សមាជិក​សភា​អាស៊ាន​ស្នើ​គ.ជ.ប​ចាត់​វិធានការ​ការ​ថ្លែង​សារ​គំរាម​របស់​មន្ត្រី​ជាន់​ខ្ពស់​បក្ស​ប្រជាជន

ដោយ ខែ សុណង
2017-05-17
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
លោក​នាយក​រដ្ឋមន្ត្រី ហ៊ុន សែន ថ្លែង​ក្នុង​ខួប​ទី​១០ នៃ​ទិវា​អតីត​យុទ្ធជន​កម្ពុជា ថ្ងៃ​ទី​១០ ខែ​ឧសភា ឆ្នាំ​២០១៧។ Photo courtesy of PM Hun Sen's Facebook Page
លោក​នាយក​រដ្ឋមន្ត្រី ហ៊ុន សែន ថ្លែង​ក្នុង​ខួប​ទី​១០ នៃ​ទិវា​អតីត​យុទ្ធជន​កម្ពុជា ថ្ងៃ​ទី​១០ ខែ​ឧសភា ឆ្នាំ​២០១៧។ Photo courtesy of PM Hun Sen's Facebook Page
Photo courtesy of PM Hun Sen's Facebook Page

សមាជិក​សភា​អាស៊ាន​ដើម្បី​សិទ្ធិ​មនុស្ស ហៅ​កាត់​ថា អេ.ភី.អេច្ឆ.អា (APHR) បាន​ប្រតិកម្ម​ទៅ​នឹង​សារ​របស់​ថ្នាក់​ដឹកនាំ​រដ្ឋាភិបាល​នៃ​គណបក្ស​ប្រជាជន​កម្ពុជា ដែល​គេ​យល់​ថា ជា​សារ​គំរាម​កំហែង​ផ្ទួនៗ​នៅ​រដូវ​កាល​បោះឆ្នោត​ឃុំ-​សង្កាត់ កាន់​តែ​ខិត​ជិត​មក​ដល់។ សមាជិក​សភា​អាស៊ាន បាន​លើក​ឡើង​ចំ​ឈ្មោះ លោក ទៀ បាញ់ រដ្ឋមន្ត្រី​ក្រសួង​ការពារ​ជាតិ ថា​បាន​ប្រើ​ពាក្យ​សម្ដី​គំរាម​កំហែង​ម្ចាស់​ឆ្នោត នឹង​វាយ​អ្នក​ណា​ដែល​ហ៊ាន​ក្រោក​តវ៉ា​លទ្ធផល​ចាញ់​ឆ្នោត​ឲ្យ​បែក​ធ្មេញ និង​សារ​ប្រកាស​របស់​លោក ហ៊ុន សែន ដែល​គំរាម​ពី​ការ​ផ្ទុះ​សង្គ្រាម បើ​សិន​គណបក្ស​ខ្លួន​ចាញ់​ឆ្នោត។

សមាជិក​សភា​អាស៊ាន​ដើម្បី​សិទ្ធិ​មនុស្ស បាន​ស្នើ​ឲ្យ​ថ្នាក់​ដឹកនាំ​រដ្ឋាភិបាល​នៃ​គណបក្ស​ប្រជាជន​កម្ពុជា ធ្វើ​ជា​គំរូ​ដល់​ប្រជាពលរដ្ឋ​ដើម្បី​បញ្ចប់​ការ​គំរាមកំហែង និង​ស្នើ​ឲ្យ គ.ជ.ប ចាត់​វិធានការ​ដើម្បី​ធានា​ឲ្យ​ការ​បោះឆ្នោត​ប្រព្រឹត្ត​ទៅ​ដោយ​សេរី និង​យុត្តិធម៌។

