សមាជិកក្រុមប្រឹក្សាឃុំមួយរបស់គណបក្សសង្គ្រោះជាតិ នៅស្រុកមង្គលបូរី ខេត្តបន្ទាយមានជ័យ បន្តខ្វល់ខ្វាយបញ្ហាគ្មានសាលាឃុំសម្រាប់បំពេញការងារជូនពលរដ្ឋ ខណៈសាលាឃុំចាស់ដែលមេឃុំគណបក្សប្រជាជនកម្ពុជា បានខ្ចីពីប៉ូលិសបានផុតអាណត្តិទៅហើយ។ អភិបាលស្រុកមង្គលបូរី អះអាងថា អាជ្ញាធរស្រុកបានដាក់សំណើទៅក្រសួងមហាផ្ទៃ ដើម្បីសុំថវិកាសាងសង់សាលាឃុំថ្មីហើយ តែខាងក្រសួងមិនទាន់សម្រេចថាយ៉ាងណានៅឡើយ។
សមាជិកក្រុមប្រឹក្សាឃុំមកពីគណបក្សសង្គ្រោះជាតិ នៅស្រុកមង្គលបូរី លើកឡើងថា ពួកគាត់ហាក់មានអារម្មណ៍មិននឹងនក្នុងការបំពេញការងារជូនពលរដ្ឋនោះទេ ដ្បិតអីសាលាឃុំដែលធ្វើការងារសព្វថ្ងៃនឹងផុតកំណត់ខ្ចីពីប៉ូលិសនៅជាងមួយសប្ដាហ៍ទៀត។
មេឃុំភ្នំតូច ស្រុកមង្គលបូរី មកពីគណបក្សសង្គ្រោះជាតិ លោក ហេង ឡៃហួ ផ្ដល់សម្ភាសន៍ខណៈបំពេញការងារក្នុងសាលាឃុំថា សាលាឃុំដែលលោកធ្វើការរាល់ថ្ងៃ ជារបស់ប៉ុស្តិ៍នគរបាលរដ្ឋបាលឃុំភ្នំតូច ដោយឲ្យលោកខ្ចីរយៈពេល ២សប្ដាហ៍ គិតចាប់ពីថ្ងៃទី៧ ខែកក្កដា មក។ លោកនឹងក្រុមប្រឹក្សាឃុំរបស់គណបក្សប្រឆាំងដែលទើបជាប់ឆ្នោតចំនួន ៥នាក់ ខ្លាចរកកន្លែងបំពេញការងារជូនពលរដ្ឋមិនបាន៖ «ខ្ញុំខ្វល់ខ្វាយត្រង់ថា យើងមិនទាន់មានទីកន្លែងពិតប្រាកដមួយ ទីកន្លែងឃុំសព្វថ្ងៃតូចចង្អៀត មួយទៀតការបម្រើសេវាកម្មជូនពលរដ្ឋមានការយឺតយ៉ាវខ្លះ ប្រសិនបើប្ដូរសាលាឃុំទៅកន្លែងថ្មី ហើយពលរដ្ឋមួយចំនួននឹងមិនស្គាល់សាលាឃុំថ្មីទេ»។
អ្នកយកព័ត៌មានអាស៊ីសេរី កាលពីថ្ងៃទី១៣ ខែកក្កដា បានទៅដល់ប៉ុស្តិ៍នគរបាលរដ្ឋបាលឃុំភ្នំតូច ដើម្បីសុំការពន្យល់ពីលោកនាយប៉ុស្តិ៍នគរបាលជុំវិញបញ្ហានេះដែរ តែមិនជួប ដោយមន្ត្រីប៉ូលិសម្នាក់ប្រាប់ថា លោកមិននៅ ហើយអ្នកយកព័ត៌មានបានរង់ចាំអស់ជាង ២ម៉ោង តែមិនឃើញលោកត្រឡប់វិញ។
ចំណែកពលរដ្ឋនៅឃុំភ្នំតូច លោក ស៊ុន សំអាន ថ្លែងថា ប្រសិនបើពុំមានសាលាឃុំច្បាស់លាស់សម្រាប់ឲ្យមេឃុំធ្វើការទេ ពួកគាត់នឹងជួបការលំបាកក្នុងការធ្វើលិខិតស្នាម ព្រោះត្រូវចំណាយពេលដើររកសាលាឃុំ៖ «ខ្ញុំមិនសប្បាយចិត្តទេ ដែលជាយូរណាស់ហើយរកសាលាឃុំធ្វើការមិនបាន គឺកូនចៅខ្ញុំនិងខ្ញុំតឹងចិត្តតឹងថ្លើមខ្លាំងណាស់ ព្រោះពិបាកដើររកសាលា ដើម្បីធ្វើលិខិតស្នាម»។
អភិបាលស្រុកមង្គលបូរី លោក ឡុង ពុន មានប្រសាសន៍ថា ខាងស្រុកបានបញ្ជូនសំណើទៅក្រសួងមហាផ្ទៃ សុំថវិកាសាងសង់សាលាឃុំថ្មីហើយ តែខាងក្រសួងមិនទាន់ឆ្លើយតបថា យ៉ាងណានៅឡើយ៖ «ខ្ញុំគិតថា គេពីមុនមកគេធ្វើយ៉ាងមិចបានយើងធ្វើអ៊ីចឹងសិន ដោយរង់ចាំក្រសួងមហាផ្ទៃ គាត់បានជាលទ្ធផលយ៉ាងណាគាត់នឹងទម្លាក់ថវិកាមកឲ្យសង់សាលាឃុំហើយ»។
