ប្រធានក្រុមប្រឹក្សានៃអង្គជំនុំជម្រះសាលាឧទ្ធរណ៍ បានសម្រេចជាថ្មីទៀតប្រឆាំងការសុំនៅក្រៅឃុំរបស់សកម្មជនគណបក្សសង្គ្រោះជាតិ ទាំង ៥រូប កាលពីថ្ងៃព្រហស្បតិ៍ ទី១៥ ខែមករា។
អង្គការសង្គមស៊ីវិល ដែលឃ្លាំមើលសវនាការនេះ ចាត់ទុកថា ជាសេចក្ដីសម្រេចដែលផ្អែកលើសម្ពាធនយោបាយរបស់គណបក្សប្រជាជនកម្ពុជា។
ការចំណាយពេលបើកសវនាការជាថ្មីម្ដងទៀតប្រហែល ២ម៉ោង ប្រធានក្រុមប្រឹក្សានៃអង្គជំនុំជម្រះសាលាឧទ្ធរណ៍ បានបដិសេធមិនឲ្យសកម្មជនគណបក្សសង្គ្រោះជាតិ នៅក្រៅឃុំ។ ការសម្រេចនេះ នាំឲ្យមានការរិះគន់ដ៏ចម្រូងចម្រាសពីសំណាក់ក្រុមអង្គការមិនមែនរដ្ឋាភិបាល។
ក្រោយសេចក្ដីសម្រេចរបស់ប្រធានក្រុមប្រឹក្សានៃអង្គជំនុំជម្រះ លោក ប្លង់ សំណាង ភ្លាមៗកាលពីរសៀលថ្ងៃទី១៥ មករា លោក នី ចរិយា ប្រធានក្រុមស៊ើបអង្កេតនៃសមាគមការពារសិទ្ធិមនុស្សអាដហុក (adhoc) ចាត់ទុកថា ការច្រានចោលជាថ្មីម្ដងទៀតរបស់សាលាឧទ្ធរណ៍ប្រឆាំងនឹងការសុំនៅក្រៅឃុំលើកនេះ គឺវាពុំមែនចេញដោយឆន្ទានុសិទ្ធិរបស់ក្រុមប្រឹក្សានៃអង្គជំនុំជម្រះទេ។ ផ្ទុយទៅវិញ ការសម្រេចនេះ គឺឋិតក្រោមសម្ពាធនយោបាយរបស់គណបក្សគ្រប់គ្រងអំណាច៖ «ទាំងនៅសាលាដំបូង ទាំងនៅសាលាឧទ្ធរណ៍ គឺសុទ្ធតែឋិតនៅក្រោមឥទ្ធិពលនៃនយោបាយ»។
លោក មាជ សុវណ្ណារ៉ា ជាជនត្រូវចោទប្រកាន់ម្នាក់ក្នុងចំណោមសកម្មជន ៤រូបផ្សេងទៀត ថ្លែងប្រាប់ក្រុមអ្នករាយការណ៍ព័ត៌មានខណៈដែលលោកត្រូវឆ្មាំពន្ធនាគារ បណ្ដើរទៅរថយន្តដឹកអ្នកទោស និយាយថា រឿងនយោបាយពិតជាពិបាកធ្វើឲ្យតុលាការសម្រេចដោយឯករាជ្យណាស់។ យ៉ាងណា លោកយល់ឃើញថា លោក ហ៊ុន សែន គួរអនុវត្តកិច្ចព្រមព្រៀងថ្ងៃទី២២ កក្កដា ដែលគណបក្សនយោបាយទាំងពីរបានអនុម័តរួចហើយ ឲ្យដូចដែលមន្ត្រីគណបក្សប្រជាជនកម្ពុជា ដឹងគុណថ្ងៃ ៧មករា ដូច្នោះដែរ៖ «រឿងនយោបាយពិបាកធ្វើឲ្យតុលាការរារែក។ អ៊ីចឹងគិតថា លោក ហ៊ុន សែន យល់អំពីសេរីភាពនៃការបញ្ចេញមតិ។ សង្ឃឹមកិច្ចព្រមព្រៀងថ្ងៃ២២ កក្កដា លោក ហ៊ុន សែន នឹងគោរពតាម លោក ហេង សំរិន»។