ក្នុង​សារ​ផ្ញើ​ទៅ​កាន់​សារព័ត៌មាន​នៅ​ថ្ងៃ​ទី​១៧ ឧសភា លោក ឆាលស៍ សានទីអេហ្គោ (Charles Santiago) ជា​ប្រធាន​ក្រុម​សមាជិក​សភា​អាស៊ាន​ដើម្បី​សិទ្ធិ​មនុស្ស និង​ជា​សមាជិក​សភា​ម៉ាឡេស៊ី ថ្លែង​ថា សារ​របស់​លោក ហ៊ុន សែន និង​លោក ទៀ បាញ់ គឺ​ជា​ការ​គំរាមកំហែង​យ៉ាង​ច្បាស់​ដល់​គណបក្ស​ប្រឆាំង និង​ដល់​ជន​ទាំង​ឡាយ​ដែល​ហ៊ាន​រិះគន់​ដល់​គណបក្ស​កាន់​អំណាច មាន​សភាព​គួរ​ឲ្យ​ព្រួយ​បារម្ភ​ណាស់ ហើយ​ការ​គំរាមកំហែង​ទាំង​នោះ​ធ្វើ​ឲ្យ​ប៉ះពាល់​ដំណើរ​ការ​បោះឆ្នោត​ដោយ​សេរី និង​យុត្តិធម៌។ លោក​បន្ត​ថា ទោះ​បី​នេះ​មិនមែន​ជា​លើក​ទី​១​ដែល​មន្ត្រី​ជាន់​ខ្ពស់​រដ្ឋាភិបាល​ប្រើ​សារ​គំរាមកំហែង​ទាំង​នេះ​ក៏ដោយ ក៏​ការ​ដែល​រដ្ឋមន្ត្រី​ការពារ​ជាតិ ត្រូវ​បាន​អនុញ្ញាត​ឲ្យ​ប្រើ​ភាសា​បែប​នេះ ខណៈ​ការ​បោះឆ្នោត​ខិត​ជិត​ចូល​មក​ដល់ បាន​បង្ហាញ​ថា រដ្ឋាភិបាល​នៅ​តែ​មាន​បំណង​បន្ត​ក្ដោបក្ដាប់​អំណាច​ត​ទៅ​ទៀត។

លោក​បញ្ជាក់​នៅ​ក្នុង​សារ​នេះ​ទៀត​ថា វា​ជា​ពេល​ចាំបាច់​បំផុត​ដែល​អាជ្ញាធរ រួម​ទាំង គ.ជ.ប ត្រូវ​តែ​ចាត់​វិធានការ​ជា​វិជ្ជមាន​ដើម្បី​ធានា​ថា ការ​បោះឆ្នោត​អាច​ប្រព្រឹត្ត​ទៅ​ដោយ​សេរី និង​យុត្តិធម៌ និង​ដើម្បី​ឲ្យ​ប្រជាពលរដ្ឋ​កម្ពុជា អាច​បង្ហាញ​សេចក្ដី​ប្រាថ្នា​ផ្នែក​នយោបាយ​របស់​ខ្លួន ដោយ​មិន​មាន​ការ​ភ័យ​ខ្លាច​ពី​សុវត្ថិភាព។ លោក ហ៊ុន សែន គួរ​ធ្វើ​ជា​គំរូ​ល្អ​ដោយ​បញ្ចប់​ការ​គំរាមកំហែង។ លោក​ថា​ ភាព​ស្រប​ច្បាប់​នៃ​ដំណើរ​ការ​បោះឆ្នោត​កាន់​តែ​ខិត​ទៅ​រក​ភាព​ស្រពេចស្រពិល ហើយ​សហគមន៍​អន្តរជាតិ នឹង​ឃ្លាំមើល​អ្វី​ដែល​នឹង​កើត​ឡើង​នៅ​ថ្ងៃ​ទី​៤ ខែ​មិថុនា។

ឆ្លើយតប​ទៅ​នឹង​មតិ​រិះគន់​របស់​សមាជិក​សភា​អាស៊ាន​ដើម្បី​សិទ្ធិ​មនុស្ស​ពី​សារ​របស់​អ្នក​ដឹកនាំ​គណបក្ស​ប្រជាជន​កម្ពុជា អ្នក​នាំ​ពាក្យ​គណៈកម្មាធិការ​ជាតិ​រៀបចំ​ការ​បោះឆ្នោត លោក ហង្ស ពុទ្ធា មាន​ប្រសាសន៍​ថា គ.ជ.ប នឹង​ធ្វើ​ការ​ពិនិត្យ​លើ​សារ​របស់​អ្នក​នយោបាយ​ចាប់​ពី​ថ្ងៃ​ទី​២០ ឧសភា ដល់​ថ្ងៃ​ទី​២ មិថុនា ដែល​ជា​អំឡុង​ពេល​ឃោសនា​បោះឆ្នោត ដោយឡែក​រឿង​ដែល​កើត​ឡើង​នៅ​មុន ឬ​ក្រោយ​ថ្ងៃ​ឃោសនា​គឺ​ជា​បន្ទុក​របស់​អាជ្ញាធរ៖ «បើ​សិន​ជា​ភាគី​ណា​មិន​សុខ​ចិត្ត​លើក​បញ្ហា​នេះ​ត្រូវ​ប្ដឹង​ទៅ​អាជ្ញាធរ រវាង គ.ជ.ប និង​អាជ្ញាធរ​យើង​ចែក​ប្រក្រតីទិន​ច្បាស់លាស់។ ចំពោះ​អនុសាសន៍​ទាំង​ឡាយ ពិសេស​ការ​ចង់​ឲ្យ​មាន​ការ​បោះឆ្នោត​ឲ្យ​មាន​បរិយាកាស​ល្អ ជា​ចំណុច​ល្អ​ប្រសើរ​ហើយ»

