មន្ត្រីគណបក្សសង្គ្រោះជាតិ ខេត្តសៀមរាប ចោទប្រកាន់មេឃុំតាសៀម គណបក្សកាន់អំណាចថា មិនព្រមចុះហត្ថលេខាលើលិខិតសុំប្ដូរសមាជិកក្រុមប្រឹក្សាឃុំម្នាក់ដែលបានចុះចូលគណបក្សប្រជាជនកម្ពុជា ដើម្បីបញ្ចូលឈ្មោះថ្មីបញ្ជូនទៅក្រសួងមហាផ្ទៃ នោះទេ។ មន្ត្រីគណបក្សប្រឆាំងរូបនេះ បារម្ភខ្លាចដាក់បញ្ជូនសមាជិកក្រុមប្រឹក្សាឃុំថ្មីមិនទាន់ នាំឲ្យប៉ះពាល់ដល់លទ្ធផលនៃការបោះឆ្នោតជ្រើសរើសសមាជិកព្រឹទ្ធសភានៅពេលខាងមុខ។
មន្ត្រីគណបក្សសង្គ្រោះជាតិ ខេត្តសៀមរាប ហៅការមិនព្រមចុះហត្ថលេខាសុំប្ដូរសមាជិកក្រុមប្រឹក្សាឃុំថ្មីរបស់មេឃុំនេះថា ជាការអនុវត្តច្បាប់ក្នុងចេតនានយោបាយ។
លោក ពៀត ម៉ាប់ ឲ្យដឹងនៅថ្ងៃទី១១ ខែវិច្ឆិកា ថា អាជ្ញាធរមូលដ្ឋាននៅខេត្តសៀមរាប ហាក់ដាក់គំនាបគ្រប់បែបយ៉ាងមកលើមន្ត្រីគណបក្សប្រឆាំង ដូចជាការបញ្ជូនកម្លាំងសមត្ថកិច្ចតាមសកម្មភាពក្រុមប្រឹក្សាឃុំសង្កាត់ ជាពិសេសអ្នកដែលមិនចុះចូលគណបក្សប្រជាជនកម្ពុជា តែម្ដង។ លោកអះអាងទៀតថា ចំណែកឯមេឃុំតាសៀម ស្រុកស្វាយលើ គណបក្សកាន់អំណាចវិញ គឺមិនព្រមចុះហត្ថលេខាលើលិខិតស្នើប្ដូរសមាជិកក្រុមប្រឹក្សាឃុំម្នាក់ ដែលបានចុះចូលតាមការអូសទាញរបស់អាជ្ញាធរបក្សប្រជាជនកម្ពុជា កាលពីខែតុលា កន្លងទៅនោះទេ៖ «ហើយគណបក្សស្នើទៅដោះដូរ វាត្រូវស៊ីញ៉េពីមេឃុំ ហើយឆ្លងតាមរយៈអភិបាលខេត្ត បញ្ជូនទៅក្រសួងមហាផ្ទៃ។ ខ្ញុំមានការព្រួយបារម្ភដែររឿងលោកមេឃុំ គាត់មិនស៊ីញេតាមតួនាទីរបស់គាត់វាពាក់ព័ន្ធបែបបទរដ្ឋបាលនៃការដោះដូរ វាចូលលក្ខណៈជ្រៀតជ្រែកកិច្ចការផ្ទៃក្នុងគណបក្ស»។
អាស៊ីសេរី ពុំអាចទាក់ទងមេឃុំតាសៀម លោក ហឿន សុខ ដើម្បីឆ្លើយតបជុំវិញការចោទប្រកាន់នេះបានទេ ដោយអ្នកទទួលទូរស័ព្ទប្រាប់ថា លោកជាប់រវល់។
ទោះជាយ៉ាងនេះក្ដី មន្ត្រីគណបក្សប្រឆាំងអះអាងថា លោកឃុំមិនចុះហត្ថលេខាធ្វើឡើងតាមបញ្ជារបស់អាជ្ញាធរស្រុក។
មន្ត្រីផ្នែកច្បាប់និងអង្កេតនៃអង្គការខុមហ្វ្រែល (COMFREl) លោក យឿង សុធារ៉ា លើកឡើងថា បើទោះបីជាមេឃុំមិនចុះហត្ថលេខាក៏ពុំមានឥទ្ធិពលដល់ការដាក់បញ្ចូលឈ្មោះសមាជិកក្រុមប្រឹក្សាឃុំសង្កាត់ដែលបានចុះចូលទៅគណបក្សនយោបាយផ្សេងនោះដែរ។ លោកអះអាងថា មូលហេតុដែលមិនមានឥទ្ធិពល ព្រោះជាអំណាចរបស់គណៈកម្មការជាតិរៀបចម្ការបោះឆ្នោត (គ.ជ.ប) ជាអ្នកសម្រេចតាមផ្លូវច្បាប់ក្នុងការដាក់បញ្ចូលឈ្មោះសមាជិកក្រុមប្រឹក្សាថ្មី ដែលត្រូវបានគណបក្សដើមលុបឈ្មោះចេញពីសមាជិកក្រុមប្រឹក្សាឃុំសង្កាត់នោះ៖«ដូច្នោះនីតិវិធីគណបក្សគ្រាន់តែ បញ្ជូនបញ្ជីឈ្មោះដោយសំណើទៅគ . ជ . ប ហើយគ . ជ . បនិងផ្ដល់សុពលភាពទៅលើអ្នកដែលគណបក្សសាមី បានស្នើសុំផ្ដល់សុពលភាព ពេលនោះគាត់នឹងក្លាយទៅជាសមាជិកក្រុមប្រឹក្សាឃុំសង្កាត់ពេញសិទ្ធិ។ ដូច្នេះវាអត់មានអ្វីពាក់ព័ន្ធជាមួយមេឃុំចៅសង្កាត់ទេ » ។
ទោះជាយ៉ាងណា អនុប្រធានគណបក្សសង្គ្រោះជាតិ ខេត្តកំពង់ធំ លោក ពៀត ម៉ាប់ ឲ្យដឹងថា រហូតមកទល់ពេលនេះ ទើបតែសមាជិកក្រុមប្រឹក្សាឃុំរបស់គណបក្សលោកក្នុងខេត្តមួយនេះម្នាក់ក្នុងចំណោមសមាជិកក្រុមប្រឹក្សាសរុបជិត ៤០០នាក់ ដែលបានទៅជ្រកក្រោមដំបូលទេវតានោះ។ ចំណែកអ្នកដែលបានចុះចូលនេះ ក៏ខាងគណបក្សបានដាក់លិខិតស្នើទៅលោកមេឃុំ សុំប្ដូរបេក្ខភាពថ្មីដើម្បីបញ្ជូនឈ្មោះទៅក្រសួងមហាផ្ទៃ តាំងពីចុងខែតុលា មក ហើយទល់ពេលនេះមិនទាន់ដាក់បញ្ចូលសមាជិកថ្មីបាននៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។