មន្ត្រីគណបក្សសង្គ្រោះជាតិខែត្រស្វាយរៀងអះអាងថា អាជ្ញាធរឃុំមកពីបក្សកាន់អំណាច កំពុងធ្វើយុទ្ធនាការដើរបញ្ចុះបញ្ចូលមន្ត្រីមូលដ្ឋានរបស់គណបក្សសង្គ្រោះជាតិ ស្ទើរតែគ្រប់ឃុំទាំងអស់នៅខែត្រស្វាយរៀងដោយសន្យាថា នឹងរក្សាប្រាក់ខែ និងតំណែង ប្រសិនបក្សជំទាស់ត្រូវរំលាយ។ មន្ត្រីសង្គមស៊ីវិលចាត់ទុកយុទ្ធនាការនេះ ជាសារគំរាមកំហែងផ្នែកនយោបាយ និងរំលោភអំណាចតុលាការ ដែលធានាដោយរដ្ឋធម្មនុញ្ញ។
មន្ត្រីមកពីបក្សកាន់អំណាច នៅតែព្យាយាមបន្តដើរបញ្ចុះបញ្ចូលឲ្យមន្ត្រីគណបក្សសង្គ្រោះជាតិ ចូលបម្រើគណបក្សប្រជាជនកម្ពុជាស្របពេលដែលលោកនាយករដ្ឋមន្ត្រី ហ៊ុន សែន ទូងស្គរម្តងហើយម្តងទៀតទទូចអោយ ឲ្យមេឃុំ-ចៅសង្កាត់គណបក្សសង្គ្រោះជាតិ ចុះចូលបម្រើបក្សប្រជាជនកម្ពុជាបើចង់រក្សាដំណែងឲ្យនៅដដែល ក្រោយគណបក្សប្រឆាំងត្រូវរំលាយនោះ។
សមាជិកក្រុមប្រឹក្សាឃុំទួលស្តី ស្រុកចន្ទ្រា មកពីបក្សសង្គ្រោះជាតិ លោក ភំ ថាន ឲ្យដឹងថា មេឃុំទួលស្តី លោក ប្រាក់ ឌិន ព្យាយាមបញ្ចុះបញ្ចូលលោកដោយសន្យានៅរក្សាតំណែង និងប្រាក់ខែ ប្រសិនបក្សប្រឆាំងត្រូវរំសាយមែននោះ។ លោកប្តេជ្ញាថា នឹងមិនចូលបម្រើបក្សកាន់អំណាចដាច់ខាត បើទោះបីជាត្រូវអស់តំណែង និងប្រាក់ខែក្តី ហើយលោកនឹងបន្តការងារថ្មី ជាអ្នករត់ម៉ូតូឌុប និងធ្វើកសិកម្មចិញ្ចឹមជីវិតប្រសើរជាង៖ «ឲ្យបញ្ចុះបញ្ចូលទៅ រក្សាតំណែង នៅថ្ងៃខាងមុខគេរំលាយហើយ។ ខ្ញុំថា ខ្ញុំមិនខ្វល់រឿងតំណែង ឬមិនតំណែងព្រោះពលរដ្ឋជាអ្នកបោះឆ្នោតឲ្យ។ អត់មានបញ្ហាទេ បើអត់តំណែង និងប្រាក់ខែ ក៏ខ្ញុំរស់ធម្មតាដែរ»។
ឆ្លើយតបការចោទប្រកាន់នេះ មេឃុំទួលស្តីមកពីបក្សកាន់អំណាច លោក ប្រាក់ ឌិន បដិសេធយ៉ាងខ្លីថា លោកមិនបានបញ្ចុះបញ្ចូលសមាជិកក្រុមប្រឹក្សាមកពីបក្សសង្គ្រោះជាតិនោះទេ៖ «អត់ទេ ខ្ញុំមានដែរបានធ្វើអ៊ីចឹងទេ ខ្ញុំនៅតែកន្លែងចុះឈ្មោះបោះឆ្នោត»។
