រដ្ឋាភិបាល​មិន​ទាន់​តប​សំណើ​របស់​បក្ស​ប្រឆាំង​រឿង​ទាហាន​វៀតណាម​នៅ​លើ​ដី​ខ្មែរ

0:00 / 0:00

តំណាងរាស្ត្រ​មណ្ឌល​ខេត្ត​កំពង់ចាម ស្នើ​​ប្រធាន​គណៈកម្មការ​កិច្ចការ​ព្រំដែន​កម្ពុជា ឱ្យ​ដោះស្រាយ​បញ្ហា​ទាហាន​វៀតណាម ចូល​មក​បោះ​ទីតាំង​ក្នុង​ទឹក​ដី​ខ្មែរ​​​នៅ​ចំណុច​មួយ​ចំនួន​ ក្នុង​ឃុំ​ត្រពាំងផ្លុង ស្រុក​ពញាក្រែក ខេត្ត​ត្បូងឃ្មុំ ដែល​បណ្ដាល​ឱ្យ​ប៉ះពាល់​ដល់​ការ​ប្រកប​របរ​ចិញ្ចឹម​ជីវិត​របស់​ពលរដ្ឋ​នៅ​តំបន់​នោះ។ ទាក់ទង​បញ្ហា​នេះ​ប្រធាន​កិច្ចការ​ព្រំដែន​កម្ពុជា នៅ​មិន​ទាន់​ឆ្លើយ​តប​យ៉ាង​ណា​ទេ ព្រោះ​លោក​មិន​ទាន់​ទទួល​បាន​លិខិត​នោះ។

លិខិត​មួយ​ច្បាប់​របស់​តំណាងរាស្ត្រ​គណបក្ស​សង្គ្រោះ​ជាតិ ខេត្ត​កំពង់ចាម បាន​ផ្ញើ​ទៅ​ប្រធាន​គណៈកម្មការ​កិច្ចការ​ព្រំដែន តាម​រយៈ​លោក ហេង សំរិន ប្រធាន​រដ្ឋ​សភា។ សំណើ​នោះ បាន​ផ្ញើ​ទៅ​ដល់​ខុទ្ទកាល័យ​ប្រធាន​រដ្ឋ​សភា នៅ​ព្រឹក​ថ្ងៃ​ទី​១២ ខែ​មិថុនា ក៏ប៉ុន្តែ​នៅ​មិន​ទាន់​ដល់​ដៃ​រដ្ឋមន្ត្រី​ទទួល​បន្ទុក​កិច្ចការ​ព្រំដែន​នៅ​ឡើយ​ទេ។

ទេសរដ្ឋមន្ត្រី​ទទួល​បន្ទុក​បេសកកម្ម​ពិសេស​កិច្ចការ​ព្រំដែន លោក វ៉ា គឹមហុង មាន​ប្រសាសន៍​នៅ​ថ្ងៃ​ទី​១៣ ខែ​មិថុនា ថា លោក​មិន​អាច​ពន្យល់​ជុំវិញ​បញ្ហា​នេះ​បាន​​ទេ ព្រោះ​លោក​មិន​ទាន់​ទទួល​បាន​លិខិត​របស់​អ្នក​តំណាងរាស្ត្រ​ខេត្ត​កំពង់ចាម។ យ៉ាង​ណា​លោក​យល់​ថា ការ​ចេញ​ចូល​ប៉ះពាល់​ដី​គ្នា​ទៅ​វិញ​ទៅ​មក​រវាង​កម្លាំង​ការពារ​ព្រំដែន​នៃ​ប្រទេស​ទាំង​ពីរ គឺ​តែង​កើត​មាន​ឡើង​ដោយ​ជៀស​មិន​រួច។

លោក វ៉ា គឹមហុង៖ «ចាំ​មើល​លិខិត​គេ​សិន​ទៅ​ណា! ព្រោះ​ខ្ញុំ​មិន​ទាន់​ឃើញ​លិខិត​គេ​ទេ ព្រោះ​ខ្ញុំ​ដឹង​ថា មាន​យាម​ល្បាត​នៅ​តំបន់​ហ្នឹង ព្រោះ​រឿង​ហ្នឹង​យូរ​ហើយ មិន​មែន​ថ្មី​ទេ ហើយ​គាត់​ទើប​ទៅ​ឃើញ ហើយ​វរៈ​ព្រំដែន​យើង​ក៏​ទទួល​ស្គាល់​ថា មាន​ការ​ហូរ​ចូល​ដែរ។ នៅ​តាម​ព្រំដែន​គេ​ចេញ​ចូលៗ​គ្នា​ហ្នឹង​ណា»