ទាក់ទង​បញ្ហា​នេះ​ដែរ អ្នក​នាំ​ពាក្យ​ទីស្ដីការ​គណៈរដ្ឋមន្ត្រី លោក ផៃ ស៊ីផាន ថ្លែង​ថា លោក ឆាលស៍ សានទីអេហ្គោ កំពុង​ប្រាសចាក​ពី​ក្រម​អាស៊ាន​ដែល​បាន​លូកលាន់​បញ្ហា​ផ្ទៃ​ក្នុង​កម្ពុជា និង​មិន​គោរព​ធម្មនុញ្ញ​អាស៊ាន។ លោក​ថា កម្ពុជា​មិន​ដែល​លូកលាន់​​អ្នក​នយោបាយ​របស់​ប្រទេស​ដទៃ​ឡើយ។ លោក​ហៅ​ការ​រិះគន់​នេះ ថា​ជា​ការ​លើក​ឡើង​មិន​មែន​ជា​ការ​សម្ដែង​មតិ​ពិត ប៉ុន្តែ​ជា​ការ​លើក​ឡើង​ក្នុង​និន្នាការ​នយោបាយ​ប្រឆាំង​រដ្ឋាភិបាល​ប្រឆាំង​គណបក្ស​នយោបាយ​តែ​ប៉ុណ្ណោះ៖ «គាត់​នៅ​ឆ្ងាយ​ពី​កម្ពុជា គាត់​អត់​យល់ អត់​ដឹង​អំពី​សារ​របស់​ថ្នាក់​ដឹកនាំ​របស់​កម្ពុជា ដែល​បាន​លើក​ឡើង​ជា​សាធារណៈ​នោះ​ទេ។ គាត់​យល់​ច្រឡំ​ទាំង​អស់ ហើយ​គាត់​យល់​ច្រឡំ​ថា អ្វី​ដែល​គណបក្ស​ប្រជាជន ក៏​ដូចជា​រាជ​រដ្ឋាភិបាល​ជា​អ្នក​ប្រឆាំង​ជាមួយ​សិទ្ធិ​មនុស្ស ប្រឆាំង​នឹង​ដំណើរការ​នៃ​ការ​បោះឆ្នោត ប្រឆាំង​នឹង​សិទ្ធិ​សេរីភាព​នៃ​ការ​បោះឆ្នោត»

អាស៊ីសេរី មិន​អាច​ទាក់ទង​លោក ឈុំ សុជាត អ្នក​នាំ​ក្រសួង​ការពារ​ជាតិ ដើម្បី​ឆ្លើយតប​បញ្ហា​នេះ​បាន​ទេ នៅ​ថ្ងៃ​ទី​១៧ ឧសភា។

ទៀ បាញ់ ៨៥៥ ២០១៦
រដ្ឋមន្ត្រី​ក្រសួង​ការពារ​ជាតិ លោក ទៀ បាញ់ ថ្លែង​ក្នុង​ពិធី​ទទួល​កងកម្លាំង​រក្សា​សន្តិភាព​កម្ពុជា មក​ពី​ប្រទេស​ស៊ូដង់ និង​ប្រទេស​ម៉ាលី កាល​ពី​ថ្ងៃ​ទី​៩ ខែ​មិថុនា ឆ្នាំ​២០១៦។ RFA/Cheu Sideth RFA/Cheu Sideth