ពលរដ្ឋរស់នៅខែត្រស្វាយរៀងថ្លែងសុំមិនបញ្ចេញឈ្មោះចាត់ទុកចេតនា ចង់រំសាយបក្សប្រឆាំង របស់រដ្ឋាភិបាល គឺជាការដាក់ទារុណកម្មផ្លូវចិត្តដល់ពលរដ្ឋ និងមន្ត្រីបក្សដែលបង្កឲ្យពលរដ្ឋលែងមានជំនឿចិត្ត លើការប្រកូតប្រជែងដោយស្មើភាពមកលើបក្សកាន់អំណាចមួយនេះ។ លោកយល់ថា ការថ្លែងរបស់លោកនាយករដ្ឋមន្ត្រី ហ៊ុន សែន ដែលអំពាវនាវឲ្យមន្ត្រីមូលដ្ឋានបក្សសង្គ្រោះជាតិចុះចូលបម្រើបក្សកាន់អំណាច ហាក់ដូចជា លោក ហ៊ុន សែន ដឹងមុនថា បក្សប្រឆាំងនឹងត្រូវរំលាយ នៅគ្រាដែលសំណុំរឿងនេះកំពុងឋិតក្នុងកណ្តាប់ដៃតុលាការ។ បញ្ហានេះលោកចាត់ទុកថា លោកហ៊ុន សែន បានបំពានអំណាចតុលាការធ្ងន់ធ្ងរ ដែលនាំឲ្យពលរដ្ឋកត់ចំណាំថា ទង្វើរបស់លោកហ៊ុនសែន គឺជាទង្វើអាក្រក់៖ «មិនអ ស់ ចិត្តត្រង់ថា ពលរដ្ឋផ្តល់សិទ្ធិឲ្យ ហើយរដ្ឋាភិបាលធ្វើរបៀបនេះដូចជា ខ្ញុំមិនយល់ត្រង់ថា គាត់ចង់ធ្វើបាបពលរដ្ឋដល់ណាទៀត បើពលរដ្ឋគាត់គាំទ្រ គំរាមកំហែង។ ខ្ញុំជាពលរដ្ឋមិនគាំទ្រទេ នាយករដ្ឋមន្ត្រីធ្វើរបៀបនេះ»។
ខណៈថ្ងៃជំនុំជម្រះសំណុំរឿងរំលាយគណបក្សសង្គ្រោះជាតិ កាន់តែខិតជិតចូលមកដល់ លោកនាយករដ្ឋមន្ត្រី ហ៊ុន សែន បានអំពាវនាវកាន់តែខ្លាំងឡើង និងជាចំហរអោយមន្ត្រីបក្សសង្គ្រោះជាតិ ចូលបម្រើបក្សកាន់អំណាច។ លោក ហ៊ុន សែន ហាក់មានជំនឿដឹងមុនតុលាការច្បាស់ថា គណបក្សសង្គ្រោះជាតិ នឹងត្រូវរំលាយក្នុងពេលដ៏ខ្លីខាងមុខ នៅថ្ងៃទី១៦ វិច្ឆិកាខាងមុខដោយតុលាការកំពូល ។
យ៉ាងនេះក្តីមន្ត្រីឃុំមួយចំនួនមកពីបក្សសង្គ្រោះជាតិ នៅខែត្រស្វាយរៀង សង្កត់ធ្ងន់ថា បើរដ្ឋាភិបាលរំសាយអាសនៈក្រុមប្រឹក្សាឃុំ-សង្កាត់ ហាក់ដូចជា ការរំលាយច្បាប់គ្រប់គ្រងរដ្ឋបាលឃុំ-សង្កាត់ និងច្បាប់ស្ដីពីការបោះឆ្នោតដែរ ព្រោះតំណែង និងតួនាទីរបស់មេឃុំ ការពារដោយច្បាប់នេះ តាមប្រព័ន្ធសមាមាត្រ ហើយគណៈកម្មការជាតិរៀបចំការបោះឆ្នោត ក៏គួរតែរំលាយដែរ ព្រោះគណៈកម្មការនេះបានជ្រើសតាំងមេឃុំ និងសមាជិកក្រុមប្រឹក្សាឃុំកាន់តំណែងតាមអំណាចសន្លឹកឆ្នោត។
