មន្ត្រីជាន់ខ្ពស់ក្រសួងការបរទេសបញ្ជាក់ថា កត្តាដែលអាចធ្វើឱ្យប៉ះពាល់ដល់ទំនាក់ទំនងរវាងកម្ពុជា ជាមួយសហរដ្ឋអាមេរិក និងជាមួយសហភាពអឺរ៉ុប គឺមិនមែនបង្កឡើងដោយកម្ពុជា ឡើយ។ ការបញ្ជាក់នេះ ក្រោយពីក្រសួងការបរទេសកម្ពុជា បានចាត់ទុកការរិះគន់របស់សហគមន៍អន្តរជាតិជុំវិញការធ្វើវិសោធនកម្មច្បាប់ស្ដីពីគណបក្សនយោបាយ ថាជាការជ្រៀតជ្រែកកិច្ចការផ្ទៃក្នុងរបស់កម្ពុជា។
បើទោះបីជាក្រសួងការបរទេសកម្ពុជា បង្ហាញរបាយការណ៍ថា ទំនាក់ទំនងការទូតរវាងកម្ពុជា ជាមួយសហរដ្ឋអាមេរិក និងជាមួយសហភាពអឺរ៉ុប កាលពីឆ្នាំ២០១៦ កន្លងទៅ មានការរីកចម្រើនគួរឱ្យកត់សម្គាល់ក្ដី ប៉ុន្តែហេតុការណ៍ណាមួយដែលអាចធ្វើឱ្យប៉ះពាល់ទំនាក់ទំនងកំពុងរីកចម្រើនពេលនេះរហូតអាចមានភាពតានតឹង ឬមិនសូវល្អនោះ មិនមែនកំហុសរបស់ភាគីកម្ពុជា ឡើយ។
រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិកម្ពុជា លោក អ៊ូច បូរិទ្ធ ថ្លែងនៅថ្ងៃទី២៨ ខែកុម្ភៈ ថា អ្វីដែលកម្ពុជា កំពុងធ្វើបច្ចុប្បន្ន ជាពិសេសវិសោធនកម្មច្បាប់ស្ដីពីគណបក្សនយោបាយ គឺជារឿងផ្ទៃក្នុងរបស់កម្ពុជា ហើយថា បើការធ្វើវិសោធនកម្មច្បាប់នេះ ធ្វើឱ្យប៉ះពាល់ទំនាក់ទំនងរវាងកម្ពុជា ជាមួយសហរដ្ឋអាមេរិក និងសហភាពអឺរ៉ុបនោះ គឺអាស្រ័យលើបរទេសទាំងនោះ៖ «អ្វីដែលយើងធ្វើកន្លងមកហើយនោះ ជាពិសេសវិសោធនកម្មច្បាប់គណបក្សនយោបាយក៏ដោយ ច្បាប់បោះឆ្នោតក៏ដោយ នោះវាគឺជារឿងផ្ទៃក្នុងរបស់កម្ពុជា អត់នរណាមកហាមឃាត់ថា អត់ធ្វើបានទេ។ ប៉ះមិនប៉ះ អត់អាស្រ័យលើយើងទេ ស្រេចតែអស់លោកគិតទៅ លោកឯងចេះប៉ះក៏ប៉ះ មិនប៉ះ ក៏អីទៅ»។
ការឆ្លើយតបនេះ បន្ទាប់សហរដ្ឋអាមេរិក សហភាពអឺរ៉ុប និងអង្គការអន្តរជាតិឃ្លាំងមើលបញ្ហាសិទ្ធិមនុស្សនៅកម្ពុជា មួយចំនួនទៀត រិះគន់យ៉ាងខ្លាំងចំពោះក្រុមតំណាងរាស្ត្រគណបក្សកាន់អំណាចដែលបានធ្វើវិសោធនកម្មច្បាប់ស្ដីពីគណបក្សនយោបាយយ៉ាងឆាប់រហ័ស។ អ្នកខ្លះយល់ថា ការធ្វើវិសោធនកម្មច្បាប់នេះ ប្រៀបបានសម្លាប់លទ្ធិប្រជាធិបតេយ្យនៅកម្ពុជា និងមានទិសដៅតែមួយគត់ដើម្បីបំផ្លាញគណបក្សប្រឆាំងប៉ុណ្ណោះ។