រដ្ឋមន្ត្រី​ក្រសួង​ការពារ​ជាតិ លោក ទៀ បាញ់ ចេញ​សារ​ព្រមាន​ជា​សាធារណៈ​ថា នឹង​វាយ​អ្នក​ណា​ដែល​ហ៊ាន​ក្រោក​តវ៉ា​លទ្ធផល​ចាញ់​ឆ្នោត​ឲ្យ​បែក​ធ្មេញ។ ការ​តវ៉ា​ណា​មួយ​ក្រោយ​ពេល​ចាញ់​ឆ្នោត គឺ​នាំ​ឲ្យ​មាន​ការ​ចលាចល ដែល​នាំ​ឲ្យ​មាន​ភាព​អសន្តិសុខ​ក្នុង​សង្គម ដែល​លោក​ថា លោក​មិន​អាច​បណ្ដែតបណ្ដោយ​ឲ្យ​កើត​ឡើង​តទៅទៀត​បាន​ទេ ព្រោះ​ត្រូវ​ចំណាយ​ច្រើន​ណាស់​ក្នុង​ការ​បង្ក្រាប​កន្លង​មក។

កាល​ពី​ថ្ងៃ​ទី​១០ ឧសភា ក្នុង​ខួប​ទី​១០ នៃ​ទិវា​អតីត​យុទ្ធជន​កម្ពុជា លោក ហ៊ុន សែន ព្រមាន​ជា​ថ្មី​ថា សង្គ្រាម​កើត​ឡើង​វិញ ប្រសិន​បើ​បក្ស​ខ្លួន​ចាញ់​ឆ្នោត ឬ​ពលរដ្ឋ​មិន​ខំ​ថែរក្សា​អ្វី​ដែល​មាន​នៅ​ក្នុង​ដៃ។ លោក​ថា លោក​ខំ​ប្រឹង​កសាង​សន្តិភាព និង​បង្រួបបង្រួម​ជាតិ​យ៉ាង​លំបាក​មក​ឲ្យ​ប្រទេស​កម្ពុជា ដ៏​កម្សត់ ប៉ុន្តែ​បែរ​ជា​មាន​ក្រុម​មួយ​មក​សាង​គ្រោះ​ឲ្យ​ជាតិ​ទៅ​វិញ។ លោក​ថា បើ​គណបក្ស​លោក​មិន​បាន​កាន់​អំណាច​បន្ត​ទៀត​ទេ សង្គ្រាម​នឹង​ផ្ទុះ​ឡើង​ជា​ថ្មី​នៅ​កម្ពុជា។

ជុំវិញ​សារ​ប្រកាស​សង្គ្រាម​នេះ នៅ​ជិត​ការ​បោះ​ឆ្នោត ត្រូវ​បាន​ព្រះសង្ឃ អ្នក​នយោបាយ​ជើង​ចាស់ និង​តំណាងរាស្ត្រ​ក្នុង​សង្គម​ប្រជាធិបតេយ្យ និង​មន្ត្រី​កិច្ចការ​តំបន់​អាស៊ី​របស់​អង្គការ​ឃ្លាំមើល​សិទ្ធិមនុស្ស​អន្តរជាតិ ចាត់​ទុក​ថា ជា​សារ​ទាល់ច្រក ជា​សារ​ហួស​សម័យ គ្មាន​ប្រសិទ្ធភាព និង​បង្ហាញ​នូវ​ភាព​កំសាក​ខាង​ផ្នែក​នយោបាយ​ក្នុង​ឆាក​ជាតិ និង​អន្តរជាតិ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (7)
  • បោះពុម្ព
  • ចែករំលែក
  • អ៊ីម៉ែល

Alave in US

I am so tired with Hun Sen's threaten. We already know that Khmer military is not for the Khmer nation, it is belonged to CPP.
Hun Sen does not want to vote because he knew the majority not support him. So he tried many ways to win the vote by threaten the public by create war if he lost the vote.
The question is who will have weapons to have war against him, if others have only bear hands? sic!!!

May 18, 2017 12:52 PM

Kone Khmer

យើងត្រូវដឹងថា ទាហានខ្មែរសព្វថ្ងៃមិនម៉ែនទាហានអព្យាក្រឹតទេ។ គឺជាទាហានបក្ស ដូច្នេះបក្សប្រជាជនធ្វើជាមេចាក់អាប៉ោង បានន័យថា: អ្នកចាក់ខុសក៏ស៊ី អ្នកចាក់ត្រូវក៏ស៊ី បើមិនព្រម រ៉ែយកលុយវិញ។
នេៈគឺល្បែងបក្សប្រជាជនកំពុងតែលេងក្នុងពេលបោះឆ្នោត។
ដូច្នេះបើអន្តរជាតិមិនជួបធ្វើអន្តរាគម៌ទេ បក្សកាន់អំណាចនៅតែឈ្នះដដែល។

May 18, 2017 12:35 PM

អ្នក​អាន​អនាមិក

ពលរដ្ឋខ្មែរឈប់ទទួលទានបាយនឹងត្រឡោកតាំងពីយូរមកហើយ!!!