ច្បាប់ស្ដីពីការគ្រប់គ្រងរដ្ឋបាលឃុំ-សង្កាត់មាត្រា១១ ចែងថា ក្រុមប្រឹក្សាឃុំ-សង្កាត់មានអាណត្តិ ៥ឆ្នាំ ហើយត្រូវផុតកំណត់នៅពេលដែលមានក្រុមប្រឹក្សាឃុំ-សង្កាត់ថ្មីចូលកាន់តំណែង។
មន្ត្រីអង្កេតជាន់ខ្ពស់អង្គការខុមហ្វ្រែល (Comfrel) លោក កន សាវាង្ស យល់ថា អំណាច តុលាការគឺជាអំណាចឯករាជ្យ ដែលធានាដោយរដ្ឋធម្មនុញ្ញពុំមានបុគ្គលណាម្នាក់ បំពានស្ថាប័ននេះបានទេ តែយ៉ាងណាលោកការបកស្រាយណាមួយដោយអ្នកកាន់អំណាច មុនពេលតុលាការមិនទាន់សម្រេចក្តីគឺជាសញ្ញាបង្គាប់បញ្ជារ និងគ្រប់ដណ្តប់លើអំណាចតុលាការ។ លោកថា អាជ្ញាធរមូលដ្ឋាន នគរបាល និងយោធា គឺជាមន្ត្រីបំពេញកិច្ចការងាររដ្ឋ បម្រើពលរដ្ឋគ្រប់រូបដោយស្មើភាព ក៏ប៉ុន្តែបើមន្ត្រីទាំងនោះ យកតួនាទីដើរបញ្ចុះបញ្ចូលបម្រើឲ្យបក្សនយោបាយណាមួយ គឺជារឿងមិនត្រឹមត្រូវ និងខុសច្បាប់៖ «គេមិនមានឲ្យធ្វើការពាក់ព័ន្ធការគំរាមគំហែង និងការលូងលោមទិញទឹកចិត្តមានន័យថា ធ្វើរបៀបនេះមិនត្រឹមត្រូវតាមផ្លូវច្បាប់ទេ។ បើគណបក្សមួយមិនទាន់រលាយ ទោះបីម្នាក់ទៀតដើរចេញក៏ដោយ មានមន្ត្រីច្រើនទៀត សមាជិកភាពច្រើនទៀតដែលងើបឡើងក្នុងបេក្ខជនហ្នឹង»។
ទោះយ៉ាងណាមន្ត្រីមូលដ្ឋានមកពីបក្សសង្គ្រោះជាតិប្តេជ្ញាថា នឹងបន្តធ្វើកិច្ចការតាមតួនាទីនឹងមិនភ័យព្រួយចំពោះការអំពាវនាវរបស់លោក ហ៊ុន សែន នោះទេ។ ពួកគេចាត់ទុកដំណែងនេះ គឺពលរដ្ឋផ្តល់ជូនតាមអំណាចសន្លឹកឆ្នោត និងធានាដោយច្បាប់ស្ដីពីការគ្រប់រដ្ឋបាលឃុំ-សង្កាត់ និងច្បាប់ស្ដីពីការបោះឆ្នោត ហេតុនេះការរំសាយអាសនៈក្រុមប្រឹក្សាឃុំសង្កាត់របស់លោក ហ៊ុន សែន គឺជាទង្វើខុសច្បាប់ធ្ងន់ធ្ងរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។