កាលពីថ្ងៃទី២០ ខែកុម្ភៈ ក្រសួងការបរទេសបានចេញសេចក្ដីថ្លែងការណ៍មួយដើម្បីប្រតិកម្មតបចំពោះស្ថានទូតសហរដ្ឋអាមេរិក ដែលលើកឡើងថា ច្បាប់ស្ដីពីគណបក្សនយោបាយបានផ្ដល់អំណាចយ៉ាងធំដល់រដ្ឋាភិបាលកម្ពុជា ក្នុងការដាក់កំហិតដល់សេរីភាពក្នុងការបញ្ចេញមតិ និងសកម្មភាពស្របច្បាប់នានារបស់គណបក្សនយោបាយ និងការឈានទៅរំលាយគណបក្សនយោបាយ។
ដំណាលគ្នានេះ សហភាពអឺរ៉ុបកាលពីថ្ងៃទី២២ ខែកុម្ភៈ បានយល់ឃើញដែរថា ការអនុម័តច្បាប់ស្ដីពីគណបក្សនយោបាយនៅក្នុងរដ្ឋសភាកាលពីថ្ងៃទី២០ ខែកុម្ភៈ គឺជាការរឹតត្បិតតាមអំពើចិត្តលើសកម្មភាពរបស់គណបក្សនយោបាយនានា ដែលឈានទៅដល់ការរំលាយគណបក្សនយោបាយតែម្ដង។
ទាំងសហរដ្ឋអាមេរិក និងសហភាពអឺរ៉ុប អំពាវនាវស្រដៀងគ្នាថា រដ្ឋាភិបាលកម្ពុជា ត្រូវប្រកាន់យកនូវជំហរចាំបាច់នានាដើម្បីធានាថា យុទ្ធនាការឃោសនាបោះឆ្នោត និងការបោះឆ្នោតក្នុងឆ្នាំ២០១៧ និងឆ្នាំ២០១៨ ខាងមុន មានលក្ខណៈសេរី បើកចំហ និងមានតម្លាភាព ហើយគ្រប់គណបក្សនយោបាយទាំងអស់មានឱកាសដើម្បីចូលរួមប្រកួតប្រជែងដោយស្មើភាពគ្នា។
របាយការណ៍ប្រចាំឆ្នាំរបស់ក្រសួងការបរទេសបង្ហាញថា កម្ពុជា-សហរដ្ឋអាមេរិក មានកិច្ចសហប្រតិបត្តិការរីកចម្រើនគួរឱ្យកត់សម្គាល់នៅក្នុងឆ្នាំ២០១៦ កន្លងទៅ ដោយភាគីទាំងពីរបានចុះហត្ថលេខាលើកិច្ចព្រមព្រៀងស្ដីពីកិច្ចសហប្រតិបត្តិការសម្រាប់ការអនុវត្តកម្មវិធីសុខភាពសាធារណៈ និងការអប់រំ ដែលមានទឹកប្រាក់ចំនួន ២៤លានដុល្លារសហរដ្ឋអាមេរិក និងសម្រាប់កម្មវិធីបរិស្ថានមានទឹកប្រាក់ចំនួនជាង ១១លានដុល្លារសហរដ្ឋអាមេរិក។
រីឯទំនាក់ទំនងការទូតរវាងកម្ពុជា ជាមួយប្រទេស៥០ នៅតំបន់អឺរ៉ុបវិញ បានធ្វើឱ្យសេដ្ឋកិច្ច ពាណិជ្ជកម្ម វិនិយោគទេសចរណ៍ និងកិច្ចសហប្រតិបត្តិការអភិវឌ្ឍន៍របស់កម្ពុជា មានការរីកចម្រើនគួរឱ្យកត់សម្គាល់ផងដែរ។ ជាមួយគ្នានោះ ប្រទេសអឺរ៉ុបខ្លះទៀត បានផ្ដល់ជំនួយរាប់សិបលានដុល្លារសម្រាប់វិស័យមួយចំនួនរបស់កម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។