ប្រតិកម្មរបស់មន្ត្រីបក្សសង្គ្រោះជាតិ នៅពេលនេះ ធ្វើឡើងមួយថ្ងៃបន្ទាប់ពីលោក ហ៊ុន សែន ជំរុញអ្នកបំផ្លាញស្លាកគណបក្សប្រឆាំងកន្លងមក ត្រូវចូលខ្លួនសារភាព ដោយលោកបានសន្យាថានឹងលើកទោស ហើយថែមទាំងផ្ដល់រង្វាន់ពិសេស ដើម្បីលើកទឹកចិត្តបន្ថែមទៀត។
អ្នកនាំពាក្យគណបក្សសង្គ្រោះជាតិ ហៅសារនយោបាយរបស់លោកនាយករដ្ឋមន្ត្រី ហ៊ុន សែន និងជាអនុប្រធានគណបក្សប្រជាជនកម្ពុជា កាលពីថ្ងៃទី២៤ មិថុនា នៅខេត្តកំពង់ចាម ថាគឺជាការបង្កើតភាពអាប់អួបន្ថែមទៀតទៅវិញទេ នៅមុនយុទ្ធនាការឃោសនារកសំឡេងឆ្នោតនឹងត្រូវចាប់ផ្ដើមនាពេលខាងមុខនេះ។
លោក យឹម សុវណ្ណ អះអាងថា អ្វីដែលលោកនាយករដ្ឋមន្ត្រី ហ៊ុន សែន អំពាវនាវ និងជំរុញឲ្យមានការស៊ើបអង្កេត នឹងមិនមានន័យអ្វីនោះទេ។ លោកបន្តថា តែផ្ទុយទៅវិញ បញ្ហានេះនឹងជះឥទ្ធិពលមិនល្អថែមទៀតសម្រាប់យុទ្ធនាការបោះឆ្នោតដែលនឹងមកដល់ក្នុងសប្ដាហ៍នេះ។ លោកគិតថា មានរឿងរ៉ាវជាច្រើនករណីទៀតដែលរដ្ឋាភិបាលរបស់លោក ហ៊ុន សែន នៅមិនទាន់បានផ្ដល់យុត្តិធម៌នៅឡើយ ហើយច្រើនតែយកឃាតកសិប្បនិម្មិត ឬអ្នកពាក់ព័ន្ធដែលបានរៀបចំទុកជាមុនមកសម្ដែងជាសាធារណៈ។
លោក យឹម សុវណ្ណ៖ «ធ្លាប់ឃើញបទពិសោធន៍កន្លងមកហ្នឹង ឧទាហរណ៍ដូចនៅឆ្នាំ១៩៩៧ ហ្នឹង មានការគប់គ្រប់បែកទៅលើហ្វូងបាតុករ រួចបែរជាឆ្លើយថាមិនទាន់ទាំងធ្វើការស៊ើបអង្កេតផង ឆ្លើយថាឯកឧត្ដមប្រធាន សម រង្ស៊ី ហ្នឹងគប់ខ្លួនឯង។ រឿងហ្នឹងវាកើតឡើងដដែលៗទេ ទៅបង្កឡើងដោយគ្រាន់តែវាមានការភាន់ច្រឡំ ធ្វើឲ្យមានការអាប់អួទៅដល់បរិយាកាសនៃការបោះឆ្នោតទេ»។
ទោះជាយ៉ាងណាក៏ដោយ លោកនាយករដ្ឋមន្ត្រី ហ៊ុន សែន បញ្ជាក់ពីជំហរ និងគោលនយោបាយរដ្ឋាភិបាលរបស់លោកកាលពីថ្ងៃទី២៤ មិថុនា ថានឹងមិនលើកលែងទោសឡើយ ទោះត្រូវប្រើពេលស៊ើបអង្កេតយូរឆ្នាំចំពោះអ្នកពាក់ព័ន្ធទាំងក្នុងគណបក្សប្រជាជនកម្ពុជា ឬបក្សដទៃដែលជាប់សង្ស័យពីបទបំផ្លាញស្លាករបស់បក្សប្រឆាំងនេះក៏ដោយ។ ក៏ប៉ុន្តែ លោក ហ៊ុន សែន អះអាងថា មន្ត្រីគណបក្សប្រជាជនកម្ពុជា នៅថ្នាក់ក្រោមជាតិនឹងមិនប្រព្រឹត្តទង្វើបែបនេះឡើយ។