លិខិត​របស់​អ្នក​តំណាងរាស្ត្រ​គណបក្ស​សង្គ្រោះ​ជាតិ មណ្ឌល​ខេត្ត​កំពង់ចាម លោក វ៉ាន់ ណារិទ្ធ បញ្ជាក់​ថា ទាហាន​វៀតណាម​ ចូល​មក​យាម​ល្បាត​ប្រចាំ​ការ​​នៅ​តំបន់​ត្រពាំង​ត្រឡោក ត្រពាំងធ្លក ស្ថិត​នៅ​ក្នុង​ភូមិ​ត្រពាំងរំសែង ឃុំ​ត្រពាំងផ្លុង ស្រុក​ពញាក្រែក។ លិខិត​នេះ ធ្វើ​ឡើង​ក្រោយ​ពេល​អ្នក​តំណាងរាស្ត្រ​គណបក្ស​ប្រឆាំង​ដឹកនាំ​សមាជិក​របស់​ខ្លួន និង​ពលរដ្ឋ​ចុះ​ទៅ​ពិនិត្យ​ស្ថានភាព​ផ្ទាល់​កាល​ពី​ថ្ងៃ​ទី​៧ ខែ​មិថុនា ស្រប​តាម​ពាក្យ​បណ្ដឹង​របស់​អ្នក​ភូមិ។ ការ​ចុះ​ពិនិត្យ​ គឺ​រក​ឃើញ​ថា ទាហាន​វៀតណាម ពិត​ជា​បាន​ចូល​យាមល្បាត​ក្នុង​ដី​ខ្មែរ​ដែល​មាន​ចម្ងាយ​ប្រមាណ ៥០០​ម៉ែត្រ ពី​បង្គោល​ព្រំដែន​លេខ ១១៤ ប្រាកដ​មែន។ លើស​ពី​នេះ ទាហាន​ព្រំដែន​វៀតណាម ថែម​ទាំង​ហាម​ឃាត់​ប្រជាពលរដ្ឋ​ខ្មែរ​មិន​ឱ្យ​ឆ្លង​កាត់ ឬ​ចូល​រុករក​អនុផល​ព្រៃឈើ ដូចជា​រក​វល្លិ បេះ​ផ្លែ​ឈើ រក​អុស​នៅ​ក្នុង​ព្រៃ​ដែល​ពួក​គេ​បោះ​ទីតាំង​ជា​ដើម។

ទោះ​យ៉ាង​នេះ​ក្តី តំណាងរាស្ត្រ​មណ្ឌល​ខេត្ត​កំពង់ចាម លោក វ៉ាន់ ណារិទ្ធ មាន​ប្រសាសន៍​ថា ខាង​លោក​នឹង​រង់ចាំ​ការ​ឆ្លើយ​តប​ជា​ផ្លូវ​ការ​ពី​សំណាក់​​ទេសរដ្ឋមន្ត្រី​ទទួល​បន្ទុក​កិច្ចការ​ព្រំដែន​ជុំវិញ​បញ្ហា​នេះ។ លោក​បន្ត​ថា ការ​យាមល្បាត​អាច​ប៉ះពាល់​ដី​គ្នា​ទៅ​វិញ​ទៅ​មក​ខ្លះ​មែន ប៉ុន្តែ​ករណី​នេះ​មិន​មែន​ជា​ការ​យាមល្បាត​ឡើយ ព្រោះ​ពួកគេ​ចូល​មក​ក្នុង​ដី​ខ្មែរ​ចម្ងាយ​រាប់​រយ​ម៉ែត្រ​ពី​បង្គោល​ព្រំដែន ហើយ​ថែម​ទាំង​ហាមឃាត់​ពលរដ្ឋ​ខ្មែរ​មិន​ឱ្យ​ឆ្លង​កាត់ ឬ​ធ្វើ​អ្វី​លើ​ដី​នោះ​បាន​ទៀត​ជា​ហេតុ​លោក​គិត​ថា វៀតណាម ចង់​បាន​ដីខ្មែរ​នៅ​តំបន់​នោះ​តែម្ដង។

លោក វ៉ាន់ ណារិទ្ធ៖ «អ្វី​ដែល​ខ្ញុំ​គិត គឺ​គោលបំណង​ចង់​យក​ដី​តំបន់​ហ្នឹង​តែម្ដង ព្រោះ​ដី​តាំង​ពី​ដូន​តា​មក​ប្រជាពលរដ្ឋ​គាត់​ចេញ​ចូល​កន្លែង​ហ្នឹង​បាន​ស្រេច​តែ​នឹង​ចិត្ត ដល់​ឥឡូវ​គេ​មិន​ឱ្យ​ចូល»

អ្នក​តំណាង​គណបក្ស​ប្រឆាំង​ដដែល​បញ្ជាក់​ថា ប្រសិន​បើ​ការ​ឆ្លើយ​តប​ជា​ផ្លូវការ​ពី​សំណាក់​ទេសរដ្ឋមន្ត្រី​ទទួល​បន្ទុក​កិច្ចការ​ព្រំដែន​ ដូច​ទៅ​នឹង​ការ​យល់​ឃើញ​របស់​លោក​ពេល​នេះ លោក វ៉ាន់ ណារិទ្ធ នឹង​ដឹកនាំ​ប្រជាពលរដ្ឋ ព្រម​ទាំង​អ្នក​តំណាងរាស្ត្រ​ឱ្យ​កាន់តែ​ច្រើន​ ដើម្បី​ចុះ​ទៅ​ពិនិត្យ​តំបន់​មាន​បញ្ហា​ម្ដង​ទៀត ហើយ​នឹង​ប្រកាស​ជា​សាធារណៈ​ចំពោះ​ទង្វើ​របស់​រាជរដ្ឋាភិបាល​កម្ពុជា ដែល​អនុញ្ញាត​ឱ្យ​កងទ័ព​វៀតណាម មក​បោះ​ទីតាំង​លើ​ដី​ខ្មែរ ហើយ​ថែម​ទាំង​បណ្ដោយ​ឱ្យ​កងទ័ព​បរទេស​មួយ​នេះ ហាមឃាត់​ពលរដ្ឋ​ខ្មែរ​មិន​ឱ្យ​អាស្រ័យផល​លើ​ដី​របស់​ខ្លួន​បាន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។