រដ្ឋាភិបាលកុម្មុយនិស្តចិនសន្យាធ្វើជាខ្នងបង្អែករបស់រដ្ឋាភិបាលកម្ពុជាគ្រប់កាលៈទេសៈ ខណៈរដ្ឋាភិបាលរបស់លោកនាយករដ្ឋមន្ត្រី ហ៊ុន សែន កំពុងចោទប្រកាន់សហរដ្ឋអាមេរិក ថាជាអ្នកនៅពីក្រោយខ្នងលោក កឹម សុខា ក្នុងការបង្កើតឱ្យមានបដិវត្តន៍ពណ៌នៅកម្ពុជា។
ទំព័រហ្វេសប៊ុករបស់លោក ហ៊ុន សែន ចុះកាលពីថ្ងៃទី១១ កញ្ញា បញ្ជាក់ថា ឧបនាយករដ្ឋមន្ត្រីចិន លោក ចាង កាវលី (Zhang Gaoli) បានប្រាប់លោក ហ៊ុន សែន ថា បើកម្ពុជាត្រូវការអ្វីឲ្យចិនជួយ ឲ្យប្រាប់មកចិនភ្លាមនូវគម្រោងអាទិភាពនានាដែលកម្ពុជាត្រូវការជំនួយទាំងនោះ។
បន្ថែមពីនេះ ចិននឹងបន្តចូលរួមពង្រឹងការអភិវឌ្ឍប្រទេសកម្ពុជា ដោយពង្រីកកិច្ចសហប្រតិបត្តិការគ្រប់វិស័យ ហើយនៅឆ្នាំ២០១៨នេះ កម្ពុជាអាចនាំអង្ករចេញទៅចិនបន្ថែមទៀតទៅតាមកូតាថ្មីដែលបានសម្រេចផ្ដល់បន្ថែមរួចហើយកាលពីពេលថ្មីៗ។
ស្របពេលនេះដែរ លោក ហ៊ុន សែន បានសំដែងការអរគុណយ៉ាងខ្លាំងដល់ប្រទេសចិនដែលតែងជ្រោមជ្រែងកម្ពុជា ខណៈស្ថានភាពនយោបាយកម្ពុជាកំពុងកើនកម្ដៅ បន្ទាប់ពីរដ្ឋាភិបាលបានចាប់ខ្លួនមេដឹកនាំគណបក្សសង្គ្រោះជាតិ ក្រោមបទចោទថា ក្បត់ជាតិ រហូតធ្វើអោយមេដឹកនាំប្រទេសលោកសេរី ជុំវិញពិភពលោកភ្ញាក់ផ្អើលយ៉ាងខ្លាំង និងថ្កោលទោសការចាប់ខ្លួននេះ។ ប៉ុន្តែ រដ្ឋាភិបាលចិនតែងចេញមុខគាំទ្ររដ្ឋាភិបាលកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។