បក្ស​ទាំង​ពីរ​ផ្ញើ​លិខិត​ដាក់​របៀបវារៈ​នៃ​ការ​ចរចា​គ្នា

0:00 / 0:00

គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ បាន​ផ្ញើ​លិខិត​ឆ្លើយឆ្លង​កំណត់​ពី​របៀបវារៈ នៃ​ការ​ចរចា ដែល​លិខិត​នេះ​ធ្វើ​ឡើង​តាម​រយៈ​រដ្ឋ​សភា ជជែក​អំពី​តួនាទី ការងារ និង​សិទ្ធិ​អំណាច​របស់​ប្រធាន​ក្រុម​ភាគ​តិច ប្រធាន​ក្រុម​ភាគ​ច្រើន​នៅ​ក្នុង​សភា និង​សភាពការណ៍​មុន​ការ​បោះ​ឆ្នោត។ អ្នក​វិភាគ​យល់​ថា របៀបវារៈ​ដែល​គណបក្ស​ទាំង​ពីរ​លើក​ឡើង នឹង​អាច​ធ្វើ​ឲ្យ​គណបក្ស​ជួប​ចរចា​គ្នា​នៅ​ពេល​ខាង​មុខ។

ការ​ឆ្លើយឆ្លង​គ្នា​របស់​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ តាម​រយៈ​លិខិត​នេះ ធ្វើ​ឡើង​ពីរ​ថ្ងៃ​ជាប់​គ្នា ចាប់​តាំង​ពី​ថ្ងៃ​សុក្រ ទី​១៣ និង​ថ្ងៃ​សៅរ៍ ទី​១៤ ខែ​មករា។ អ្នកនាំពាក្យ​រដ្ឋ​សភា លោក ឡេង ប៉េងឡុង ថ្លែង​ថា គណបក្ស​ទាំង​ពីរ​ឆ្លើយឆ្លង​លិខិត​គ្នា​ទៅ​វិញ​ទៅ​មក។ លិខិត​របស់​គណបក្ស​ប្រជាជន​កម្ពុជា ដែល​ចុះ​ហត្ថលេខា​ដោយ​លោក ស ខេង កំណត់​របៀបវារៈ​នៃ​ការ​ចរចា និយាយ​ពី​តួនាទី ការងារ និង​សិទ្ធិ​អំណាច​របស់​ប្រធាន​ក្រុម​ភាគតិច និង​ប្រធាន​ក្រុម​ភាគ​ច្រើន​នៅ​ក្នុង​សភា។

ចំណែក​លិខិត​របស់​គណបក្ស​សង្គ្រោះ​ជាតិ ដែល​ចុះ​ហត្ថលេខា​ដោយ​លោក កឹម សុខា ស្នើ​ការ​ចរចា​និយាយ​បន្ថែម​ពីរ​ចំណុច​ទៀត គឺ​ធ្វើ​វិសោធនកម្ម​ច្បាប់​បោះឆ្នោត​តំណាងរាស្ត្រ​ដើម្បី​ឲ្យ​ពលរដ្ឋ​ខ្មែរ​នៅ​ក្រៅ​ប្រទេស​អាច​បោះឆ្នោត​បាន និង​ចំណុច​មួយ​ទៀត ស្នើ​ជជែក​ទាក់ទង​សភាពការណ៍​មុន​ការ​បោះ​ឆ្នោត៖ « សំបុត្រ​ឆ្លើយឆ្លង​គ្នា​ភ្លាមៗ សម្ដេច ស ខេង គាត់​ទទួល​សំបុត្រ​ពី​គណបក្ស​សង្គ្រោះ​ជាតិ គាត់​ឆ្លើយ​មក​វិញ ពេល​សម្ដេច​ឆ្លើយ ខាង​គណបក្ស​សង្គ្រោះ​ជាតិ ឆ្លើយ​ទៅ​ទៀត ឃើញ​មាន​ឯកភាព​គ្នា​ខ្លះ​ហើយ។ ចឹង​ហើយ​ខ្ញុំ​គិត​ថា អាទិត្យ​ក្រោយ​អាច​បាន​ជួប​គ្នា »

លោក​បញ្ជាក់​ថា គណបក្ស​សង្គ្រោះ​ជាតិ ស្នើ​ឲ្យ​មាន​ការ​ចរចា​គ្នា​ធ្វើ​ឡើង​ក្នុង​អំឡុង​ខែ​មករា នេះ។

ចំណែក​ប្រធាន​អង្គការ​វេទិកា​អនាគត និង​ជា​អ្នក​វិភាគ​នយោបាយ លោក អ៊ូ វីរៈ យល់​ថា របៀបវារៈ​ដែល​គណបក្ស​ទាំង​២ បាន​ឆ្លើយឆ្លង​គ្នា ជា​សំណើ​សមរម្យ​ដែល​ធ្វើ​ឲ្យ​គណបក្ស​អាច​ជួប​គ្នា​បាន។ ជាង​នេះ​ទៅ​ទៀត លោក​យល់​ថា គណបក្ស​ទាំង​ពីរ​ក្រៅ​ពី​មាន​កំណត់​របៀបវារៈ​ត្រូវ​មាន​សេចក្ដី​ព្រាង​ជាក់លាក់​នៃ​របៀបវារៈ​នោះ មិន​មែន​គ្រាន់​តែ​លើក​ប្រធានបទ​ដើម្បី​ឲ្យ​បាន​ជជែក​នោះ​ទេ « តាម​ពិត ចឹង​គេ​ត្រូវ​សរសេរ​ជា​គោល​នយោបាយ មុន​នឹង​ស្នើ​ពេល​លើក​ប្រធានបទ​ហ្នឹង ខ្លួន​ឯង​គួរ​តែ​ត្រៀម​ឯកសារ​ស្នើ​ហ្នឹង​ឲ្យ​ច្បាស់លាស់ ព្រោះ​ខ្ញុំ​មើល​ស្នើ​តាម​ការ​នឹក​ឃើញ មិន​មាន​អី​ច្បាស់លាស់​ផង ចឹង​ទេ​ធ្វើ​ខាត​ពេល»

