អ្នកនាំពាក្យរដ្ឋសភា លោក ឡេង ប៉េងឡុង ឲ្យដឹងថា លោកបានទទួលរបៀបវារៈពីភាគីគណបក្សសង្គ្រោះជាតិហើយ ទាក់ទងរឿងការជួបចរចាជាមួយគណបក្សប្រជាជនកម្ពុជា នៅថ្ងៃទី១១ ខែមិថុនា នេះ ដែលនិយាយពីសភាពការណ៍នយោបាយកំពុងកើតឡើង។ ទាក់ទងប្រធានបទនេះដែរ អ្នកនាំពាក្យគណបក្សប្រជាជនកម្ពុជា លោក សុខ ឥសាន ថា របៀបវារៈនេះ គណបក្សប្រជាជនកម្ពុជា អាចជួបចរចាជាមួយគណបក្សសង្គ្រោះជាតិ បាន ព្រោះប្រធានបទនេះទាក់ទងនឹងវប្បធម៌សន្ទនា។
សភាពការណ៍នយោបាយដែលគណបក្សសង្គ្រោះជាតិ នឹងលើកយកទៅជជែកជាមួយគណបក្សប្រជាជនកម្ពុជា រួមមាន ការគាបសង្កត់របស់ស្ថាប័នរដ្ឋលើគណបក្សប្រឆាំង សង្គមស៊ីវិល ស្ថាប័នបោះឆ្នោត និងការវិលត្រឡប់ចូលស្រុករបស់លោក សម រង្ស៊ី មុនការបោះឆ្នោតដោយគ្មានទោស។ នេះជាការអះអាងរបស់អ្នកនាំពាក្យគណបក្សសង្គ្រោះជាតិ លោក យឹម សុវណ្ណ។
លោក យឹម សុវណ្ណ ថ្លែងប្រាប់អ្នកគាំទ្ររបស់ខ្លួននៅទីស្នាក់កណ្ដាលនៃគណបក្សនេះ នៅព្រឹកថ្ងៃទី១១ ខែមិថុនា ថា ប្រធានក្រុមពង្រឹងវប្បធម៌សន្ទនាគណបក្សសង្គ្រោះជាតិ លោក ប៉ុល ហំម នឹងទូរស័ព្ទទៅភាគីគណបក្សប្រជាជនកម្ពុជា ដើម្បីរៀបចំឲ្យមានការជួបប្រជុំ។ លោកបន្តថា អ្វីដែលគណបក្សសង្គ្រោះជាតិ ត្រៀមខ្លួនដោះស្រាយបញ្ហានៅពេលនេះ គឺស៊ីសង្វាក់គ្នាទៅនឹងការចង់បានរបស់ពលរដ្ឋ និងសហគមន៍អន្តរជាតិ៖ « គណបក្សសង្គ្រោះជាតិ ត្រូវដោះស្រាយបញ្ហាឆ្លើយតបទៅរបស់អង្គការសហប្រជាជាតិ ដែលមានលោក បាន គីមូន អគ្គលេខា យើងត្រៀមជានិច្ចដើម្បីស្រាយបញ្ហា»។
ទាក់ទងរឿងនេះ ប្រធានក្រុមពង្រឹងវប្បធម៌សន្ទនាគណបក្សសង្គ្រោះជាតិ លោក ប៉ុល ហំម ឲ្យដឹងថា លោកមិនបានទូរស័ព្ទជជែកផ្ទាល់ជាមួយភាគីគណបក្សប្រជាជនកម្ពុជាទេ ប៉ុន្តែបានធ្វើឡើងតាមរយៈអគ្គលេខាធិការរងរដ្ឋសភាភាគីគណបក្សសង្គ្រោះជាតិ និងអគ្គលេខាធិការរដ្ឋសភា ភាគីគណបក្សប្រជាជនកម្ពុជា។
ការវិវឌ្ឍន៍ចុងក្រោយនៃការជួបគ្នា អ្នកនាំពាក្យរដ្ឋសភា លោក ឡេង ប៉េងឡុង ឲ្យដឹងថា អគ្គលេខាធិការរងនៃរដ្ឋសភា មកពីកូតាគណបក្សសង្គ្រោះជាតិ ហ៊ុល ប៊ុនថា បានទូរស័ព្ទមកលោកនៅថ្ងៃទី១១ ខែមិថុនា ថា គណបក្សសង្គ្រោះជាតិ លើកយកប្រធានបទពីសភាពការណ៍នយោបាយដែលកំពុងកើតឡើងទៅជជែកជាមួយគណបក្សប្រជាជនកម្ពុជា។
អ្នកនាំពាក្យរដ្ឋសភាដដែលថា ដោយសារលោកកំពុងនៅខេត្ត ហើយជាថ្ងៃចុងសប្ដាហ៍ផងនោះ លោកមិនទាន់បានជម្រាបដំណឹងនេះទៅភាគីគណបក្សប្រជាជនកម្ពុជាទេ ដោយលោកនឹងផ្ដល់ដំណឹងនេះនៅសប្ដាហ៍ក្រោយ គឺនៅថ្ងៃច័ន្ទ ទី១៣ ខែមិថុនា៖ «គាត់ ( លោក ហ៊ុល ប៊ុនថា ) និយាយទាក់ទងសភាពការណ៍នយោបាយ។ គាត់ស្នើដែរ ប៉ុន្តែខ្ញុំជាប់រវល់នៅខេត្ត » ។