May 18, 2017 06:17 AM

អ្នក​អាន​អនាមិក

អ្នកនយោបាយតែងប្រកាសថា សមគ្គីរស់ បែកបាក់សាមគ្គី ស្លាប់ ។ តែមកដល់ពេលនេះ ពលរដ្ឋបានសូមអ្នកអ្នកនយោបាយវិញម្តងថា សូមឲ្យមានការសាមគ្គិជាមួយពលរដ្ឋវិញម្តង ព្រោះពលរដ្ឋស្គាល់ចំណុចខ្សោយរបស៉ពួកបក្សឧទ្ទាមបែកងេញពីកុម្មុយនិស្តទៅរួមជាមួយយួនយៀកកុងគំសំឡាប់មនុស្សដែលមានតាំងពីឆ្នាំ១៩៧៣ ។ នៅក្នុងភាសានេះលោកនួន ជា+ខៀវ សំផនបានបញ្ជាក់នៅក្នុងតុលាការវិសាម៉ាញកាត់ទោសមេដឹកនាំជាន់ខ្ពស់ខ្មែរក្រហមហើយដែរ ។ តែចៅក្រមតុលាការនេះកាត់ទោសនៅថ្ងៃទី៨ ខែសីហា ឆ្នាំ២០១៤ ដោយលំអៀង។ ដូច្នេះ ហើយទើបនៅថ្ងៃទី១៧ ខែតុលា ឆ្នាំ២០១៤ យើងជនរងគ្រោះ និងជាដើមបណ្តឹងរដ្ឋប្បវេណីយ៍ដាក់ញ៉ាត់ទៅចៅក្រមទាំងពីរ (ចៅក្រមជាតនិង អន្តរជាតិ)និង ទៅតាមស្ថានទូតនានារហូតដល់អង្គការសហប្រជាជាតិ ដើម្បី ស្វែងរកយុត្តិធម៍ តាមច្បាប់ស្រប តាមសេចក្តីដែលបានចរចារ (១៩៩៦ - ២០០៦)។ល។ នៅឆ្នាំ១៩៩៧ ក្នុងខែមិនា ថ្ងៃទី៣០ និងខែកក្កដា ថ្ងៃទី៥,៦, ៧ ខែកក្កដា បក្សប្រជាជនជា ពួកអតីតឧទ្តាមនេះមិនបានធ្វើឲ្យរាស្ត្របានសុខទេ។
ដោយសារមូលហេតុដូចបានរៀបរាប់ដោយសង្ខេបខាងលើ យើងជាពលរដ្ឋទាំងក្នុងនិង ក្រៅប្រទេសបានដាក់ពាក្យប្តឹងទៅដល់តុលាការព្រហ្មទណ្ឌអន្តរជាតិនៅថ្ងៃទី២២ ខែមិថុនា ឆ្នាំ២០១២ ហើយបានថែមភស្តាងថ្មីៗដល់តុលាការនេះទៀត ។ ដូច្នេះ អ្នកនយោបាយត្រូវធ្វើសង្គ្រាមទិកបុិចបណ្តេញអតីតមេខ្មែរឧទ្ទាមគំសំឡាប់មនុស្សខ្មែរឲ្យដាច់ពូចចេញពីអំណាចស្របតាមបណ្តឹងរបស់ពលរដ្ឋដែលមានស្រាប់បានជាមុនសិន ហើយធ្វើការបោះឆ្នោតជាក្រោយ ស្របតាមកិច្ចព្រមព្រៀងសន្តិភាពទីក្រុងបា៉រីស៍ទី២៣ ខែតុលា ឆ្នាំ១៩៩១ ក៏មិនទាន់ហួសពេលដែរ ។ នេះខ្ញំុសូមមិនរាប់បញ្ចូលការហាមប្រាមមិនឲ្យឃោសនាតាមទីសាធារណនិង បាត់ឈ្មោះខ្មែរក្នុងបញ្ជីបោះឆ្នោតផង៕

May 18, 2017 01:15 AM

Cambodian Freedom

ពី Siem Reap

ទៅ​សង្ឃឹម​អី​ គជប ព្រោះ​ក្រោម​អំ​ណាច​ ហ៊ុន សែន ដ័​ដែរ​

May 17, 2017 10:07 PM

មើល​មតិ​ទាំង​អស់.

គេហទំព័រ​ទាំងមូល