​កាល​ពី​ដើម​ខែ​ធ្នូ ឆ្នាំ​២០១៦ លោក ស ខេង អនុ​ប្រធាន​គណបក្ស​ប្រជាជន​កម្ពុជា និង​ជា​រដ្ឋមន្ត្រី​ក្រសួង​មហាផ្ទៃ សន្យា​ថា នឹង​មាន​ការ​ចរចា​ដោះលែង​មន្ត្រី​អាដហុក (ADHOC) និង​មន្ត្រី គ.ជ.ប ប៉ុន្តែ​ជំនួប​នោះ​ត្រូវ​ខកខាន។

​ទាក់ទង​របៀបវារៈ​នៃ​ការ​ចរចា​នេះ លោក ឡេង ប៉េងឡុង ថា គណបក្ស​ទាំង​ពីរ​មិន​ទាន់​និយាយ​ពី​រឿង​ចរចា​ដោះលែង​មន្ត្រី​សិទ្ធិមនុស្ស​អាដហុក ៤​រូប និង​អគ្គលេខាធិការ​រង គ.ជ.ប ទេ។

អាស៊ីសេរី មិន​អាច​សុំ​ការ​បំភ្លឺ​បន្ថែម​ពី​អ្នក​នាំ​ពាក្យ​គណបក្ស​ប្រជាជន​កម្ពុជា និង​អ្នកនាំពាក្យ​គណបក្ស​សង្គ្រោះ​ជាតិ ជុំវិញ​រឿង​នេះ​បាន​​នៅ​ឡើយ​ទេ នៅ​ថ្ងៃ​ទី​១៤ ខែ​មករា។

​ចំណែក​ប្រធាន​គណបក្ស​សង្គ្រោះ​ជាតិ លោក សម រង្ស៊ី ដែល​កំពុង​រស់​នៅ​ក្រៅ​ប្រទេស បាន​សរសេរ​នៅ​ហ្វេសប៊ុក (Facebook) របស់​លោក នៅ​ថ្ងៃ​ទី​១៤ ខែ​មករា ថា មាន​អ្នក​ចោទ​ប្រកាន់​លោក​ថា ការ​អត្ថាធិប្បាយ​របស់​លោក​ខ្លះៗ ដែល​ប៉ះពាល់​គណបក្ស​ប្រជាជន​កម្ពុជា បាន​ធ្វើ​ឲ្យ​រាំង​ស្ទះ​ដល់​ការ​ចរចា​ដើម្បី​ដោះលែង​មន្ត្រី​អង្គការ​សិទ្ធិមនុស្ស​អាដហុក។ លោក​ចោទ​ប្រកាន់​ថា គណបក្ស​កាន់​អំណាច​បាន​យក​មន្ត្រី​អាដហុក និង​មន្ត្រី គ.ជ.ប ទាំង ៥​រូប​នេះ ជា​ចំណាប់​ខ្មាំង​នយោបាយ​ដើម្បី​ប្រើប្រាស់​ជា​ថ្នូរ គំរាមកំហែង​គណបក្ស​សង្គ្រោះ​ជាតិ ក្នុង​ការ​បម្រើ​ប្រយោជន៍​របស់​ខ្លួន។

​ប៉ុន្តែ​ជា​អ្នក​វិភាគ​នយោបាយ លោក អ៊ូ វីរៈ យល់​ថា ការ​អត្ថាធិប្បាយ​របស់​លោក សម រង្ស៊ី គឺ​អាច​ប៉ះពាល់​ដល់​ដំណើរការ​នៃ​ការ​ដោះលែង​មន្ត្រី​សិទ្ធិមនុស្ស​អង្គការ​អាដហុក និង​អគ្គលេខាធិការ​រង គ.ជ.ប ព្រោះ​លោក សម រង្ស៊ី ជា​ប្រធាន​គណបក្ស​សង្គ្រោះ​ជាតិ ទោះ​លោក​ថ្លែង​នៅ​ទី​ណា ក៏​សម្ដី​តំណាង​ឲ្យ​គណបក្ស​ប្រឆាំង។ ទោះ​យ៉ាង​ណា​ក៏ដោយ លោក អ៊ូ វីរៈ យល់​ថា មន្ត្រី​សិទ្ធិមនុស្ស​​អាដហុក និង​អគ្គលេខាធិការ​រង គ.ជ.ប នឹង​ត្រូវ​ដោះលែង ដោយ​ត្រូវ​រង់ចាំ​ស្ថានការណ៍​ស្ងប់ស្ងាត់​ជាង​នេះ​បន្តិច៕​

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។