យ៉ាងណាក៏ដោយ លោក យឹម សុវណ្ណ ចាត់ទុកថា ក្រសួងមហាផ្ទៃ គួរចាត់វិធានការប្រឆាំងនឹងភាពមិនប្រក្រតីនេះមុនពេលប្រតិកម្មរបស់លោក ហ៊ុន សែន កើតឡើង។ លោកគិតថា ការអំពាវនាវរបស់លោកនាយករដ្ឋមន្ត្រីនេះ វានឹងប៉ះពាល់ និងមានឥទ្ធិពលដល់ការស៊ើបអង្កេតដោយឯករាជ្យរបស់មន្ត្រីជំនាញ។
កាលពីថ្ងៃទី២១ មិថុនា គណៈបញ្ជាការសន្តិសុខអចិន្ត្រៃយ៍នៃក្រសួងមហាផ្ទៃ បានចេញសេចក្ដីណែនាំចំនួន ៩ចំណុចសំខាន់ៗ ដើម្បីជំរុញឲ្យអាជ្ញាធរគ្រប់លំដាប់ថ្នាក់យកចិត្តទុកដាក់បញ្ជាដឹកនាំ និងចាត់តាំងកម្លាំងរក្សាសន្តិសុខក្នុងថ្ងៃយុទ្ធនាការឃោសនា និងថ្ងៃបោះឆ្នោត។ បន្ថែមលើនេះ ក្រសួងមហាផ្ទៃ ចាត់ទុកថា ឧបទ្ទវហេតុនានា ដូចជាគំរាមកំហែង បំភិតបំភ័យ និងការទម្លាក់ស្លាកគណបក្សនៅតាមមូលដ្ឋាន គឺត្រូវទទួលខុសត្រូវមុខច្បាប់ដាច់ខាត។
លោក ហង្ស ពុទ្ធា នាយកអង្គការ និចហ្វិក (Nicfec) ចាត់ទុកសារនយោបាយដ៏កម្ររបស់លោកនាយករដ្ឋមន្ត្រី ហ៊ុន សែន នេះថា ជាផ្នែកមួយនៃការទទួលខុសត្រូវ និងជាការផ្សះផ្សាផ្នែកនយោបាយក្នុងន័យដើម្បីបន្ធូរបន្ថយភាពតានតឹងដែលពុំធ្លាប់មាន៖ «ជំហានទីមួយ យើងឃើញថា រវាងគណបក្សទាំងពីរពុំដែលបាននិយាយអំពីចំណុចល្អរវាងគ្នា និងគ្នាទេ។ ហើយការដែលខូចខាតរបស់ភាគីម្ខាងៗ វាទៅជារឿងដែលបំពេញសេចក្ដីពេញចិត្តរបស់ខ្លួនទៅវិញ។ ប៉ុន្តែលើកនេះបានបង្ហាញថា សកម្មភាពបំផ្លាញស្លាកហ្នឹង គណបក្សកាន់អំណាច ឬក៏ប្រមុខដឹកនាំរដ្ឋាភិបាលមិនសប្បាយចិត្តទិដ្ឋភាពបែបនេះដែរ»។
មន្ត្រីគណបក្សសង្គ្រោះជាតិ បញ្ជាក់ថា គិតត្រឹមថ្ងៃទី២៣ មិថុនា ស្លាកគណបក្សប្រឆាំងមួយនេះមានចំនួន ១០៣ស្លាក នៅទូទាំងប្រទេស ត្រូវគេរំខាន និងបំផ្លាញចោល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។