ក្រុមប្រឹក្សាឃុំភ្នំតូច គណបក្សប្រឆាំងអះអាងថា ពួកគាត់កំពុងរកជួលផ្ទះរបស់ពលរដ្ឋក្នុងតម្លៃជាង ១០០ដុល្លារអាមេរិកក្នុង ១ខែ ដើម្បីធ្វើការបណ្ដោះអាសន្ន ដោយកាត់ប្រាក់ខែផ្ទាល់ខ្លួនរបស់ពួកគាត់ទម្រាំរកដីសង់សាលាឃុំថ្មីបាន។
អាស៊ីសេរី មិនទាន់អាចសុំការឆ្លើយតបពីអ្នកនាំពាក្យក្រសួងមហាផ្ទៃ លោក ខៀវ សុភ័គ ជុំវិញបញ្ហានេះបាននៅឡើយ។
ពលរដ្ឋនៅឃុំភ្នំតូច ម្នាក់ លោក ស៊ុន សារឿន មានចម្ងល់ថា ហេតុអ្វីបានជាអាជ្ញាធរមិនសង់សាលាឃុំឲ្យបានស្អាតដូចមណ្ឌលសុខភាព និងប៉ុស្តិ៍នគរបាលរដ្ឋបាលឃុំ ដើម្បីបម្រើសេវាសាធារណៈជូនពលរដ្ឋបានងាយស្រួល៖ «វាប៉ះពាល់ដល់ប្រជាពលរដ្ឋខ្លាំងតែមែនទែន ព្រោះអីគ្មានសាលាឃុំ ហើយឥឡូវប៉ូលិសគេឲ្យមេឃុំថ្មី រកដីសង់សាលាឃុំថ្មី មិនថាដឹងថាដោះស្រាយយ៉ាងណា ព្រោះខ្ញុំប្រជាពលរដ្ឋមិនមានសិទ្ធិអីនឹងដោះស្រាយបានទេ មានតែអំពាវនាវដល់រដ្ឋាភិបាលឲ្យជួយធ្វើសាលាឃុំថ្មី»។
បច្ចុប្បន្នសាលាឃុំភ្នំតូច ដែលប៉ូលិសឲ្យខ្ចីនោះធ្វើពីឈើរខេករខាក ហើយនៅពេលមានខ្យល់បក់ខ្លាំង និងមានភ្លៀងធំម្ដងៗ អគារយោគចុះយោគឡើងស្ទើរតែរលំធ្វើឲ្យក្រុមប្រឹក្សាឃុំមួយចំនួនរត់ទៅជ្រកទឹកភ្លៀងនៅមណ្ឌលសុខភាពក្បែរនោះ។
នាយកប្រតិបត្តិសម្ពន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា អគារសាលាឃុំមានសារសំខាន់ក្នុងការធ្វើលិខិតស្នាមជូនប្រជាពលរដ្ឋនៅក្នុងមូលដ្ឋាន ដែលក្រសួងមហាផ្ទៃ ត្រូវស្វែងរកថវិកាសង់សាលាឃុំឲ្យបានស្អាត និងមានទីកន្លែងរបស់ខ្លួនពិតប្រាកដ៖ «សេវាមួយដែលផ្ដល់ទៅល្អបាន លុះត្រាតែមានកន្លែងធ្វើការគ្រប់គ្រាន់ និងមធ្យោបាយសម្រាប់ផ្ដល់សេវាគ្រប់គ្រាន់ ព្រោះរាល់សេវាទាំងអស់ត្រូវទុកដាក់ឯកសារ ហើយបើគ្មានសាលាឃុំតើយកឯកសារទៅរក្សាទុកនៅកន្លែងណា? ហើយត្រូវភ្លៀងត្រូវខ្យល់វានឹងខូចអស់ធ្វើឲ្យប៉ះពាល់ដល់ការងារនឹងធ្ងន់ធ្ងរមែនទែន»។
ចាប់ពីក្រសួងមហាផ្ទៃ ប្រកាសតែងតាំងមេឃុំថ្មីមក មានមេឃុំគណបក្សសង្គ្រោះជាតិ ជាច្រើនកន្លែង ដូចជានៅខេត្តកំពត កំពង់ធំ និងខេត្តបន្ទាយមានជ័យ ជាដើម គ្មានកន្លែងធ្វើការ ហើយនៅឃុំខ្លះត្រូវជួលផ្ទះប្រជាពលរដ្ឋធ្វើការបណ្ដោះអាសន្ន។ លោក សន ជ័យ មើលឃើញថា តាមពិតសាលាឃុំជាច្រើនកន្លែងខ្វះខាតអគារធ្វើការជាយូរយារណាស់មកហើយ តែដោយសារមេឃុំពីមុនភាគច្រើនរបស់គណបក្សប្រជាជនកម្ពុជា ធ្វើឲ្យពួកគាត់មិនហ៊ានបញ្ចេញប្រតិកម្ម ដោយខ្លាចប៉ះពាល់ប្រជាប្រិយភាពរបស់គណបក្ស។
នៅឃុំភ្នំតូច មានក្រុមប្រឹក្សាឃុំដែលជាប់ឆ្នោតថ្មីចំនួន ៩នាក់ គឺគណបក្សសង្គ្រោះជាតិ ៥នាក់ និងគណបក្សប្រជាជនកម្ពុជា ៤នាក់។ ក្រុមប្រឹក្សាឃុំគណបក្សប្រឆាំងអះអាងថា ចាប់ពីប្រកាសតែងតាំងចូលកាន់តំណែង កាលពីថ្ងៃទី៦ ខែកក្កដា មក ក្រុមប្រឹក្សាឃុំគណបក្សប្រជាជនកម្ពុជា បានសុំច្បាប់ឈប់សម្រាកមិនទាន់ចូលមកធ្វើការនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។