គណបក្សប្រឆាំងស្នើឲ្យភាគីសមាជិកសភាសហភាពអឺរ៉ុប ធ្វើជាអាជ្ញាកណ្ដាលក្នុងការស្វែងរកដំណោះស្រាយនយោបាយនៅកម្ពុជា។ ការស្នើនេះធ្វើឡើងក្នុងជំនួបរវាងថ្នាក់ដឹកនាំគណបក្សសង្គ្រោះជាតិ និងសភាសហភាពអឺរ៉ុប នៅរសៀលថ្ងៃទី២៦ ខែមីនា។
ប្រធាននាយកដ្ឋានកិច្ចការសាធារណៈគណបក្សសង្គ្រោះជាតិ អ្នកស្រី មូរ សុខហួរ មានប្រសាសន៍ថា លោក សម រង្ស៉ី និងលោក កឹម សុខា បានស្នើឲ្យភាគីសភាសហភាពអឺរ៉ុប ធ្វើជាអ្នកសម្របសម្រួលជំនួបរវាងភាគីបក្សប្រឆាំង និងបក្សកាន់អំណាច។ អ្នកស្រីបន្តថា ភាគីអន្តរជាតិចង់ស្វែងយល់ពីស្ថានភាពនៅកម្ពុជា ពិសេសគោលជំហររបស់គណបក្សសង្គ្រោះជាតិ និងមូលហេតុនៃទំនាស់នយោបាយ ជាដើម។ ប៉ុន្តែ គណបក្សសង្គ្រោះជាតិ ស្នើឲ្យអន្តរជាតិជំរុញឲ្យមានការបោះឆ្នោតដោយសេរី និងយុត្តិធម៌នៅកម្ពុជា ដោយជាដំបូងធ្វើយ៉ាងណាឲ្យស្ថាប័នរៀបចំការបោះឆ្នោត បំពេញតួនាទីឯករាជ្យ។
អ្នកស្រីបានបញ្ជាក់ថា ភាគីសហភាពអឺរ៉ុប ក៏បានសួរភាគីបក្សប្រឆាំងថា ព្រមចូលរដ្ឋសភា ឬអត់នោះដែរ។ តែមន្ត្រីបក្សសង្គ្រោះជាតិ ប្រាប់ថា បើមិនមានការបោះឆ្នោតដោយសេរី និងយុត្តិធម៌ទេ បក្សសង្គ្រោះជាតិ មិនចូលរដ្ឋសភាឡើយ។
គណៈប្រតិភូនៃសមាជិកសភាសហគមន៍អឺរ៉ុប ទទួលបន្ទុកទំនាក់ទំនងជាមួយបណ្ដាប្រទេសនៃតំបន់អាស៊ីអាគ្នេយ៍ និងសមាគមអាស៊ាន ដឹកនាំដោយ លោក វើណើ ឡានហ្គែន (Werner Langen) មកបំពេញទស្សនកិច្ចជាផ្លូវការនៅកម្ពុជា រយៈពេល ៣ថ្ងៃ គឺចាប់ពីថ្ងៃទី២៥ ដល់ថ្ងៃទី២៨ ខែមីនា។ ប្រតិភូអឺរ៉ុប នឹងសិក្សាលើការងារទំនាក់ទំនងរវាងសហគមន៍អឺរ៉ុប និងកម្ពុជា ដូចជា ការរៀបចំការបោះឆ្នោត សាលាក្តីខ្មែរក្រហម ដំណោះស្រាយដីធ្លី ជំរុញលទ្ធិប្រជាធិបតេយ្យ សេរីភាពបញ្ចេញមតិ និងបញ្ហាស្ករអំពៅ ជាដើម។ ប្រតិភូអឺរ៉ុប នឹងជួបជាមួយមន្ត្រីបក្សកាន់អំណាចជាច្រើនរូបទៀតផង រួមមាន អនុប្រធានរដ្ឋសភា អ្នកស្រី ឃួន សុដារី អ្នកតំណាងរាស្ត្រ លោក ឈាង វុន រដ្ឋមន្ត្រីក្រសួងមហាផ្ទៃ លោក ស ខេង ឧបនាយករដ្ឋមន្ត្រីលោក សុខ អាន ព្រមទាំងរដ្ឋមន្ត្រីក្រសួងការបរទេស លោក ហោ ណាំហុង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។