គណបក្សប្រឆាំងនៅមិនទាន់បានកំណត់ពេលវេលា នៃការធ្វើមហាបាតុកម្មដូចការគ្រោងទុកនៅឡើយទេ ។
លោក អេង ឆៃអ៊ាង តំណាងរាស្ត្រមណ្ឌលកណ្ដាល គណបក្សសង្គ្រោះជាតិ ឲ្យដឹងនៅថ្ងៃទី ១៦ ខែ កញ្ញា ថា ពិធីរៀបចំមហាបាតុកម្ម មកដល់ពេលនេះ គឺខាងគណបក្សមិនទាន់អាចកំណត់ពេលវេលាបាននៅឡើយទេ។ លោកបន្តថា ការមិនអាចកំណត់ទិសដៅ នៃគម្រោងមហាបាតុកម្មបាននេះ ដោយសារមានកិច្ចការជាច្រើនទៀត ដែលត្រូវសិក្សា និងការទទួលខុសត្រូវ។ «»
តាមការគ្រោងទុក គណបក្សប្រឆាំង បញ្ជាក់ថា នឹងយកថ្ងៃទី១៦ ខែ កញ្ញា ជាថ្ងៃដែលប្រកាសជាក់លាក់ពីគម្រោងធ្វើមហាបាតុកម្ម។ តំណាងរាស្ត្រគណបក្សសង្គ្រោះជាតិលើកឡើងថា មូលហេតុដែលនាំឲ្យមានគម្រោងធ្វើមហាបាតុកម្មនេះ គឺដើម្បីស្នើឲ្យរដ្ឋាភិបាល សម្រួលស្ថានការណ៍នយោបាយ ដែលកំពុងតាន់តឹងនេះ វិលទៅរកភាពប្រក្រតីដូចមុនថ្ងៃទី ២២ ខែ កក្កដា ឆ្នាំ២០១៤ ឡើងវិញ។
បើទោះជាបែបណា លោកនាយករដ្ឋមន្ត្រី ហ៊ុន សែន បញ្ជាក់ជំហរថា បាតុកម្មណាមួយ របស់គណបក្សនឹងមិនអាចឲ្យមានរូបរាងបានឡើយ។ ប្រធានគណបក្សប្រជាជនកម្ពុជាព្រមានកម្ចាត់ចោល ប្រសិនបើមានបាតុកម្មកើតឡើងមែន ទោះក្នុងតម្លៃណាមួយក៏ដោយ។
ទាក់ទងករណីនេះដែរ គណបក្សប្រឆាំងសម្រេចកែសម្រួលសមាសភាពគណៈកម្មការតស៊ូមតិផ្ទៃក្នុងបក្ស និងបង្កើតគណៈកម្មការថ្មីមួយ សម្រាប់យុទ្ធនាការបោះឆ្នោតជ្រើសរើសក្រុមប្រឹក្សាឃុំសង្កាត់ សម្រាប់ឆ្នាំ២០១៧។
សេចក្ដីប្រកាសព័ត៌មានរបស់គណបក្សសង្គ្រោះជាតិឲ្យដឹងកាលពីថ្ងៃទី ១៦ ខែ កញ្ញា ថា កិច្ចពិគ្រោះយោបល់ ដែលដឹកនាំដោយលោក កឹម សុខា សម្រេចលើរបៀបវារៈចំនួន ៣ សំខាន់ៗក្នុងនោះ គាំទ្រលើសេចក្ដីប្រកាសរួមស្ដីពី ស្ថានភាពសិទ្ធិមនុស្សនៅកម្ពុជា របស់ប្រទេសចំនួន ៣៦ នៅក្រុមប្រឹក្សាសិទ្ធិមនុស្ស អង្គការសហប្រជាជាតិ កាលពីថ្ងៃទី ១៤ ខែ កញ្ញា។
សេចក្ដីប្រកាសព័ត៌មានដដែលឲ្យដឹងថា ក្រៅពីនេះ កិច្ចប្រជុំក៏បានសម្រេចលើការកែសម្រួលសមាសភាពគណៈកម្មការតស៊ូមតិ ដែលមានសមាជិកចំនួន ១០រូប និងសេចក្ដីសម្រេចលើរបៀបវារៈចុងក្រោយគឺគណបក្សប្រឆាំង បានបង្កើតគណៈកម្មការមួយបន្ថែមទៀត គឺគណៈកម្មការយុទ្ធការ សម្រាប់ការបោះឆ្នោតជ្រើសរើស ក្រុមប្រឹក្សាឃុំសង្កាត់ ឆ្នាំ២០១៧៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។