មន្ត្រីគណបក្សសង្គ្រោះជាតិ ខែត្រក្រចេះ គ្រោងដាក់ពាក្យប្ដឹងទៅគណៈកម្មការរៀបចំការបោះឆ្នោតខែត្រនេះ ពីភាពមិនប្រក្រតីមួយចំនួននៅអំឡុងពេលបោះឆ្នោតជ្រើសរើសក្រុមប្រឹក្សាឃុំ-សង្កាត់កាលពីថ្ងៃទី៤ មិថុនា។ ពាក្យបណ្ដឹងរបស់គណបក្សសង្គ្រោះជាតិ មានពីរករណី ដោយស្នើឲ្យ គ.ជ.ប ពិនិត្យប្រសិទ្ធភាពសន្លឹកឆ្នោតមិនបានការ និងករណីជំនួយការអាជ្ញាធរភូមិ ឃ្លាំមើលការបោះឆ្នោត។
មន្ត្រីគណបក្សសង្គ្រោះជាតិ នៅខែត្រក្រចេះ ចាត់ទុកការរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅខែត្រក្រចេះ មានភាពល្អប្រសើរច្រើនជាងអាណត្តិមុន ក៏ប៉ុន្តែបរិយាកាសមុនថ្ងៃបោះឆ្នោត មានស្ថានភាពមិនល្អមួយចំនួនរួមមាន ការចែកអំណោយ និងការប្រើឧបករណ៍បំពងសំឡេងឃោសនាបោះឆ្នោតនៅថ្ងៃហាមឃាត់។
អនុប្រធានគណបក្សសង្គ្រោះជាតិ ខែត្រក្រចេះ លោក អឿ គឹមហ៊ាន ឲ្យដឹងថា ក្រុមការងារលោកបានត្រៀមឯកសារពាក់ព័ន្ធនានាប្ដឹងជំនួយការអាជ្ញាធរភូមិម្នាក់មកពីគណបក្សប្រជាជនកម្ពុជា ដែលឃ្លាំមើលការបោះឆ្នោត ផ្ទុយពីគោលការណ៍ណែនាំរបស់ គ.ជ.ប និងករណីការិយាល័យមួយចំនួននៅស្រុកចិត្របុរី ខែត្រក្រចេះ មានសន្លឹកឆ្នោតមិនបានការច្រើន ហេតុនេះលោកទាមទារឲ្យ គ.ជ.ប ពិនិត្យសន្លឹកឆ្នោតឥតបានការទាំងនោះឡើងវិញ៖ «រហូតដល់ម៉ោងនេះ ឥឡូវយើងកំពុងរៀបចំបណ្ដឹងនៅក្នុងការិយាល័យមួយចំនួននៅខែត្រក្រចេះ ហ្នឹង ដែលមានលទ្ធផលបោះឆ្នោតមិនបានការច្រើន។ ចឹងយើងសុំប្ដឹងពិនិត្យសុពលភាពនៃសន្លឹកឆ្នោតឡើងវិញ » ។
នៅខែត្រក្រចេះ មានការិយាល័យបោះឆ្នោតចំនួន៥០១ មានឃុំ-សង្កាត់ចំនួន៤៧។ ខែត្រនេះមានពលរដ្ឋទៅបោះឆ្នោតចំនួនជាង ៨៩ភាគរយ (៨៩,៨៧%) ក្នុងចំណោមពលរដ្ឋជាង ១៧ម៉ឺននាក់ (១៧.១២០នាក់) មានឈ្មោះក្នុងបញ្ជីបោះឆ្នោត។
លេខាធិការរងនៃគណៈកម្មការរៀបចំការបោះឆ្នោតខែត្រក្រចេះ លោក តន់ តារា មានប្រសាសន៍ថា រហូតមកទល់ពេលនេះ គ.ជ.ប ពុំទាន់ទទួលពាក្យបណ្ដឹងពីតំណាងគណបក្សនយោបាយណាមួយនៅឡើយទេ ហើយ គ.ជ.ប នឹងដោះស្រាយបណ្ដឹងរបស់គណបក្សនយោបាយនានាឲ្យចប់សព្វគ្រប់ ទើបប្រកាសលទ្ធផលបោះឆ្នោតជាផ្លូវការ។ ដោយឡែកលទ្ធផលបឋម លោកជំរុញឲ្យអាស៊ីសេរី សួរទៅតំណាងគណបក្សនយោបាយវិញ៖ «យើងកំពុងតែធ្វើពុំទាន់ចេញជាលទ្ធផលទេ តែលោកអាចទាក់ទងទៅគណបក្សនយោបាយបាន»។
នាយកប្រតិបត្តិអង្គការនិកហ្វិច (NICFEC) លោក សំ គន្ធាមី យល់ថា ការរាប់សន្លឹកឆ្នោតអាស្រ័យលើតំណាងគណបក្សនយោបាយនានា ពិនិត្យមើលទាំងអស់គ្នាផ្អែកតាមគំរូសន្លឹកឆ្នោតរបស់ គ.ជ.ប បានកំណត់ ក៏ប៉ុន្តែបើតំណាងគណបក្សណាមិនយល់ស្រប អាចដាក់ពាក្យបណ្ដឹងបាន។ លោកបញ្ជាក់ថា ប្រសិនបើករណីនេះមានលក្ខណៈធ្ងន់ធ្ងរ គ.ជ.ប អាចសម្រេចបើកកញ្ចប់សន្លឹកឆ្នោតពិនិត្យសាជាថ្មីតាមនីតិវិធី។ ចំណែកករណីអាជ្ញាធរភូមិឈរក្នុងបរិវេណបោះឆ្នោត បើទោះបីជាខុសនីតិវិធីក្តី គឺមិនប៉ះពាល់ដល់ដំណើរការបោះឆ្នោតនោះទេ៖ «គេមានគំរូសន្លឹកឆ្នោតតើ ! សន្លឹកឆ្នោតណាអត់បានការ បើសិនជាខុសគំរូ គ . ជ . ប ហ្នឹង គេអាចប្ដឹងបាន ។ បើសិនជាករណីធ្ងន់ធ្ងរច្រើនអី គេអាចសម្រេចបើកកញ្ចប់ពិនិត្យមើលសន្លឹកឆ្នោតអត់បានការហ្នឹង » ។
លទ្ធផលបឋមការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ របស់គណបក្សសង្គ្រោះជាតិ នៅខែត្រក្រចេះ បង្ហាញថា ខែត្រនេះមានឃុំ-សង្កាត់ចំនួន៤៧ ក្នុងនោះគណបក្សប្រជាជនកម្ពុជា ឈ្នះ ៣៨ឃុំ-សង្កាត់ និងគណបក្សសង្គ្រោះជាតិ ឈ្នះ ៩ឃុំ-សង្កាត់។
ខែត្រនេះមានគណបក្សនយោបាយចំនួន៨ ឈរឈ្មោះបេក្ខជនក្រុមប្រឹក្សាឃុំ-សង្កាត់ រួមមាន៖
គណបក្សប្រជាជនកម្ពុជា
គណបក្សសង្គ្រោះជាតិ
គណបក្សសម្ព័ន្ធដើម្បីប្រជាធិបតេយ្យ
គណបក្សហ៊្វុនស៊ិនប៉ិច
គណបក្សខ្មែររួបរួមជាតិ
គណបក្សសំបុកឃ្មុំសង្គមប្រជាធិបតេយ្យ
គណបក្សជនជាតិដើមដើម្បីប្រជាធិបតេយ្យ
និងគណបក្សសញ្ជាតិកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។