ដោយឡែកអ្នកវិភាគនយោបាយ លោក កែម ឡី យល់ថា ការជួបគ្នាលើកនេះ ត្រូវមានអាជ្ញាកណ្ដាលដែលជាព្រះមហាក្សត្រ ឬសម្ដេចព្រះសង្ឃដើម្បីឃ្លាំមើល ឬសម្របសម្រួល ត្រូវមានអ្នកសង្កេតការណ៍ និងត្រូវផ្សាយផ្ទាល់ឲ្យសាធារណជនបានដឹង ជៀសវាង ឬកាត់បន្ថយការសន្យាដែលសរសេរនៅដៃ ប៉ុន្តែត្រូវអ្នកនយោបាយយកជើងលុបចោល។ លោក កែម ឡី យល់ថា ការចរចាទាមទារឲ្យមានការដោះលែងជាករណីមួយៗ មិនមែនជាដំណោះស្រាយល្អទេ អ្វីដែលសំខាន់ត្រូវពង្រឹងឲ្យតុលាការឲ្យក្លាយជាតុលាការឯករាជ្យ៖ « បើស្នើហើយគេចាប់ឡើងវិញដដែលទេ ចឹងគឺការកែប្រែមូលដ្ឋាន កែប្រែប្រព័ន្ធតុលាការ ការធ្វើឲ្យមានតុល្យភាពអំណាចសភាទើបជារឿងសំខាន់»។
មន្ត្រីគណបក្សសង្គ្រោះជាតិ ប្រកាសថា គម្រោងជួបគ្នានេះ គឺជួបត្រឹមតែក្រុមពង្រឹងវប្បធម៌សន្ទនា។
កាលពីសប្ដាហ៍មុនប្រធានក្រុមពង្រឹងវប្បធម៌សន្ទនា លោក ប៉ុល ហំម ប្រកាសថា ភាគីគណបក្សសង្គ្រោះជាតិ ក្រៅពីរូបលោក មានលោក ហូរ វ៉ាន់ លោក ម៉ៅ មុនីវណ្ណ និងលោក អ៊ូ ច័ន្ទឫទ្ធិ។ ចំណែកអ្នកនាំពាក្យគណបក្សប្រជាជនកម្ពុជា លោក សុខ ឥសាន ឲ្យដឹងដែរថា ប្រសិនបើជំនួបត្រឹមក្រុមពង្រឹងវប្បធម៌សន្ទនា ភាគីគណបក្សប្រជាជនកម្ពុជា មានសមាសភាពម្ខាង ៥រូប ដឹកនាំដោយលោក ព្រុំ សុខា រដ្ឋលេខាធិការក្រសួងមហាផ្ទៃ និងមន្ត្រីជាន់ខ្ពស់ក្រសួងមហាផ្ទៃ និងក្រសួងយុត្តិធម៌។
លោក សុខ ឥសាន ប្រាប់ទៅគណបក្សសង្គ្រោះជាតិថា បើមានជំនួបមែន ការជជែកគ្នានោះមិនអាចធ្វើឲ្យអ្នកជាប់ទោសបានរួចផុតការចោទប្រកាន់ទេ។ ចំណែកការចូលស្រុករបស់លោក សម រង្ស៊ី ដោយគ្មានទោសក៏មិនអាចធ្វើទៅរួចបានដែរ៖ « ចូលមកដើម្បីទទួលខុសត្រូវចំពោះមុខច្បាប់មក មិនមែនចូលមករួចខ្លួនទេ។ បើចឹងនឹងមានវប្បធម៌និទ្ទណ្ឌភាព។ ចំណែកឯកឧត្តម កឹម សុខា ត្រូវចេញមុខមកពន្យល់រឿងអាស្រូវផ្លូវភេទរបស់គាត់ឲ្យបានច្បាស់ » ។
គិតមកទល់ពេលនេះ មន្ត្រី និងសកម្មជនគណបក្សសង្គ្រោះចំនួន ១៩នាក់ កំពុងជាប់ឃុំ ក្រៅពីនេះ មន្ត្រីសង្គមស៊ីវិលនៃសមាគមអាដហុក (ADHOC) ៤នាក់ អគ្គលេខាធិការរង គ.ជ.ប ម្នាក់ និងយុវជនមួយចំនួនទៀត ក៏កំពុងជាប់ឃុំដែរ។ ស្ថាប័នអន្តរជាតិកំពូលៗ រួមមានអង្គការសហប្រជាជាតិ សភាអឺរ៉ុប និងស្ថាប័នផ្សេងៗទៀត ស្នើឲ្យរដ្ឋាភិបាលទម្លាក់ចោលការចោទប្រកាន់អ្នកទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។