នៅបរិវេណខាងក្រៅសាលាឧទ្ធរណ៍ឯណេះវិញ មានសកម្មជនគាំទ្រតិចតួចប៉ុណ្ណោះបានចូលរួមលើកទឹកចិត្តក្នុងថ្ងៃសវនាការ កាលពីរសៀលថ្ងៃទី១៥ មករា។ ដោយឡែកកម្លាំងសមត្ថកិច្ច មិនត្រូវបានគេដាក់ពង្រាយដូចលើកមុនៗទៀតឡើយ។
នៅមុនសេចក្ដីសម្រេចមកដល់ ទាំងមេធាវីការពារក្ដី និងជនជាប់ចោទ ហាក់សង្ឃឹមថានឹងអាចបាននៅក្រៅឃុំ ក៏ប៉ុន្តែនៅនាទីចុងក្រោយបន្ទាប់ពីសម្រាកប្រហែល ១០នាទី អ្វីៗបានប្រែប្រួលមួយរំពេច។ សកម្មជនទាំង ៣រូបដែលនាំខ្លួនមកសវនាការក្នុងចំណោម ៥នាក់ ដែលស្នើសុំនៅក្រៅឃុំ ត្រូវបានបញ្ជូនត្រឡប់ទៅពន្ធនាគារវិញភ្លាមៗ។
នេះជាលើកទីពីរហើយ ដែលសាលាឧទ្ធរណ៍ច្រានចោលសំណើសុំនៅក្រៅឃុំរបស់សកម្មជនគណបក្សសង្គ្រោះជាតិ។ មេធាវីការពារក្តីឲ្យជនជាប់ចោទដែលជាសកម្មជនរបស់គណបក្សសង្គ្រោះជាតិ បញ្ជាក់ថា ខ្លួននឹងពិភាក្សាបន្តទៀតជាមួយកូនក្តី មុននឹងត្រូវរៀបបណ្ដឹងសារទុក្ខបន្ត ប្រឆាំងនឹងការសម្រេចនេះទៅតុលាការកំពូល។
លោក ជូង ជួងី មេធាវីការពារក្ដីឲ្យសកម្មជនគណបក្សសង្គ្រោះជាតិ អះអាងថា ការសម្រេចដូចនេះរបស់សាលាឧទ្ធរណ៍ គឺមានភាពអយុត្តិធម៌ ជាពិសេសនោះ ប៉ះពាល់សិទ្ធិជាមូលដ្ឋានចំពោះកូនក្ដីរបស់ខ្លួន។ លោកចាត់ទុកថា កូនក្តីរបស់លោកពុំបានប្រព្រឹត្តបទល្មើសដូចការដាក់បន្ទុកនោះទេ៖ «ខ្ញុំយល់ថា ការសម្រេចហ្នឹង គឺឥតយុត្តិធម៌ទេ។ រហូតមកដល់ពេលហ្នឹង កូនក្តីទាំងបីនាក់នៅតែជនស្អាតស្អំដែល ព្រោះឥតមានសាលក្រមណាថាគាត់មានទោសនៅឡើយ»។
បើទោះជាសវនាការសុំនៅក្រៅឃុំនេះ ធ្វើឡើងជាសាធារណៈក៏ដោយ ក៏អ្នកសង្កេតការណ៍មួយចំនួន និងអ្នកសារព័ត៌មានដែលចូលរួមស្ដាប់សវនាការ មិនត្រូវបានអនុញ្ញាតឲ្យឃ្លាំមើលនៅក្នុងបន្ទប់ជំនុំជម្រះនោះដែរ។ សូម្បីថតរូបភាព ក៏ត្រូវបានឆ្មាំនៅសាលាឧទ្ធរណ៍ រឹតបន្តឹងថែមទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។