មន្ត្រីនាំពាក្យគណបក្សសង្គ្រោះជាតិ បញ្ជាក់ថា សំណុំរឿងសកម្មជនគណបក្សប្រឆាំងទាំង ១៥នាក់ ដែលកំពុងជាប់ឃុំ នៅពុំទាន់មានសញ្ញាណាមួយដែលអាចនិយាយបានថា នឹងអាចបាននៅក្រៅឃុំបណ្ដោះអាសន្ន ដូចការស្នើសុំនៅឡើយទេ។
មន្ត្រីនាំពាក្យគណបក្សប្រជាជនកម្ពុជា ធ្លាប់អះអាងថា សកម្មជនទាំង ១៥នាក់ ដែលកំពុងជាប់ឃុំនឹងមិនងាយទទួលបានសេរីភាពឡើយ ប្រសិនបើស្ថានភាពនយោបាយនៅតែមិនទាន់ត្រូវរ៉ូវគ្នាដូចនេះ។ ចំណែកអង្គការសង្គមស៊ីវិលវិញចាត់ទុកថា ដោយសារនេះវាជារឿងនយោបាយ ហេតុនេះ លុះត្រាមានដំណោះស្រាយផ្នែកនយោបាយជាមុនសិន ទើបអ្នកទាំង ១៥នាក់ អាចមានវាសនារួចផុតពីការចោទប្រកាន់។
មន្ត្រីបក្សប្រឆាំង លោក យឹម សុវណ្ណ ព្រមានថា បើគណបក្សគ្រប់គ្រងរដ្ឋាភិបាលនៅតែបន្តឃុំខ្លួនសកម្មជនដែលបក្សប្រឆាំងចាត់ទុកថា ជាអ្នកទោសនយោបាយទៀតនោះ នឹងធ្វើឲ្យស្ថានការណ៍នយោបាយរឹតតែអាប់អួ ហើយការបង្រួបបង្រួមជាតិដែលភាគីម្ខាងៗសុទ្ធតែបានអះអាងថា ចង់ឃើញប្រទេសជាតិរុងរឿងនោះ នឹងមិនងាយសម្រេចបានឡើយ។
ការថ្លែងដូចនេះរបស់លោក យឹម សុវណ្ណ មន្ត្រីនាំពាក្យគណបក្សសង្គ្រោះជាតិ ក្នុងពេលដែលលោកដឹកនាំតំណាងរាស្ត្រមួយក្រុមទៅសួរសុខទុក្ខសកម្មជន និងមន្ត្រីជាន់ខ្ពស់គណបក្សប្រឆាំងទាំង ១៥នាក់ នៅពន្ធនាគារព្រៃស កាលពីព្រឹកថ្ងៃទី២៣ ខែមីនា។
លោក យឹម សុវណ្ណ និយាយថា គណបក្សសង្គ្រោះជាតិ តែងបង្ហាញឆន្ទៈ ក្នុងការចរចាដើម្បីបញ្ចប់ជម្លោះផ្នែកនយោបាយជានិច្ច។ ជាងនេះទៀត ការបន្តដាក់សម្ពាធតាមរយៈការចាប់ខ្លួន និងចោទប្រកាន់តាមផ្លូវតុលាការប្រឆាំងអ្នកតស៊ូមតិដោយសន្តិវិធីនេះ នឹងពុំមែនជាជម្រើសឡើយ។ ម្យ៉ាងវិញទៀត រហូតមកដល់ពេលនេះ គណបក្សប្រឆាំងនៅពុំទាន់បានដំណឹងណាមួយដែលថា អ្នកជាប់ឃុំទាំង ១៥នាក់ អាចបាននៅក្រៅឃុំពេលណាឲ្យប្រាកដនៅឡើយដែរ។ លោកបន្តថា «ទាល់តែតស៊ូដោយ ស្មោះត្រង់ អ្នកស្រូតត្រង់ដូច ថ្នាក់ដឹកនាំ គណបក្សសង្គ្រោះជាតិ ពិសេសអ្នកជាប់ពន្ធនាគារត្រូវដោះលែង ។ បើសិនជាយើងមិនអាចនិយាយពីយុត្តិធម៌ និងសាមគ្គីភាព បង្រួបបង្រួម ជាតិក្នុងពេលដែលយើងធ្វើបាបគណបក្សប្រឆាំង នៅពីក្រោយដោយអំពើអយុត្តិធម៌»។
ជុំវិញជម្លោះនយោបាយនេះ មន្ត្រីជាន់ខ្ពស់គណបក្សប្រឆាំង និងសកម្មជនមួយចំនួន ត្រូវជាប់ចោទតាមផ្លូវតុលាការជាហែហូរមក។ លោក មាជ សុវណ្ណារ៉ា និងសកម្មជន ១០នាក់ផ្សេងទៀត ត្រូវបានសមត្ថកិច្ចចាប់ខ្លួនបន្ទាប់ពីមានអំពើហិង្សាកាលពីថ្ងៃទី១៥ ខែកក្កដា ឆ្នាំ២០១៤។ ក្រោយការចាប់ខ្លួន សកម្មជនទាំង ១១នាក់ ត្រូវបានចៅក្រមនៃតុលាការក្រុងភ្នំពេញ សម្រេចផ្ដន្ទាទោសដាក់ពន្ធនាគារចន្លោះពី ៧ឆ្នាំ ទៅ ២០ឆ្នាំ ពីបទដឹកនាំ និងចូលរួមក្នុងចលនាកុប្បកម្ម ដែលនាំឲ្យមានហិង្សានៅក្បែរទីលានប្រជាធិបតេយ្យ។
