លោក ទៀ បាញ់ រដ្ឋមន្ត្រីក្រសួងការពារជាតិ កាលពីថ្ងៃអង្គារ ទី១៨ មីនា មានប្រសាសន៍ថា កម្ពុជាបានបញ្ជូនឧទ្ធម្ភាគចក្រចំនួន ៤គ្រឿង និងនាវាពីរគ្រឿងទៅជួយរកយន្តហោះប្រភេទ Boeing ៧៧៧ ជើងហោះហើរលេខ ៣៧០ របស់ម៉ាឡេស៊ី ដែលបានបាត់ដំណឹងជាង ១សប្ដាហ៍កន្លងទៅ។
ក្រសួងការពារជាតិកម្ពុជា ក៏បានចេញបញ្ជាគ្រប់អង្គភាពចំណុះកងទ័ពជើងគោក ជើងទឹក ជើងអាកាស អង្គភាពតាមបណ្ដាកោះនាវាល្បាតក្នុងដែនទឹក អ្នកប្រកបរបរនេសាទ កំពុងស្វែងរកសញ្ញានានា ពាក់ព័ន្ធនឹងការបាត់បង់យន្តហោះនេះ។
នាវាទាំងពីរដែលចេញទៅជួយស្វែងរកយន្តហោះនោះ ផ្ទុកកងទ័ពជើងទឹកចំនួន ២៥នាក់ ក្នុង១នាវា។ ក្រុមរុករករបស់កម្ពុជា នឹងធ្វើការល្បាតនៅតាមបណ្ដាដែនកោះ និងដែនសមុទ្រជាប់ព្រំដែន កម្ពុជា-វៀតណាម។ យន្តហោះរបស់ក្រុមហ៊ុនអាកាសចរណ៍ម៉ាឡេស៊ី ធ្វើដំណើរចេញពីទីក្រុងកូឡាឡាំពួរ ទៅកាន់ទីក្រុងប៉េកាំង ដោយផ្ទុកអ្នកដំណើរ និងបុគ្គលិកចំនួន ២៣៩នាក់ ហើយបានបាត់ដំណឹងសូន្យឈឹងតាំងពីថ្ងៃសោរ៍ ទី៨ ខែមីនា កន្លងទៅនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។