាហ៊ានហៅពួកគាត់ឡើងសម្ដែងនៅក្នុងកម្មវិធីទូរទស្សន៍»។
លោកបន្តថា ការគាំទ្រនិងបញ្ចេញសកម្មភាពគាំទ្រទៅលើគណបក្សណាមួយគឺមិនខុសលក្ខន្តិកៈរបស់សមាគម ឬច្បាប់ជាតិឡើយ ក៏ប៉ុន្តែអ្នកសិល្បៈគួរតែនៅជាអាជ្ញាកណ្ដាល និងយកចិត្តទុកដាក់ខ្ពស់ទៅលើការផ្ដល់ការអប់រំដល់មហាជនទៅវិញទើបល្អ។
ទាក់ទងនឹងបញ្ហានេះ អ្នកស្រាវជ្រាវផ្នែកការអភិវឌ្ឍន៍សង្គម លោក កែម ឡី មានប្រសាសន៍ថា យុទ្ធសាស្ត្រយកអ្នកសិល្បៈមកចូលរួមធ្វើការឃោសនាពុំសូវមានប្រសិទ្ធភាពខ្លាំងនោះទេ ដោយសារភាគច្រើននៃសិល្បករទាំងនោះមិនមែនជាសិល្បករអាជីព៖ «ព្រោះនៅស្រុកគេសិល្បករ សិល្បការិនីសុទ្ធតែជាសិល្បៈអាជីពដែលមានការសិក្សា មានការបណ្ដុះបណ្ដាលត្រឹមត្រូវ យ៉ាងហោចណាស់ក៏គេទទួលបានការសិក្សាជាប់បរិញ្ញាបត្រ ខ្លះរហូតដល់អនុបណ្ឌិត បណ្ឌិតទៅទៀត»។
លោកបញ្ជាក់ថា សារនយោបាយតាមរយៈសិល្បករដែលមានឥទ្ធិពលស៊ីជម្រៅទាល់តែនិយាយការពិតស្ថិតនៅក្នុងអព្យាក្រឹត និងមានភស្តុតាងជាក់ស្ដែង បើមិនដូចច្នោះទេវានឹងធ្វើឲ្យបាត់បង់សំឡេងគាំទ្ររបស់គណបក្សនោះទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។