ក្រៅពីនេះ នៅមានលោក ហុង សុខហួរ សមាជិកព្រឹទ្ធសភាមកពីគណបក្ស សម រង្ស៊ី ដែលសំណុំរឿងលោកកំពុងស្ថិតនៅក្នុងដៃតុលាការក្រុងភ្នំពេញ នៅឡើយ។ ដោយឡែក សកម្មជន ៣នាក់ផ្សេងទៀត ក៏កំពុងជាប់ឃុំនៅក្នុងពន្ធនាគារព្រៃស និងបន្តរង់ចាំសវនាការដែរ។
ជាញឹកញាប់មន្ត្រីនាំពាក្យគណបក្សប្រជាជនកម្ពុជា លោក សុខ ឥសាន ធ្លាប់អះអាងថា លទ្ធភាព ឬ វាសនាសកម្មជនទាំង ១៥នាក់របស់គណបក្សប្រឆាំងនេះ អាចរួចផុតពីការចោទប្រកាន់ ឬយ៉ាងណានោះ វាអាស្រ័យលើបរិយាកាសនយោបាយ។ លោកបន្ថែមថា ការដោះលែង ឬមិនអាចដោះលែងនោះ គឺត្រូវអ៊ុតមើលសម្ពាធនយោបាយជាមុនសិន ហើយច្រកចេញនោះទៀតសោត វាស្ថិតនៅលើគណបក្សកាន់អំណាចប៉ុណ្ណោះ។
បើទោះបីជាសំណុំរឿងមួយចំនួនត្រូវបានអង្គការសង្គមស៊ីវិលមើលឃើញថា ពុំមានធាតុផ្សំនៃបទល្មើសណាមួយអាចឈានទៅដល់ការចោទប្រកាន់មែន ប៉ុន្តែតុលាការចាប់ពីថ្នាក់ក្រោម រហូតដល់កំពូល នៅតែរក្សាបទចោទប្រឆាំងអ្នកទាំង ១៥នាក់ដដែល។ មានសវនាការជាច្រើនលើក ហើយមេធាវីការពារក្ដីឲ្យសកម្មជនទាំងនោះ បានព្យាយាមលើកហេតុផលដោះបន្ទុកបែបណា នៅនាទីចុងក្រោយ វាសនាអ្នកទាំងនោះនៅតែពុំអាចមានលទ្ធភាពរួចផុតពីការចោទប្រកាន់បាន។
មន្ត្រីជាន់ខ្ពស់អង្គការលីកាដូ (LICADHO) លោក អំ សំអាត យល់ឃើញថា ដោយសារស្ថានភាពមនុស្សទាំង ១៥នាក់ មានជាប់ពាក់ព័ន្ធនឹងរឿងនយោបាយ ហេតុនេះ ដើម្បីអាចរកច្រកចេញបានលុះត្រាតែមានការផ្សះផ្សាផ្នែកនយោបាយជាមុនសិន។ បន្ថែមពីលើនេះទៀត រាល់ការចាប់ខ្លួនសកម្មជនគណបក្សប្រឆាំង វាសុទ្ធតែជាការដាក់សម្ពាធប្រឆាំងគណបក្សសង្គ្រោះជាតិ។ លោកបន្តថា «នៅពេលដែលគ្មានការចរចាផ្នែកនយោបាយ ណាមួយ ដែលអាចត្រូវរ៉ូវគ្នាទេ ខ្ញុំគិតថា អ្នកទាំង ១៥នាក់ ហ្នឹង គឺមិនអាចនៅក្រៅឃុំបានទេ»។
ក្រោយបញ្ចប់ការខ្វែងគំនិតគ្នាតាមផ្លូវនយោបាយ កាលពីថ្ងៃទី២២ ខែកក្កដា ឆ្នាំ២០១៤ ពេលនោះសកម្មជនចំនួន ១១នាក់ បាននៅក្រៅឃុំបណ្ដោះអាសន្ន។ មិនយូរប៉ុន្មាន នៅពេលកម្ដៅនយោបាយផ្ទុះជាថ្មីឡើងវិញ អ្នកទាំង ១១នាក់ ក៏ត្រូវបានចាប់បញ្ជូនទៅឃុំខ្លួនភ្លាមដែរ។ ក្រៅពីនេះ លោក ហុង សុខហួរ និងសកម្មជន ៣នាក់ផ្សេងទៀត ត្រូវចាប់ខ្លួនជាបន្តបន្ទាប់ដែរ។
ការចាប់ខ្លួនមន្ត្រី និងសកម្មជនបក្សប្រឆាំងឃុំខ្លួននេះ កន្លងមករដ្ឋាភិបាលបានទទួលរងការរិះគន់យ៉ាងខ្លាំងពីអង្គការការពារសិទ្ធិមនុស្សជាតិ និងអន្តរជាតិ។ ដោយឡែករដ្ឋមន្ត្រីការបរទេសសហរដ្ឋអាមេរិក លោក ចន ឃែរី (John Kerry) ក្នុងពេលបំពេញទស្សនកិច្ចនៅកម្ពុជា លោកបានស្នើឲ្យរដ្ឋាភិបាលលោក ហ៊ុន សែន ពិចារណាចំពោះសកម្មជនបក្សប្រឆាំងដែលត្រូវឃុំខ្លួន និងទទូចឲ្យមានការផ្សះផ្សាផ្នែកនយោបាយ ដើម្បីធ្វើឲ្យប្រសើរឡើងផ្នែកប្រជាធិបតេយ្យនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។