ក្នុងពេលនោះ ទាំងប្រធាន និងអនុប្រធានគណបក្សនេះ បានចោទប្រកាន់ថា គណបក្សប្រជាជនកម្ពុជា បានរំលោភលើកិច្ចព្រមព្រៀងនៃការចរចារវាងគណបក្សទាំងពីរនាពេលកន្លងទៅ និងថា អាជ្ញាធរពាក់ព័ន្ធត្រូវទទួលខុសត្រូវចំពោះអំពើអយុត្តិធម៌ ដែលបានប្រព្រឹត្តលើក្រុមបាតុករស្លូតត្រង់។
មេដឹកនាំគណបក្សសង្គ្រោះជាតិ សន្យាថានឹងស្វែងរកយុត្តិធម៌អោយអ្នករងគ្រោះ និងបាតុករដទៃទៀត ដោយការនាំយកជនដៃដល់ទៅផ្ដន្ទាទោសតាមច្បាប់។
ប្រធានគណបក្សសង្គ្រោះជាតិ លោក សម រង្ស៊ី បានថ្លែងចំពោះមុខអ្នកគាំទ្រដែលមានទាំងព្រះសង្ឃផងនោះថា លោកនឹងមិនបណ្ដោយអោយមានវប្បធម៌និទ្ទណ្ឌភាពតទៅទៀតឡើយ។ លោកក៏បានបំផុសអោយជនរងគ្រោះចាប់ផ្ដើមរៀបចំពាក្យបណ្ដឹង។
«សំឡេង»
ចំណែកអនុប្រធានគណបក្សសង្គ្រោះជាតិ លោក កឹម សុខា បានលើកឡើងថា ករណីអំពើហិង្សានៅមុខវត្តស្ទឹងមានជ័យ កាលពីថ្ងៃទី១២ ខែវិច្ឆិកា អាចនឹងត្រូវលើកឡើងក្នុងកិច្ចចរចាជាថ្មីណាមួយទៀតជាមួយគណបក្សប្រជាជនកម្ពុជា។
«សំឡេង»
វិទ្យុអាស៊ីសេរី ពុំអាចសុំការឆ្លើយតបពីមន្ត្រីជាន់ខ្ពស់គណបក្សប្រជាជនកម្ពុជា បាននៅឡើយទេនៅរសៀលថ្ងៃទី១៦ ខែវិច្ឆិកា។
យ៉ាងណា ចំពោះវិធានការស្វែងរកយុត្តិធម៌ដល់ជនរងគ្រោះនៅក្នុងហេតុការណ៍ហិង្សានៅគល់ស្ពានស្ទឹងមានជ័យ ស្នងការនគរបាលរាជធានីភ្នំពេញ លោក ជួន សុវណ្ណ ធ្លាប់បានអះអាងថា ការស៊ើបអង្កេតករណីនេះកំពុងដំណើរការ។
អ្នកគ្រប់គ្រងបច្ចេកទេសផ្នែកស៊ើបអង្កេតនៃអង្គការលីកាដូ (Licadho) លោក អំ សំអាត មានប្រសាសន៍ថា ការស្វែងរកយុត្តិធម៌ គឺមិនប្រកាន់គណបក្សនយោបាយឡើយ សំខាន់ត្រូវគ្រប់ភាគីធ្វើការជាមួយគ្នា ដើម្បីអោយកម្ពុជា មានតុលាការដែលឯករាជ្យ ទើបយុត្តិធម៌ពិតប្រាកដបានទៅដល់ប្រជាពលរដ្ឋ។
«សំឡេង»
ព្រឹត្តិការណ៍នៅគល់ស្ពានស្ទឹងមានជ័យ ដែលជាការបង្ក្រាបបាតុករនៃរោងចក្រ អែស.អិល ដោយការបាញ់គ្រាប់ពិតពីសំណាក់សមត្ថកិច្ច នគរបាល និងកងរាជអាវុធហត្ថ បានធ្វើអោយស្ត្រីអ្នកលក់បាយម្នាក់ស្លាប់ និងជាច្រើននាក់ទៀតរបួស។ មកដល់ពេលនេះ យុវជនពីរនាក់កំពុងជាប់ក្នុងឃុំពីបទប្រើហិង្សាលើអាជ្ញាធរ នៅពេលដែលបាតុករជាច្រើននាក់បានដុតបំផ្លាញឡាន និងម៉ូតូរបស់នគរបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។